Thursday 5, August 2021
Follow Us
EDITORIAL Janayugom E-Paper
ഡോ. പ്രിതം സിങ്

June 27, 2020, 5:30 am

കാർഷിക ഭേദഗതി ഓർഡിനൻസുകളും ഫെഡറലിസത്തിലേക്കുള്ള കയ്യേറ്റങ്ങളും

Janayugom Online

ഡോ. പ്രിതം സിങ്

 

കേന്ദ്ര സർക്കാർ അടുത്തിടെ മൂന്ന് പുതിയ ഓർഡിനൻസുകളിലൂടെ ചില സുപ്രധാന കാർഷിക വിപണി പരിഷ്കാരങ്ങൾ അവതരിപ്പിച്ചു. അവശ്യവസ്തു (ഭേദഗതി) ഓർഡിനൻസ് 2020, കാർഷിക ഉല്പാദന വാണിജ്യ ഓർഡിനൻസ് (ശക്തീകരണവും സംരക്ഷണവും) 2020, കർഷകർക്ക് വിലയും സേവനവും ഉറപ്പ് നൽകൽ എന്നീ നിയമപരിഷ്കാരങ്ങളാണ് അവതരിപ്പിക്കപ്പെട്ടത്. ഈ മൂന്ന് പരസ്പര ബന്ധിത ഓർഡിനൻസുകളും കാർഷിക മേഖലയിലെ സംസ്ഥാനങ്ങളുടെ അധികാരത്തിന്മേലുള്ള കേന്ദ്ര ഭരണകൂടത്തിന്റെ കടന്നുകയറ്റമാണ്. 1950ന് ശേഷമുള്ള ഭരണഘടന ഭേദഗതികളിൽ കേന്ദ്രസർക്കാരുകളുടെ തുടർച്ചയായുള്ള ഇത്തരം അധിനിവേശ ശ്രമങ്ങൾ കാണാൻ സാധിക്കും. എന്നാൽ 2020ൽ കൊണ്ടുവന്ന അവശ്യവസ്തു ഓർഡിനൻസ്, കാർഷികരംഗത്ത് സംസ്ഥാനങ്ങളുടെ ഫെഡറൽ അവകാശങ്ങൾക്ക് നേരെയുള്ള ഏറ്റവും വിനാശകരമായ ആക്രമണമാണ്.

ഈ പരിഷ്കാരങ്ങളുടെ തുറന്ന പ്രഖ്യാപനമാണ് ‘ഒരു ഇന്ത്യ, ഒരു കാർഷികവിപണി’ എന്ന കേന്ദ്രത്തിന്റെ മുദ്രാവാക്യം. ഇന്ത്യൻ ഭരണഘടനയുടെ ഏഴാമത്തെ ഷെഡ്യൂളിലെ മൂന്ന് പട്ടികകളും കേന്ദ്രത്തിന്റെയും സംസ്ഥാനങ്ങളുടെയും അവകാശങ്ങളും അധികാരങ്ങളും നിർവചിക്കുന്നുണ്ട്. ആദ്യ പട്ടികയിൽ കേന്ദ്രത്തിനായിരിക്കും അവകാശം. രണ്ടാമത്തെ പട്ടികയിൽ പറയുന്നത് സംസ്ഥാനങ്ങളുടെ അധികാരത്തെക്കുറിച്ചാണ്. മൂന്നാം പട്ടികയിൽ സംസ്ഥാനവും കേന്ദ്രവും അധികാരവും ഉത്തരവാദിത്വവും പങ്കിടുന്നതിനെപ്പറ്റിയാണ് പരാമർശിക്കുന്നത്. സംസ്ഥാന പട്ടികയിലെ പതിനാലാം വിഷയത്തിൽ കാർഷിക മേഖലയെക്കുറിച്ച് പരാമർശിക്കുന്നുണ്ട്. ക‍ൃഷി, ഗവേഷണം, സസ്യങ്ങളിലെ രോഗ നിയന്ത്രണം, കീടങ്ങളെ പ്രതിരോധിക്കുന്നതിനുള്ള മാർഗങ്ങൾ എന്നിവയെക്കുറിച്ചും വിവരിച്ചിട്ടുണ്ട്. കൃഷി ഭരണഘടന പ്രകാരം സംസ്ഥാന വിഷയമാണെന്ന് നിർവചിക്കപ്പെടുന്നു. ഭരണഘടനയുടെ മറ്റ് ചില വ്യവസ്ഥകൾ കൺകറന്റ് പട്ടികയിൽ കാർഷിക മേഖലയിലെ കേന്ദ്ര ഇടപെടലുകൾക്ക് ന്യായീകരണവും നൽകുന്നുണ്ട്.

