ആധുനിക സോഷ്യലിസ്റ്റ് സമൂഹസൃഷ്ടിയുടെ ശില്പിയും വിപ്ലവകാരിയും മഹാനുമായ വ്ലാഡിമിർ ഇല്ലിച്ച് ലെനിന്റെ ജനനം 1870 ഏപ്രിൽ 22നായിരുന്നു. ചരിത്രപരമായ ഭൗതികവാദ നിയമങ്ങളനുസരിച്ച്, അഥവാ ചരിത്രത്തിന്റെ ഭൗതികവാദ സങ്കല്പമനുസരിച്ച് സോഷ്യലിസം മുതലാളിത്തത്തെ പിന്തുടരുന്നു. പോയ ഘട്ടങ്ങളെ മാറ്റിസ്ഥാപിക്കുന്ന ഏത് സാമൂഹിക‑സാമ്പത്തിക രൂപീകരണവും എല്ലായ്പ്പോഴും മെച്ചപ്പെട്ടതാണ്. സോഷ്യലിസവും മുതലാളിത്തത്തെക്കാൾ ഉയർന്നതും മികച്ചതുമാണ്. അത് ഉല്പാദന ശക്തികളുടെ പരിണാമത്തിന്റെ ഫലമാണ്. പരിവർത്തനത്തിനിടയിൽ സോഷ്യലിസം നവമാർഗം കൈക്കൊള്ളുന്നു. വ്യവസായ സംബന്ധിയായ അവസ്ഥയിൽ നിന്ന് വ്യാവസായിക സംഘടനയുടെ ഉയർന്ന തലങ്ങളിലേക്കുള്ള മാറ്റം പൂർണമായും ചരിത്രപരമായ ഭൗതികവാദ നിലപാടിന് അനുസൃതമാണ്. ഇങ്ങനെ രൂപപ്പെടുന്ന വ്യവസ്ഥയുടെ പരിണാമം ശാസ്ത്രസാങ്കേതിക വിദ്യയിലൂടെ ദ്രുതഗതിയിലായിരുന്നു. ഇത്തരം വ്യവസ്ഥകൾ കാലഹരണപ്പെട്ട ഉല്പാദന ശക്തികളെ ഉപേക്ഷിച്ച് പുതിയ രീതികളോടെ ആധുനിക ഘട്ടത്തിലേക്ക് പ്രവേശിക്കുന്നു. വ്യത്യസ്തമായ സാമൂഹിക ഘടനയും, പുതിയ സാമൂഹിക ഘടനയുടെ വേറിട്ട ഘട്ടവും രൂപപ്പെടുന്നു. സോഷ്യലിസത്തിലേക്കുള്ള പുതിയ പാത എന്ന സമീപനം തന്നെ മാറ്റങ്ങൾക്ക് വിധേയമായിട്ടുണ്ട്. വികസിതമായ പുതിയ സംവിധാനം ശാസ്ത്രസാങ്കേതിക വിദ്യയെ അടിസ്ഥാനമാക്കിയുള്ളതാണ്. ഉല്പാദനോപാധികളും അതിവേഗതയിൽ പരിവർത്തന ഘട്ടത്തിലാണ്. ഇപ്പോൾ കൂറ്റൻ യന്ത്രങ്ങളോ അതിബൃഹത്തായ വ്യാവസായിക സമുച്ചയങ്ങളോ ആവശ്യമില്ലാതായിരിക്കുന്നു. പക്ഷെ ലെനിൻ ഇന്നും അന്നും എക്കാലവും പ്രസക്തനാണ്. അരാജകവാദികൾ, തീവ്ര ഇടതുപക്ഷം, പരിഷ്കരണവാദികൾ, സാമ്പത്തിക വിദഗ്ധർ തുടങ്ങിയവരുമായുള്ള പോരാട്ടത്തിലൂടെയാണ് മാർക്സിസം വികസിച്ചത്. പ്രസ്ഥാനത്തെ നയിക്കാനും മുന്നോട്ട് കൊണ്ടുപോകാനും ലെനിന്‍ ശ്രമിച്ചു.
