Tuesday
12 Nov 2019

ബിഎസ്എൻഎൽ; ഇനിയും ആത്മഹത്യകൾ ഒഴിവാക്കുക

By: Web Desk | Friday 8 November 2019 10:30 PM IST


ഇന്ത്യയെ വിവര വിനിമയ രംഗത്ത് ലോകത്തോളം ഉന്നതിയിലെത്തിക്കുന്നതിൽ പ്രമുഖ പങ്ക് വഹിച്ച പൊതുമേഖലാ സ്ഥാപനമാണ് ബിഎസ്എൻഎൽ. ടെലികോം വകുപ്പെന്ന പേരിൽ പ്രവർത്തിച്ചിരുന്ന വകുപ്പിനെ ഉദാരവൽക്കരണ സാമ്പത്തിക നയത്തിന്റെ ഭാഗമായി ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ) എന്ന കമ്പനിയായി മാറ്റുകയായിരുന്നു. ബ്രിട്ടീഷ് കാലം മുതൽ ടെലികോം വകുപ്പ് ഭരണകേന്ദ്രങ്ങൾക്കും പൊതുജനങ്ങൾക്കും നൽകിവന്നിരുന്ന സേവനങ്ങൾ നിസ്തുലമായിരുന്നു. വിവര സാങ്കേതിക മേഖലയിലുണ്ടാകുന്ന കുതിപ്പുകൾക്കനുസൃതമായി ആധുനിക സാങ്കേതിക വിദ്യകൾ ഗ്രാമപ്രദേശങ്ങളിലേയ്ക്കുപോലുമെത്തിക്കുന്നതിൽ ടെലികോം വകുപ്പ് സർക്കാരിന്റെ ഭാഗമെന്നുള്ള പരിമിതികൾക്കിടയിലും സ്തുത്യർഹമായ പങ്കുവഹിച്ചുവെന്നത് യാഥാർഥ്യമാണ്.

ടെലിഫോണുകൾ വ്യാപകമാക്കുന്നതിൽ വകുപ്പിന് സുപ്രധാനമായ പങ്കുണ്ടായിരുന്നു. എന്നാൽ 1995 ൽ രാജ്യത്ത് മൊബൈൽ ഫോൺ കടന്നുവന്നപ്പോൾ ടെലികോം വകുപ്പിന് പകരം സ്വകാര്യ സംരംഭകർക്കാണ് അതിന്റെ സേവന ദാതാക്കളാകാൻ സർക്കാർ അനുമതി നൽകിയത്. ലാൻഡ് ഫോൺ രംഗത്തു മാത്രം ടെലികോം ശ്രദ്ധിച്ചാൽ മതിയെന്നായിരുന്നു സർക്കാർ നിലപാട്. പ്രസ്തുത നിലപാട് തുടരുന്നതിനിടയിൽ 2000 ഒക്ടോബറിലാണ് ടെലികോം വകുപ്പിനെ ബിഎസ്എന്‍എൽ എന്ന കമ്പനിയായി മാറ്റുന്നത്. ജീവനക്കാരുടെ സംഘടനകളുടെയും ബഹുജന പ്രസ്ഥാനങ്ങളുടെയും നിരന്തരമായ സമ്മർദത്തെ തുടർന്ന് 2002 ൽ മൊബൈല്‍ രംഗത്തേയ്ക്ക് കടക്കാൻ ബിഎസ്എൻഎല്ലിന് സർക്കാർ അനുമതി നൽകിയെങ്കിലും അതിനകം തന്നെ സ്വകാര്യ സംരംഭകർ ഈ രംഗത്ത് കുത്തകയുറപ്പിച്ചു കഴിഞ്ഞിരുന്നു.