കാർഷിക മേഖലയെ സംബന്ധിച്ച് നിയമനിർമ്മാണം നടത്തുന്നതിന് കേന്ദ്രത്തിന് യാതൊരു തടസവും ഭരണഘടന സൃഷ്ടിക്കുന്നില്ല. എന്നിരുന്നാലും കാർഷിക മേ­ഖല പോലുള്ള വിഷയങ്ങളിൽ നിയമനിർമ്മാണം നടത്താൻ കൂടുതൽ അധികാരം സംസ്ഥാനങ്ങൾക്കാണ്. ഇത് ഭരണഘടനയുടെ പതിനൊന്നാം അധ്യായത്തി­ൽ കേന്ദ്ര സംസ്ഥാന ബന്ധങ്ങളെക്കുറിച്ച് പ്രതിപാദിക്കുന്ന ഭാഗത്ത് വിശദമാക്കിയിട്ടുണ്ട്. മൂന്ന് പട്ടികയിലും പരാമർശിച്ചിട്ടില്ലാത്ത വിഷയങ്ങളിൽ നിയമനിർമ്മാണം നടത്താൻ 248-ാം വകുപ്പ് കേന്ദ്ര സർക്കാരിന് അധികാരം നൽകുന്നുണ്ട്. 249-ാം വകുപ്പ് പ്രകാരം സംസ്ഥാന പട്ടികയിൽ ഉൾപ്പെടുത്തിയിട്ടുള്ള വിഷയങ്ങളിൽ പോലും ദേശീയ താല്പര്യത്തിനനുസൃതമായി നിയമനിർമ്മാണത്തിന് അത്യാവശ്യമെങ്കിൽ പാർലമെന്റിന് അധികാരമുണ്ട്. ഫെഡറൽ സംവിധാനമുള്ള മറ്റൊരു രാജ്യത്തിന്റെയും ഭരണഘടനയിൽ സമാനമായ വ്യവസ്ഥകളൊന്നുമില്ല. ഭക്ഷ്യ വസ്തുക്കളുടെയും അസംസ്കൃത കാർഷിക വസ്തുക്കളുടെയും ഉല്പാദനം, വ്യാപാരം, വിതരണം എന്നിവ സംബന്ധിച്ച് സംസ്ഥാന സർക്കാരിനുള്ള നിയമനിർമ്മാണ അവകാശം ഭരണഘടന പരിമിതിപ്പെടുത്തിയിരിക്കുന്നു. 1955ലെ അവശ്യവസ്തു നിയമത്തിൽ കൺകറന്റ് പട്ടികയിൽ 33-ാം ഇനം വഴിയാണ് ഇതെന്ന് കേന്ദ്ര സംസ്ഥാന ബന്ധത്തെ സംബന്ധിക്കുന്ന സർക്കാരിയ കമ്മീഷൻ ചൂണ്ടിക്കാട്ടിയിട്ടുണ്ട്.