പാർട്ടിയുടെ നയങ്ങളെ പിന്തുണയ്ക്കുക മാത്രമല്ല, അത് കെട്ടിപ്പടുക്കുന്നതിലും പങ്കാളിയായി. ലെനിന്റെ പ്രശസ്ത ഗ്രന്ഥമായ “എന്താണ് ചെയ്യേണ്ടത്” (What is to be done) ഇത്തരം സന്ദർഭങ്ങളുടെ പ്രസക്തി ഉൾക്കൊണ്ട് എഴുതിയതാണ്. മൂലധനത്തിനും തൊഴിലാളിവർഗത്തിനും ഇടയിലുള്ള സാമൂഹിക‑സാമ്പത്തിക വിടവ് മാർക്സിന്റെ സങ്കല്പങ്ങളെപ്പോലും കവച്ച് അപകടകരമായ അളവുകളിലേക്ക് മാറിയിരിക്കുന്നു. നാടിന്റെ സ്വത്ത് കൊള്ളയടിക്കുന്നവരെ പരാമർശിക്കാൻ 1990കളിൽ ഉപയോഗിച്ച പ്രഭുവർഗം എന്ന പദം ആഗോള പ്രതിഭാസമായിരിക്കുന്നു. ലോകത്തിലെ ഏറ്റവും ധനികരായ അഞ്ച് പേർക്ക് 869 ദശലക്ഷം ഡോളറിന്റെ ആസ്തിയുണ്ട്. 2020 മുതൽ അവർ തങ്ങളുടെ സമ്പത്ത് ഇരട്ടിയിലധികം വർധിപ്പിച്ചു. അതേസമയം ലോകജനസംഖ്യയുടെ ഭൂരിഭാഗവും ദരിദ്രരായി. വളർന്നുവരുന്ന വർഗസംഘർഷങ്ങളുടെ സമ്മർദത്തിൽ ബൂർഷ്വാ ജനാധിപത്യം ശിഥിലമാകുകയാണ്. പല രാജ്യങ്ങളിലും സ്വേച്ഛാധിപത്യ ഫാസിസ്റ്റ് ഭരണരീതികൾ വർധിക്കുന്നു. മൂന്നാം ലോകമഹായുദ്ധത്തിന്റെ പശ്ചാത്തലം തെളിഞ്ഞുതുടങ്ങിയിരിക്കുന്നു. ആണവയുദ്ധത്തിലേക്ക് എത്തിയാലും വേണ്ടില്ല, റഷ്യയും ഉക്രെയ്‌നും തമ്മിലുള്ള യുദ്ധം റഷ്യ സൈനികമായി പരാജയപ്പെടുന്നതുവരെ നിലനിർത്തണമെന്ന് സാമ്രാജ്യത്വ ശക്തികള്‍ ശഠിക്കുന്നു. ഗാസയിൽ പലസ്തീനികളെ കൊന്നൊടുക്കുന്നവരുടെ യുദ്ധവെറി രാജ്യാതിർത്തി കടന്നും നീങ്ങുന്നു. അമേരിക്കയും യൂറോപ്യൻ സഖ്യകക്ഷികളും കലാപങ്ങൾക്കും സംഘർഷങ്ങൾക്കും ചൂട്ടു പിടിക്കുന്നു. “സാമ്രാജ്യത്വം: മുതലാളിത്തത്തിന്റെ ഏറ്റവും ഉയർന്ന ഘട്ടം” എന്ന പുസ്തകത്തിൽ സാമ്രാജ്യത്വം കേവലം ബൂർഷ്വാ നയമല്ല, മറിച്ച് മുതലാളിത്തത്തിന്റെ ഏറ്റവും ഉയർന്ന ഘട്ടത്തെ പ്രതിനിധീകരിക്കുന്നുവെന്ന് ലെനിൻ അടിവരയിട്ടു. ജീർണത, പരാദവാദം, ഇല്ലാതാകുന്ന പ്രതികരണശേഷി തുടങ്ങിയ വികലസവിശേഷതകളുടെ കാലം.