എന്നാൽ സർക്കാരിന്റെ പിൻബലവും വിപുലമായ ശൃംഖലയും സ്വന്തമായുണ്ടായിരുന്നുവെന്ന മുൻഗണന കാരണം ബിഎസ്എൻഎല്ലിന് മൊബൈൽ രംഗത്തും മേൽക്കൈ നേടാനായി. പക്ഷേ പൊതുമേഖലയെക്കാൾ സ്വകാര്യ സംരംഭകരോടാണ് സർക്കാർ കൂടുതൽ ആഭിമുഖ്യം കാട്ടിയത്. ഇത് സ്വകാര്യ മൊബൈൽ ദാതാക്കളോട് മത്സരിക്കുന്നതിൽ ബിഎസ്എൻഎല്ലിനെ പ്രാപ്തമല്ലാതാക്കി. അതോടൊപ്പം ഓഹരി വിൽപനയും അവഗണനയും സ്ഥാപനത്തെ മെച്ചപ്പെട്ട പ്രവർത്തന നിലവാരത്തിൽ നിന്ന് പിറകോട്ട് നയിക്കുന്നതിന് കാരണമാവുകയും ചെയ്തു. ഇത് ഒരു കാലത്ത് രാജ്യത്തിന്റെ അഭിമാനമായി നിലനിന്നിരുന്ന സ്ഥാപനത്തെ പ്രതിസന്ധിയിലേക്ക് നയിക്കുന്നതിന് കാരണമായി.

ആ പ്രതിസന്ധിയുടെ ഒടുവിലത്തെ ഇരയാണ് കഴിഞ്ഞ ദിവസം ആത്മഹത്യയിൽ ജീവിതം അവസാനിപ്പിച്ച വണ്ടൂര്‍ കുന്നത്തുവീട്ടില്‍ രാമകൃഷ്ണനെന്ന കരാർ ജീവനക്കാരൻ. കരാർജോലി ചെയ്യുന്ന രാമകൃഷ്ണൻ പത്തുമാസത്തിലധികമായി വേതനം ലഭിക്കാതിരുന്നതിനെ തുടർന്നുള്ള പ്രാരാബ്ധത്തെ തുടർന്ന് താൻ ജോലി ചെയ്യുന്ന നിലമ്പൂരിലെ ബിഎസ്എൻഎൽ ഓഫീസിൽ ആത്മഹത്യ ചെയ്യുകയായിരുന്നു. പത്തുമാസത്തിലധികമായി വേതനം ലഭിക്കാതിരിക്കുന്ന കരാർ തൊഴിലാളികൾ സമരത്തിലേർപ്പെട്ടിരിക്കുകയാണ്. ഇതിനിടയിലാണ് രാമകൃഷ്ണന്റെ ആത്മഹത്യയുണ്ടായിരിക്കുന്നത്.

പൊതുമേഖലയുടെ സ്വകാര്യവൽക്കരണം, സ്ഥിരം തൊഴിലിന് പകരം കരാർ, കാഷ്വൽ തുടങ്ങിയ തൊഴിൽ രീതികൾ എന്നിവ നടപ്പിലാക്കിയതിന്റെ ഇരയാണ് യഥാർഥത്തിൽ രാമകൃഷ്ണൻ. ഈ രണ്ടു നടപടികളും കേന്ദ്ര സർക്കാർ സ്വീകരിച്ചുപോരുന്ന സ്വകാര്യ കുത്തകകളോടുള്ള അനുഭാവത്തിന്റെയും പ്രീണനത്തിന്റെയും ഫലമായി ഉണ്ടായവയാണ്. പൊതുമേഖലകളുടെ സ്വകാര്യവൽക്കരണത്തിന്റെ ഭാഗമായാണ് ടെലികോം വകുപ്പ് ബിഎസ്എൻഎൽ എന്ന കമ്പനിയായി മാറ്റിയത്. ഏറ്റവും ഒടുവിൽ മഹാനഗരങ്ങളിലെ വിവര വിനിമയ രംഗത്ത് കുത്തകയായി നിൽക്കുന്ന എംടിഎൻഎല്ലിനെ ബിഎസ്എൻഎല്ലുമായി ലയിപ്പിക്കാനുള്ള തീരുമാനവും കേന്ദ്ര സർക്കാർ കൈക്കൊണ്ടിരിക്കുകയാണ്.