ഈ നിയമം കാർഷിക മേഖലയിൽ കേന്ദ്ര സർക്കാരിന് കൂടുതൽ അധികാരം നൽകുന്നു. 2020ലെ ഭേദഗതി കേന്ദ്രത്തിന് വീണ്ടും കൂടുതൽ അധികാരം നൽകി. വിലനിയന്ത്രണം സംബന്ധിച്ച് കൺകറന്റ് ലിസ്റ്റിലെ 34-ാം ഇനവും കേന്ദ്രത്തിന് സംസ്ഥാനങ്ങൾക്ക് മേൽ കൂടുതൽ അധികാരം നൽകുന്നു. കൺകറന്റ് ലിസ്റ്റിലെ 33,34 ഇനങ്ങൾ കാർഷിക മേഖലയിലെ സംസ്ഥാനങ്ങളുടെ സ്വയംഭരണ അധികാരത്തെ ചോദ്യം ചെയ്യുന്നതാണെന്ന് തമിഴ്‌നാട് സർക്കാർ ചൂണ്ടിക്കാട്ടിയിരുന്നു. ഇവ രണ്ടും സംസ്ഥാന പട്ടികയിലേക്ക് മാറ്റണമെന്നും സർക്കാരിയ കമ്മിഷനോട് സംസ്ഥാനം ആവശ്യപ്പെട്ടിരുന്നു. കൺകറന്റ് പട്ടികയിൽ മാത്രമല്ല കേന്ദ്ര പട്ടികയിലുള്ള കാർഷിക ഇനങ്ങൾ കൂടി സംസ്ഥാനങ്ങളുടെ അധികാരപരിധിയിൽ കൊണ്ടുവരണമെന്ന് പശ്ചിമ ബംഗാളിലെ ജ്യോതിബസു സർക്കാരും ആവശ്യപ്പെട്ടിരുന്നു. മൃഗസംരക്ഷണം, വനവൽക്കരണം, മത്സ്യബന്ധനം എന്നിവയുൾപ്പെടെ സംസ്ഥാന വിഷയമാക്കണമെന്നായിരുന്നു പശ്ചിമബംഗാളിന്റെ ആവശ്യം. കാർഷികമേഖലയിൽ കേന്ദ്രം അതിക്രമിച്ച് കടക്കുന്ന പ്രവണതയ്ക്ക് അറുതിവരുത്തണം. 2020 ലെ ഭേദഗതി ഇതിന് വിരുദ്ധമാണ്. തമിഴ്‌നാടും പശ്ചിമ ബംഗാളും നേരത്തെ ആവശ്യപ്പെട്ടിരുന്നതിനു വിരുദ്ധമായി പുതിയ ഭേദഗതികൾ മുമ്പുണ്ടായിരുന്നതിനേക്കാൾ കേന്ദ്രത്തിന്റെ അധികാരം വർധിപ്പിക്കുകയാണ് ചെയ്യുന്നത്.

