അവരെപ്പോഴും
അങ്ങനെയാണ്
വെല്ലുവിളിക്കില്ല
ഭീഷണികളില്ല
ആയുധങ്ങളില്ല
ആക്രോശങ്ങളില്ല
അത്രമേൽ
നിഷ്കളങ്കമായി
അത്രമേൽ
ഭ്രമിപ്പിക്കുന്ന
നിശബ്ദതയോടെ
നിങ്ങളുടെ
മേൽക്കൂരകളെ
കവർന്നെടുക്കുന്നു
സാധ്യതകളുടെ
പുതിയ ആകാശമെന്ന്
തോന്നും മുകളിൽ
കാറ്റിനു
ജനൽ പാളികളും
അതിഥികൾക്ക്
വാതിലുകളും
എന്തിനെന്നു തോന്നും
രാത്രിയിൽ
തെളിഞ്ഞ
ആകാശം
തിളങ്ങുന്ന നക്ഷത്രം
ഭിത്തിയിൽ അവർ
വരച്ചു തുടങ്ങിയ
അമൂർത്ത
മൺ ചിത്രങ്ങൾ
ഒരു വിലങ്ങിനും
തളച്ചിടാനാകാതെ
ഒഴുകി പരക്കുന്ന
സ്വപ്നങ്ങൾ
ഉറക്കമുണരുമ്പോൾ
നനുത്ത മൺപുറ്റ്
ചുറ്റിലും
വെളിപാട് കൊള്ളാനെന്ന്
അവർ
പുറത്തു
ഭിത്തിയുടെ
അവസാന പാളിയും
പൊഴിഞ്ഞു
വീഴുന്നറിയാതെ
അകത്തു
ധ്യാനമോ
സമാധിയോ
എന്ന് തിരിച്ചറിയാനാകാതെ
നിങ്ങൾ
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.