Web Desk

January 03, 2020, 1:32 pm

മതസൗഹാർദ്ദത്തിന്റെയും മാനവസ്നേഹത്തിന്റെയും പുത്തൻ ഗാഥയുമായി ഒരു മുസ്‌ലിം ജമാഅത്ത്

hindu girl marriage
Janayugom Online

കായംകുളം: വർഗീയ ലഹളകളും പൗരത്വ നിയമ പ്രശ്നങ്ങളും മൂലം കലുഷിതമായ നമ്മുടെ നാട്ടിൽ നിന്ന് ഇതാ പ്രതീക്ഷയുടെ പൊൻതിരിനാളവുമായി ഒരു വാർത്ത. നിർധന ഹിന്ദു കുടുംബത്തിലെ പെൺകുട്ടിയുടെ വിവാഹം ഏറ്റെടുത്ത് നടത്താൻ തയാറായി ഒരു മുസ്‌ലിം പള്ളി മുന്നോട്ട് വന്നിരിക്കുന്നു.


ആലപ്പുഴ ജില്ലയിലെ കായംകുളത്ത് ചേരാവള്ളി മുസ്‌ലിം ജമാഅത്ത് ആണ് ഈ തീരുമാനം കൈക്കൊണ്ടിരിക്കുന്നത്. ഈ മാസം പത്തൊമ്പതിനാണ് വിവാഹം. വിവാഹ ക്ഷണക്കത്ത് അടക്കമുള്ളവ പള്ളി കമ്മിറ്റി അച്ചടിച്ച് വിതരണം ചെയ്തു കഴിഞ്ഞു. ചേരാവള്ളി ക്ഷേത്രത്തിന് സമീപം താമസിക്കുന്ന ബിന്ദുവിന്റെ മകൾ അഞ്ജുവിന്റെ വിവാഹമാണ് പള്ളിക്കമ്മിറ്റി നടത്തുന്നത്. ബിന്ദുവിന്റെ ഭർത്താവ് അശോകൻ നേരത്തെ മരിച്ചു പോയി. ഏറെ നിർധനമായ സ്ഥിതിയിലാണ് കുടുംബം മുന്നോട്ട് പോകുന്നത്.

പള്ളി അങ്കണത്തിൽ വച്ചാണ് വിവാഹ ചടങ്ങുകൾ. കാപ്പിൽ കിഴക്ക്, തൊട്ടേതെക്കടുത്ത് തറയിൽ ശരത് ശശിയാണ് പെൺകുട്ടിക്ക് താലി ചാര്‍ത്തുന്നത്.