ഓർഡിനൻസ് വഴിയുള്ള ഭേദഗതികൾ സംസ്ഥാനങ്ങളുടെ അധികാരങ്ങൾ കവർന്നെടുക്കുന്നവയാണ്. അടിയന്തരാവസ്ഥ (1975–1977) കാലത്ത് ഇന്ദിരാഗാന്ധി സമാനമായി അപകടകരമായ ചില ഭേദഗതികൾ കൊണ്ടുവന്നിരുന്നു. വിദ്യാഭ്യാസ രംഗത്തും വനസംരക്ഷണ വിഷയത്തിലും സംസ്ഥാനങ്ങളുടെ അധികാരം വെട്ടിക്കുറച്ച ഭേദഗതികളായിരുന്നു അവ. ഇപ്പോൾ കേന്ദ്രസർക്കാർ കോവിഡ് മൂലമുണ്ടായ ആരോഗ്യ അടിയന്തരാവസ്ഥ മറയാക്കി ഓർഡിനൻസുകളിലൂടെ നിയമ ഭേദഗതി കൊണ്ടുവരികവഴി സംസ്ഥാനങ്ങളുടെ അധികാരം കവർന്നെടുക്കുകയാണ്. ഫാർമിംഗ് പ്രൊഡ്യൂസ് ട്രേഡ് ആന്റ് കൊമേഴ്സ് (പ്രമോഷൻ ആന്റ് ഫെസിലിറ്റേഷൻ) ഓർഡിനൻസ്, 2020 ൽ സംസ്ഥാനങ്ങൾക്ക് നിലവിലുള്ള പരിമിതമായ സ്വയംഭരണാധികാരം പോലും കവർന്നെടുക്കുന്നു. സംസ്ഥാനങ്ങളുടെ ഫെഡറൽ അധികാരങ്ങൾ തിരികെയെടുക്കുന്നതാണ് പ്രസ്തുത ഭേദഗതി. സംസ്ഥാനങ്ങളുടെ പരിമിതമായ വരുമാന സ്രോതസുകൾപോലും നിഷേധിക്കുന്നതാണ് ഭേദഗതികളിൽ ഒന്ന് . സംസ്ഥാന കാർഷിക ഉല്പന്ന വിപണി സമിതിക്ക് (എപിഎംസി) മാർക്കറ്റ് ഫീസോ, സംസ്ഥാന സർക്കാരുകൾക്ക് വില്പന നികുതിയോ സെസ്സോ ഈടാക്കാൻ കഴിയില്ല.

ഇതിലൂടെ സംസ്ഥാനങ്ങളുടെ വരുമാന സ്രോതസാണ് കവർന്നെടുക്കപ്പെടുന്നത്. ജിഎസ്‌ടി വഴി സംസ്ഥാനങ്ങളെ സാമ്പത്തികമായി ദുർബലപ്പെടുത്തിയതിനു പിന്നാലെ സംസ്ഥാനങ്ങൾക്കുമേൽ കേന്ദ്ര ആശ്രിതത്വം അടിച്ചേൽപ്പിക്കുന്ന തന്ത്രമാണിത്. സംസ്ഥാനങ്ങളുടെ സ്വയംഭരണാവകാശത്തെ ദുർബലപ്പെടുത്തി കേന്ദ്ര സർക്കാരിന്റെ ആശ്രിതരാക്കി മാറ്റുകയാണ് ഫലത്തിൽ ഈ നിയമഭേദഗതി. ഭരണഘടനാപരമായി സംസ്ഥാനങ്ങളുടെ അവകാശങ്ങളെ പൂർണമായും കാറ്റിൽ പറത്തുന്നവയാണ് പ്രൈസ് അഷ്വറൻസ്, ഫാം സർവീസസ് ഓർഡിനൻസ് 2020. ഇതുവഴി കേന്ദ്രസർക്കാർ കാലാകാലങ്ങളിൽ നൽകുന്ന നിർദ്ദേശങ്ങൾക്ക് അനുസരിച്ച് പ്രവർത്തിക്കാൻ സംസ്ഥാനങ്ങൾ നിർബന്ധമാകും. സാമ്പത്തിക, രാഷ്ട്രീയ, സാമൂഹിക, സാംസ്കാരിക സ്വാതന്ത്ര്യവും ഭരണാധികാരവും ഫെഡറൽ സ്വഭാവവും നിലനിർത്താൻ കൃഷിയെ ഒരു സംസ്ഥാന വിഷയമായി സംരക്ഷിക്കുക സർവപ്രധാനമാണ്. (പ്രിതം സിങ്, ഒക്സ്ഫഡ് സർവകലാശാലയിലെ വുൾഫ്‌സൺ കോളജിൽ സന്ദർശക പണ്ഡിതനും ‘ഫെഡറലിസം, നാഷണലിസം, ഡവലപ്മെന്റ്’ എന്ന ഗ്രന്ഥത്തിന്റെ രചയിതാവുമാണ്.) കടപ്പാട്: ദ വയർ