Tuesday
19 Mar 2019

തലശ്ശേരി മൂര്യാട്ടെ പ്രമോദ് വധം; പത്ത് പേര്‍ക്ക് ജീവപര്യന്തം

By: Web Desk | Wednesday 4 April 2018 4:19 PM IST


jail

തലശ്ശേരി: ബിജെപി പ്രവര്‍ത്തകനെ വെട്ടിക്കൊലപ്പെടുത്തുകയും ഒരാളെ കൊലപ്പെടുത്താന്‍ ശ്രമിക്കുകയും ചെയ്ത കേസില്‍ പ്രതികളായ പത്ത് സി പി എം പ്രവര്‍ത്തകര്‍ക്ക് ജീവപര്യന്തം തടവ്. തലശ്ശേരി അഡീഷണല്‍ ജില്ലാസെഷന്‍സ് ജഡ്ജ് വിജയകുമാറാണ് ശിക്ഷവിധിച്ചത്.
ബിജെപി പ്രവര്‍ത്തകനായ മൂര്യാട്ടെ കുമ്പളപ്രവന്‍ പ്രമോദിനെ (37) വെട്ടിക്കൊലപ്പെടുത്തിയ കേസിലാണ് സി പി എം പ്രവര്‍ത്തകരും മൂര്യാട് സ്വദേശികളുമായ സി പി എം കൂത്തുപറമ്പ് ഈസ്റ്റ് ലോക്കല്‍ കമ്മറ്റി അംഗം മണ്ടാംപറമ്പത്ത് കുന്നപ്പാടി മനോഹരന്‍ (51), മാണ്ടിയപറമ്പത്ത് നാനോത്ത് പവിത്രന്‍ (56), പാറക്കാട്ടില്‍ അണ്ണേരി പവിത്രന്‍ (58), ചാലിമാളയില്‍ പാട്ടാരി ദിനേശന്‍ (50), അഭിഭാഷകനായ കുട്ടിമാക്കൂലില്‍ കുളത്തുംകണ്ടി ധനേഷ് (32), ജാനകി നിലയത്തില്‍ കേളോത്ത് ഷാജി (36) , കെട്ടിടല്‍ വീട്ടില്‍ അണ്ണേരി വിപിന്‍ (28), ചാമാളയില്‍ പാട്ടാരി സുരേഷ്ബാബു (41), കിഴക്കെയില്‍ പാലേരി റിജേഷ് (30), ഷമില്‍ നിവാസില്‍ വാളോത്ത് ശശി (50), എന്നിവരെ കുറ്റക്കാരാണെന്നും കോടതി കണ്ടെത്തിയത്.

പതിനൊന്ന് സി പി എം പ്രവര്‍ത്തകരായിരുന്നു കേസിലെ പ്രതികള്‍. എന്നാല്‍ വിചാരണക്കിടയില്‍ പ്രതിയായ മൂര്യാട്ടെ ചോതയില്‍ താറ്റ്യോട്ട് ബാലകൃഷ്ണന്‍ (60) മരണമടഞ്ഞിരുന്നു. 2007 ആഗസ്ത് 16ന് രാവിലെ ഏഴുമണിയോടെ കൂത്തുപറമ്പ് മൂര്യാട് ചുള്ളിക്കുന്നില്‍ കശുമാവിന്‍തോട്ടത്തിലാണ് കേസിനാസ്പദമായ സംഭവമുണ്ടായത്. പ്രമോദും കൂട്ടുകാരനും ജോലിക്ക് പോകുമ്പോഴാണ് ഇവര്‍ക്ക് നേരെ അക്രമമുണ്ടായത്. പ്രമോദിന്‍റെ കൂടെ ഉണ്ടായിരുന്ന മൂര്യാട്ടെ ആലക്കാടന്‍ പ്രകാശ(51)ന് അക്രമത്തില്‍ ഗുരുതരമായി പരിക്കേറ്റിരുന്നു.
കണ്ണവം എസ് ഐ ആയിരുന്ന കെ വി പ്രമോദിന്‍റെ പരാതിയിലാണ് പോലീസ് പ്രഥമ വിവരം രേഖപ്പെടുത്തിയത്. മുരളിക്കോളി രമേശന്‍, വാളാങ്കി രാജീവന്‍, പുത്തന്‍പുരയില്‍ പ്രകാശന്‍, ഡോ. പി ശ്യാമള, ഡോ. ഗിരിജാദേവി, പോലീസ് ഓഫീസര്‍മാരായ പി സതീശന്‍, എ വി പ്രദീപ്, സജീവന്‍ തുടങ്ങിയ 24 പേരാണ് കേസിലെ പ്രോസിക്യൂഷന്‍ സക്ഷികള്‍. 25 രേഖകളും ഒമ്പത് തൊണ്ടിമുതലുകളും പ്രോസിക്യൂഷന് വേണ്ടി കോടതി മുമ്പാകെ ഹാജരാക്കിയിരുന്നു. പ്രോസിക്യൂഷന് വേണ്ടി അഡീഷനല്‍ ഡിസ്ട്രിക്ട് ഗവ. പ്ലീഡര്‍ അഡ്വ. പി അജയകുമാറാണ് ഹാജരായത്.

Related News