കുത്തകകൾ സ്വതന്ത്ര മത്സരത്തെയും ധനകാര്യ മൂലധനത്തെയും ഇല്ലാതാക്കി വ്യാവസായിക മൂലധനത്തിന്മേൽ ആധിപത്യം പുലർത്തുന്ന അവസ്ഥ സൃഷ്ടിക്കുന്നു. ഈ അവസ്ഥയിൽ ലോകം സാമ്രാജ്യത്വ ശക്തികളുടെ ഇച്ഛയ്ക്കൊപ്പം പൂർണമായും വിഭജിക്കപ്പെട്ടിരിക്കുന്നു. ബലപ്രയോഗത്തിലൂടെ കൂടുതല്‍ വിഭജനം സംഭവിക്കാം. ഇത്തരം വിശകലനത്തിൽ നിന്ന് ലെനിന്റെ നിഗമനം ദീർഘവീക്ഷണമുള്ളതും ധീരവുമായിരുന്നു. യുദ്ധത്തെ വിപ്ലവകരമായ ആഭ്യന്തരയുദ്ധമാക്കി മാറ്റുന്നതിനെ എതിർത്തു. സാമ്രാജ്യത്വം പരിഷ്കരിക്കാൻ കഴിയുന്നതല്ല, അത് അട്ടിമറിക്കപ്പെടേണ്ടതാണെന്ന് ലെനിൻ വ്യക്തമാക്കി. സാമ്രാജ്യത്വവാദികളോട് കൂടുതൽ സമാധാനപരമായ നയം സ്വീകരിക്കാൻ സമ്മർദം ചെലുത്തുന്നതും ധാർമ്മികമായ അഭ്യർത്ഥനകൾ ഉന്നയിക്കുന്നതും മിഥ്യാധാരണകൾ സൃഷ്ടിക്കാനും ജനങ്ങളുടെ വിപ്ലവകരമായ മനോബലത്തെയും ഊർജത്തെയും നിയന്ത്രിക്കാനും മാത്രമേ സഹായിക്കൂ. ലോകമഹായുദ്ധത്തിലേക്ക് നയിച്ച വസ്തുനിഷ്ഠ പ്രക്രിയകൾ തന്നെയാണ് തൊഴിലാളിവർഗ വിപ്ലവത്തിനുള്ള സാഹചര്യങ്ങൾ സൃഷ്ടിക്കുന്നതെന്നും ലെനിൻ മനസിലാക്കി. യുദ്ധവും സാമ്രാജ്യത്വത്തിന്റെ വൈരുധ്യങ്ങളും ജനങ്ങളെ വിപ്ലവത്തിലേക്ക് നയിക്കുമെന്ന നിഗമനത്തെ അടിസ്ഥാനമാക്കിയുള്ളതായിരുന്നു അക്കാലത്തെ അദ്ദേഹത്തിന്റെ വീക്ഷണം. വർഗസമരത്തിന്റെ തീവ്രത വസ്തുനിഷ്ഠവും സ്വയമേവയുള്ളതുമായ പ്രക്രിയയെങ്കിലും, ഫലം വിപ്ലവത്തിന്റെ വിജയമോ പരാജയമോ എന്ന ചോദ്യത്തിന് ബോധപൂർവവും തൊഴിലാളിവർഗപരവുമായ ഒരു നേതൃത്വത്തിന്റെ നിലനില്പിനെ ആശ്രയിച്ചിരിക്കുന്നു എന്നായിരുന്നു ഉത്തരം. ലെനിനെപ്പോലെ ആരും ഈ ചോദ്യം ഇത്ര നിശിതമായി മനസിലാക്കിയിട്ടില്ല. മാർക്സിസ്റ്റ് എന്ന നിലയിൽ അദ്ദേഹത്തിന്റെ അതുല്യവും ചരിത്രപരവുമായ പങ്കും പ്രതിഭയും ഇവിടെയാണ്. തന്റെ രാഷ്ട്രീയ ജീവിതത്തിന്റെ ആദ്യ 30 വർഷം തൊഴിലാളിവർഗം സൈദ്ധാന്തികവും രാഷ്ട്രീയവുമായ കരുത്താർജിക്കുന്നതിനായി അദ്ദേഹം നീക്കിവച്ചു. ബൂർഷ്വാ, പെറ്റി-ബൂർഷ്വാ പ്രവണതകൾക്കെതിരായ അക്ഷീണമായ വാദപ്രതിവാദത്തിൽ, തൊഴിലാളിവർഗത്തിന്റെ പ്രത്യയശാസ്ത്രപരവും രാഷ്ട്രീയവും സംഘടനാപരവുമായ സ്വാതന്ത്ര്യത്തിനായി അദ്ദേഹം പോരാടി. നരോദ്നിക്കുകള്‍ക്കെതിരായ തന്റെ ആദ്യ രചനകളിൽ, ശാസ്ത്രീയ ഭൗതികവാദത്തിന്റെ പ്രതിരോധത്തിന് ലെനിൻ ഊന്നൽ നൽകി. അവസരവാദത്തിനെതിരെ അദ്ദേഹം കർക്കശമായും സ്ഥിരതയോടെയും പോരാടി. അവസരവാദം കേവലം തെറ്റായ ഒരു നയമല്ലെന്നും മറിച്ച് തൊഴിലാളിവർഗത്തിൽ ശത്രുതാപരമായ വർഗശക്തികളുടെ സ്വാധീനം ഉൾക്കൊള്ളുന്നതാണെന്നും ലെനിൻ മനസിലാക്കി. അങ്ങനെ, 1917ൽ റഷ്യൻ തൊഴിലാളിവർഗത്തെ അധികാരത്തിലേക്ക് നയിച്ച ബോൾഷെവിക് പാർട്ടി അദ്ദേഹം രൂപീകരിച്ചു.
