December 3, 2022 Saturday

കവിതയും സിനിമയും നൃത്തവും സഹിക്കാത്ത മതം

കുരീപ്പുഴ ശ്രീകുമാർ
വർത്തമാനം
April 16, 2021 3:42 am

ടയ്ക്കിടയ്ക്ക് പൊട്ടിപ്പഴുത്ത് ദുർഗന്ധം പ്രസരിപ്പിക്കുന്ന വ്രണമാണ് മതം. ജാതിമത സ്വാധീനത്തെ ഒഴിവാക്കിക്കൊണ്ടുള്ള മാനുഷികചിന്തകൾ ഔഷധമായി സ്വീകരിക്കാത്തിടത്തോളം കാലം മതവ്രണം അതിന്റെ സ്നേഹവിരുദ്ധ വികാരം പ്രകടിപ്പിച്ചുകൊണ്ടിരിക്കും. ഒരു ഭഗവദ്ഗീതയും കുറെ മുലകളും, ഈശ്വരൻ അറസ്റ്റിൽ തുടങ്ങി ശീർഷകത്തിൽത്തന്നെ ആവിഷ്ക്കാര സ്വാതന്ത്ര്യത്തിന്റെ കൊടികളുയർത്തിയ രചനകളെ ആഹ്ലാദത്തോടെ സ്വീകരിച്ച കേരളമാണ്.
എം ടി വാസുദേവൻ നായരുടെ നിർമ്മാല്യമെന്ന സിനിമയിൽ, ഭഗവതിയുടെ മുഖത്തു കാർക്കിച്ചു തുപ്പുന്ന വെളിച്ചപ്പാടായി അഭിനയിച്ച പി ജെ ആന്റണിയെ ഇന്ത്യയിലെ ഏറ്റവും നല്ല നടനാക്കാൻ ഒരുക്കിയെടുത്തത് കേരളമാണ്.

മധ്യപ്രദേശിലെ മന്ത്രി കോവിഡിനെതിരെ വിമാനത്താവളത്തിൽ മന്ത്രവാദം നടത്തിയപ്പോൾ ആശുപത്രി സജ്ജീകരിക്കാനും അന്നം കൊടുക്കാനുമായി ഓടിനടക്കുകയായിരുന്നു കേരളത്തിന്റെ മന്ത്രിമാർ.
കേരളത്തിലെ വികലപക്ഷരാഷ്ട്രീയം അമ്മമാരുടെയും സഹോദരിമാരുടെയും പെൺ മക്കളുടെയും ആർത്തവകാലത്തെക്കുറിച്ച് ആവലാതിപ്പെട്ട് തീണ്ടാരിവിരുദ്ധസമരം നടത്തിയപ്പോൾ വിശുദ്ധകളായ അവരുടെ തൊഴിൽ സാധ്യതകളെക്കുറിച്ചും ശാക്തീകരണത്തെക്കുറിച്ചും ചിന്തിക്കുകയായിരുന്നു ഹൃദയപക്ഷ രാഷ്ട്രീയം.
ഇങ്ങനെയൊക്കെയാണെങ്കിലും മതരോഗത്തിനുള്ള ചികിത്സ കേരളത്തിൽ ഫലപ്രദമായില്ല. അതിനാൽ മതരാഷ്ട്രീയവും മതതീവ്രവാദവും അതിന്റെ പോഷകശക്തികളായ അന്ധവിശ്വാസവും അനാചാരവും കേരളത്തിൽ കുറഞ്ഞ തോതിലെങ്കിലും നിലനിൽക്കുന്നു. ഇടയ്ക്കിടയ്ക്ക് അവ കോമ്പല്ലുകൾ പുറത്തുകാട്ടുന്നു. മനുഷ്യരക്തം ഒഴിച്ചുകുടിക്കാനുള്ള ചഷകങ്ങൾ തുടച്ചുവയ്ക്കുന്നു. രാത്രി സഞ്ചാരത്തോടൊപ്പം ഇടയ്ക്കിടയ്ക്ക് സായാഹ്നസവാരിയും പരീക്ഷിച്ചു നോക്കുന്നു.