സ്വകാര്യ സംരംഭകരോടുള്ള പ്രീണനത്തിന്റെ ഫലമായാണ് ആദ്യഘട്ടത്തിൽ മൊബൈൽ ഫോൺ രംഗത്തേയ്ക്ക് പ്രവേശിക്കുന്നതിൽ നിന്ന് ബിഎസ്എൻഎല്ലിനെ തടയാൻ സർക്കാർ സന്നദ്ധമായത്. കോൺഗ്രസും ബിജെപിയും പിന്നീട് യുപിഎ, എൻഡിഎ സർക്കാരുകളും ഇതേ നിലപാടാണ് തുടർന്നത്. റിലയൻസിന്റെ ജിയോ ഉൾപ്പെടെയുള്ള സ്വകാര്യ സംരംഭകർക്ക് അനുകൂലമായി ടെലികോം നയം ഉദാരമാക്കുന്നതിന് നരേന്ദ്രമോഡി സർക്കാർ ശ്രമിച്ചത് ബിഎസ്‍എൻഎല്ലിന്റെ മരണമണി മുഴക്കമായി മാറുകയും ചെയ്തു.

ഇതോടൊപ്പം തൊഴിൽരീതികളിലുണ്ടാക്കിയ മാറ്റം സ്ഥിരം വേതനം ലഭ്യമാകുന്ന അവസ്ഥ അവസാനിപ്പിച്ച് തൊഴിൽ സുരക്ഷിതത്വമെന്നത് സ്വപ്നമായി മാറ്റി. അതിന്റെ ഭാഗമായാണ് പൊതുമേഖലാ സ്ഥാപനങ്ങളിൽ പോലും നിയമന നിരോധനം നടപ്പിലാക്കി കരാർവൽക്കരണം വ്യാപകമായത്. പൊതുമേഖലാ സ്ഥാപനങ്ങളിലെല്ലാം സ്ഥിരം നിയമനം ഇന്ന് അവസാനിച്ച മട്ടാണ്. പകരം കരാർ നിയമനവും കാഷ്വൽ ജോലിയും പ്രതിദിന വേതനത്തൊഴിലുമൊക്കെ മാത്രമാണ് ഉള്ളത്.

നിശ്ചിത വേതനമല്ലാതെ മറ്റാനുകൂല്യവും അവർക്ക് ലഭ്യമാകുന്നില്ല. അതിന്റെ കൂടെയാണ് കൃത്യമായി വേതനം നൽകാൻ പോലും സന്നദ്ധമാകാത്ത സാഹചര്യം. ഇപ്പോഴാകട്ടെ സ്വയം വിരമിക്കൽ ഉൾപ്പെടെയുള്ള പദ്ധതികളിലൂടെ ജീവനക്കാരെ പറഞ്ഞയക്കുന്ന പദ്ധതിയും ബിഎസ്എൻഎല്ലിൽ നടപ്പിലായിരിക്കുകയാണ്. ഇതെല്ലാം പൊതുമേഖലയെ തകർക്കുകയും സ്വകാര്യ സംരംഭകരെ സഹായിക്കുകയും ചെയ്യുകയെന്ന ലക്ഷ്യത്തോടെ മാത്രമാണെന്നതിൽ സംശയമില്ല. ഇതെല്ലാംകൊണ്ടുതന്നെ രാമകൃഷ്ണന്റെ മരണത്തിന്റെ യഥാർഥ ഉത്തരവാദി കേന്ദ്ര സർക്കാരും അവരുടെ നയങ്ങളുമാണ്. അതിനാൽ ഇനിയൊരു മരണമുണ്ടായിക്കൂടെന്ന ധാരണയിൽ നയങ്ങൾ തിരുത്തുകയാണ് കേന്ദ്രസർക്കാർ ചെയ്യേണ്ടത്.