സ്റ്റാലിന്റെ കാലത്തെപ്പോലെ അംഗങ്ങളുടെ മേലുള്ള ഉപകരണത്തിന്റെ അധികാരമല്ല ബോൾഷെവിസം കൊണ്ട് ഉദ്ദേശിച്ചത്, പാർട്ടിക്ക് അഭൂതപൂർവമായ സ്വാധീനവും പ്രവർത്തനെെക്യവും നൽകിയുള്ള നിരന്തരമായ പോരാട്ടമായിരുന്നു. ലെനിൻ ഒരു അന്താരാഷ്ട്രവാദിയായിരുന്നു. 1917 ഏപ്രിലിലെ പ്രബന്ധത്തിൽ, കെറൻസ്കി ഭരണകൂടത്തെ തൊഴിലാളിശക്തി ഉപയോഗിച്ച് മാറ്റി പൂർണ അധികാരം നേടുക എന്ന സിദ്ധാന്തം അദ്ദേഹം അംഗീകരിച്ചു. ഒക്ടോബർ വിപ്ലവത്തിന്റെ വിജയത്തിനുശേഷം, ആഭ്യന്തരയുദ്ധവും വമ്പിച്ച സാമ്പത്തിക ബുദ്ധിമുട്ടുകളും ഉണ്ടായിരുന്നിട്ടും, ലെനിൻ തന്റെ ഊർജത്തിന്റെ ഭൂരിഭാഗവും ലോക സോഷ്യലിസ്റ്റ് പ്രസ്ഥാനത്തെ പുനഃസംഘടിപ്പിക്കുന്നതിലും കമ്മ്യൂണിസ്റ്റ് ഇന്റർനാഷണൽ കെട്ടിപ്പടുക്കുന്നതിലും കേന്ദ്രീകരിച്ചു. മുതലാളിത്തത്തിന്റെ തകർച്ചയും സോഷ്യലിസ്റ്റ് വിപ്ലവത്തിനുള്ള വസ്തുനിഷ്ഠമായ വ്യവസ്ഥകളും ലെനിന്റെ കാലത്തെക്കാൾ ഇന്ന് വളരെയധികം പുരോഗമിച്ചിരിക്കുന്നു. സാമ്പത്തികമായി പിന്നാക്കം നിൽക്കുന്നവരും കാർഷിക മേഖലയിലുള്ളവരുമായ കോടിക്കണക്കിന് തൊഴിലാളികൾ ലോകമെമ്പാടും നിറഞ്ഞിരിക്കുന്നു. തൊഴിലാളിവർഗത്തിന്റെ വിപ്ലവ പോരാട്ടം ലോകമെമ്പാടും ഏകീകൃതവും വിശാലവുമായ പ്രസ്ഥാനമായി വികസിച്ചുകൊണ്ടിരിക്കുന്നു. സാമ്പത്തിക പണിമുടക്കുകളിലും സാമൂഹിക വെട്ടിക്കുറവുകള്‍ക്കും യുദ്ധത്തിനുമെതിരായ ബഹുജന പ്രതിഷേധങ്ങളിലും ഇത് പ്രകടമാകുന്നു. ഗാസയിലെ വംശഹത്യക്കെതിരെ ദശലക്ഷക്കണക്കിന് ആളുകൾ ലോകമെമ്പാടും തെരുവിലിറങ്ങുന്നു. ഇതാണ് ലെനിന്റെ പൈതൃകത്തിന്റെ കാലോചിതമായ മഹത്വവും പ്രാധാന്യവും.
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.