Janayugom Online
Infant death janayugom

സ്ട്രച്ചര്‍ നല്‍കിയില്ല; നടക്കുന്നതിനിടെ പ്രസവിച്ചു: കുട്ടി തറയില്‍വീണ് മരിച്ചു

Web Desk
Posted on February 01, 2018, 9:56 pm

ഭോപ്പാല്‍: പ്രസവ വേദനയെ തുടര്‍ന്ന് ആശുപത്രിയില്‍ എത്തിയ യുവതിക്ക് സ്ട്രച്ചര്‍ നല്‍കാതെ ലേബര്‍ റൂമിലേക്ക് നടത്തിക്കൊണ്ടു പോകവെ പ്രസവിച്ച് കുഞ്ഞ് തറയില്‍ വീണ് മരിച്ചു. പ്രസവ വേദനയെ തുടര്‍ന്നാണ് യുവതി ആശുപത്രിയില്‍ എത്തിയത്. എന്നാല്‍ പ്രസവിക്കുന്നതിനുള്ള സമയം ആയില്ലെന്ന് പറഞ്ഞ് യുവതിയെ ലേബര്‍ റൂമിലേക്ക് നഴ്‌സ് നടത്തിക്കൊണ്ടു പോവുകയായിരുന്നു. മദ്ധ്യപ്രദേശിലെ ബെട്ടൂലിനടുത്തെ സര്‍ക്കാര്‍ ആശുപത്രിയിലാണ് നാടിന നടുക്കിയ സംഭവം നടന്നത്.
ഭോപ്പാലിനടുത്ത് ഗോദഡോഗ്രി സ്വദേശിയായ നീലു വെര്‍മ എന്ന യുവതിയുടെ കുഞ്ഞാണ് മരിച്ചത്. പ്രസവ വേദനയെ തുടര്‍ന്ന് നീലു കുടുംബത്തോടൊപ്പം ആശുപത്രിയില്‍ എത്തിയതായിരുന്നു. ആശുപത്രിയില്‍ എത്തിയ ഉടന്‍ കുടുംബം സ്ട്രച്ചറിന് ആവശ്യപ്പെട്ടു. എന്നാല്‍ നഴ്‌സ് നീലുവിന് സ്ട്രച്ചര്‍ നല്‍കാതെ ലേബര്‍ റൂമിലേക്ക് നടത്തിക്കൊണ്ടു പോവുകയായിരുന്നുവെന്ന് ബന്ധുക്കള്‍ മാദ്ധ്യമങ്ങളോട് പറഞ്ഞു.
ആശുപത്രി അധികൃതര്‍ സ്ട്രച്ചര്‍ അനുവദിച്ചിരുന്നുവെങ്കില്‍ കുഞ്ഞിനെ നഷ്ടപ്പെടില്ലായിരുന്നു എന്ന് യുവതിയുടെ ഭര്‍ത്താവ് പറഞ്ഞു. തങ്ങളുടെ ആദ്യത്തെ കുട്ടിയായിരുന്നവെന്നും എന്നാല്‍ ആശുപത്രി അധികൃതരുടെ അനാസ്ഥ മൂലം കുട്ടിയെ നഷ്ടമായെന്നും യുവതിയുടെ ഭര്‍ത്താവ് പറഞ്ഞു. സംഭവവുമായി ബന്ധപ്പെട്ട് അന്വേഷണത്തിന് ഉത്തരവിട്ടതായി ആശുപത്രി അധികൃതര്‍ അറിയിച്ചു. കുട്ടിയുടെ മരണത്തിന് ഉത്തരവാദികളായവര്‍ക്കെതിരെ നടപടി എടുക്കുമെന്നും ആശുപത്രി അധികൃതര്‍ പറഞ്ഞു.