ഇങ്ങനെ തലപൊക്കിയപ്പോഴാണ് വിമോചനസമരം ഉണ്ടായത്. ക്രിസ്തുവിന്റെ ആറാം തിരുമുറിവ് നിരോധിക്കേണ്ടിവന്നത്. മതമില്ലാത്ത ജീവൻ എന്ന പാഠം പിൻവലിക്കേണ്ടിവന്നത്. ഭഗവാൻ കാലുമാറുന്നു എന്ന നാടകത്തിനു ജനകീയ സംരക്ഷണം നൽകേണ്ടി വന്നത്.
ഇപ്പോഴും മയങ്ങിക്കിടന്ന ആ പ്ലേഗ് തലപൊക്കിയിരിക്കുന്നു. പാലക്കാട് ജില്ലയിലെ കടമ്പഴിപ്പുറത്താണ് അടുത്തകാലത്ത് നാമത് കണ്ടത്. നീയാം തണൽ എന്ന സിനിമയുടെ ചിത്രീകരണം തടയപ്പെട്ടു. ഉപകരണങ്ങൾ നശിപ്പിച്ചു. ചിത്രീകരണസ്ഥലത്ത് സിനിമാകൗതുകവുമായി വന്ന എട്ടു വയസുകാരിയുടെ കൈ തല്ലിയൊടിച്ചു. കാരണം, ഹിന്ദു മുസ്ലിം പ്രണയമാണ് സിനിമയുടെ പ്രമേയം എന്നതായിരുന്നു. ഹിന്ദു മുസ്ലിം സ്നേഹകഥ മലയാളസിനിമയിൽ പുതിയതൊന്നുമല്ല. ചെമ്മീൻ, ആധാരം, ഹിസ് ഹൈനസ് അബ്ദുള്ള, ഉദയപുരം സുൽത്താൻ, തട്ടത്തിൻ മറയത്ത്, ദർബോണി, സൂഫിയും സുജാതയും, പഞ്ചാഗ്നി, എന്നു സ്വന്തം മൊയ്തീൻ… അങ്ങനെയെത്ര സിനിമകൾ! അപ്പോഴെങ്ങും ഉണ്ടാകാത്ത കലിപ്പ് ഇപ്പോഴുണ്ടാകാൻ കാരണമെന്താണ്. യാതൊരു സംശയവും വേണ്ട. ഹിന്ദുമത തീവ്രവാദികൾക്ക് കേന്ദ്ര രാഷ്ട്രീയ നേതൃത്വം നൽകുന്ന പിന്തുണയാണ്.

സുപ്രീം കോടതിയെ ബഹുമാനിക്കാൻ ബാധ്യതയുള്ള പ്രധാനമന്ത്രി കേരളത്തിൽ വന്നു സ്ത്രീപുരുഷ സമത്വമെന്ന ഭരണഘടനാ മൂല്യത്തിനെതിരേ തീണ്ടാരി സമരത്തിനു പിന്തുണ പ്രഖ്യാപിച്ചുകൊണ്ടു, മുദ്രാവാക്യം വിളിക്കുന്ന ലാഘവത്തോടെ മീനമാസത്തിൽ ശരണം വിളിച്ചാൽ തീവ്രവാദികളുടെ മതവ്രണം വികാരപ്പെടും. സമചിത്തതയുള്ള മലയാളിയെ അതു ബാധിക്കില്ലെങ്കിൽ കൂടിയും. മത തീവ്രവാദം ഒരു മതത്തിന്റെ മാത്രം പ്രശ്നമല്ല. മൗലികവാദികളായ ഏതു മത വിശ്വാസിയും ഒരു പ്രത്യേക സാഹചര്യത്തിൽ മതതീവ്രവാദിയായി മാറാം.
ജാനകി ഓം കുമാറും നവീൻ റസാക്കും നിഷ്ക്കളങ്കതയോടെ നൃത്തം ചെയ്തപ്പോൾ നീലമാനം ഇടിഞ്ഞുവീണില്ലെങ്കിലും മതവാദികളുടെ ദുരഭിമാനം ഇടിഞ്ഞു വീണു.
ലോകത്തെവിടെയുമുള്ള വിമോചന പ്രസ്ഥാനമാണ് മാർക്സിസം. അതിനെ അഭിവാദ്യം ചെയ്തതിനാൽ ബാഗ്ദാദും, കണ്ണടയും, രേണുകയുമൊക്കെ മലയാളിക്ക് സമ്മാനിച്ച കവി മുരുകൻ കാട്ടാക്കടയ്ക്കെതിരെ കൊലവിളി നടത്തിയ മതവാദിയെയും ഭരിക്കുന്നത് സ്നേഹവിരുദ്ധ വികാരമാണ്. അതെ മതതീവ്രവാദം പൂർണമായും സ്നേഹവിരുദ്ധമാണ്. പ്രണയ വിരുദ്ധവും മനുഷ്യവിരുദ്ധവുമാണ്.

ജാതിമതദൈവചിന്തകൾക്ക് സ്വജീവിതത്തിൽ ഒരു പ്രധാന്യവും കൊടുക്കാത്തവരായിരുന്നു നമുക്കേറെ പ്രിയപ്പെട്ട കെ ടി മുഹമ്മദും വയലാറും ദേവരാജനും. അവരൊരുമിച്ചപ്പോൾ ഇന്ത്യയിലെ ഏറ്റവും മികച്ച ചലച്ചിത്രഗാനം ഉണ്ടായി. മനുഷ്യൻ മതങ്ങളെ സൃഷ്ടിച്ചു/മതങ്ങൾ ദൈവങ്ങളെ സൃഷ്ടിച്ചു/ മനുഷ്യനും മതങ്ങളും ദൈവങ്ങളും കൂടി മണ്ണു പങ്കുവച്ചു, മനസു പങ്കുവച്ചു എന്ന എക്കാലത്തെയും മികച്ച ഗാനം. വല്ലപ്പോഴുമെങ്കിലും അച്ഛനും ബാപ്പയുമെന്ന സിനിമയിലെ ആ പാട്ടു നമ്മൾ കേൾക്കുന്നതു നല്ലതാണ്.

You may also like this video:

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.

Comments are closed.