Janayugom Online
ak balan

കെഎഎസ്: മൂന്നു സ്ട്രീമിലും സംവരണം ഉറപ്പാക്കും

Web Desk
Posted on January 22, 2019, 5:38 pm
തിരുവനന്തപുരം: കേരള അഡ്മിനിസ്‌ട്രേറ്റീവ് സര്‍വീസിലെ എല്ലാ സ്ട്രീമുകളിലും നിയമാനുസരണമുള്ള സംവരണം ഉറപ്പാക്കുമെന്ന് നിയമമന്ത്രി എ കെ ബാലന്‍. രണ്ടാമത്തെയും മൂന്നാമത്തെയും സ്ട്രീമുകളില്‍  സംവരണം ഉണ്ടാകുമോ എന്ന ആശയക്കുഴപ്പമാണ് പലരും ഉന്നയിക്കുന്നത്. ഇക്കാര്യത്തില്‍ ആശങ്ക വേണ്ടെന്നും മൂന്നു സ്ട്രീമിലും നിയമാനുസൃതമായ സംവരണം ഉറപ്പാക്കുമെന്നും മന്ത്രി വ്യക്തമാക്കി. ഇതിന് ആവശ്യമെങ്കില്‍ ചട്ടങ്ങളില്‍ ഭേദഗതി വരുത്തുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.
 കൂടാതെ, മുന്നാക്കവിഭാഗങ്ങളിലെ സാമ്പത്തികമായി പിന്നാക്കം നില്‍ക്കുന്നവര്‍ക്കുള്ള സര്‍ക്കാര്‍ നിയമനങ്ങളിലുള്ള സംവരണം സംബന്ധിച്ച് സര്‍ക്കാര്‍ ആവശ്യമായ നടപടി സ്വീകരിക്കുമെന്നും മന്ത്രി അറിയിച്ചു. മൂന്നു സ്ട്രീമുകളില്‍ ആദ്യത്തേത് നേരിട്ടുള്ള നിയമനമാണ്. ഇതില്‍ നിയമാനുസൃത സംവരണം നേരത്തെ വ്യക്തമാക്കിയിരുന്നു. രണ്ടാമത്തെ സ്ട്രീം നോണ്‍ഗസറ്റഡ് ജീവനക്കാരും അതില്‍ താഴെയുള്ളവരും, മൂന്നാമത്തെ സ്ട്രീം ഫസ്റ്റ് ഗസറ്റഡ് പോസ്റ്റും അതിനു മുകളിലുള്ളവരുമാണ്.
പിന്നാക്കാവസ്ഥയിലുള്ള മുന്നാക്ക സമുദായക്കാരുടെ സംവരണത്തിന് ക്രീമിലെയര്‍ സാമ്പത്തിക സീലിംഗ് നിശ്ചയിക്കുന്നത് സംബന്ധിച്ച് ആവശ്യമായ ചട്ടം കൊണ്ടുവരും. അതിനായി കേരള സ്റ്റേറ്റ് സബോര്‍ഡിനേറ്റ് സര്‍വീസ് റൂളും കെഇആറും ഭേദഗതി വരുത്തിയാല്‍ മതിയാകും. ഇക്കാര്യത്തില്‍ അടിയന്തിര നടപടി സ്വീകരിക്കും.
കഴിഞ്ഞ യുഡിഎഫ് സര്‍ക്കാരിന്റെ കാലത്ത് 30 വിഭാഗങ്ങളെ ഒബിസിയില്‍ നിന്ന് ഒഇസിയിലേക്ക് മാറ്റിയ നടപടി പിന്‍വലിക്കില്ല. ഈ വിഭാഗത്തില്‍പ്പെട്ടവര്‍ക്ക് നിലവില്‍ ലഭിച്ച വിദ്യാഭ്യാസാനുകൂല്യങ്ങള്‍ റദ്ദാക്കില്ല. ഇവര്‍ക്ക് ആനുകൂല്യങ്ങള്‍ക്ക് 200 കോടി രൂപ അനുവദിച്ചിട്ടുണ്ട്. വിദ്യാഭ്യാസാനുകൂല്യത്തിന് കുടിശികയായി 189 കോടി രൂപ ഇവര്‍ക്ക് നല്‍കാനുണ്ടായിരുന്നതായും മന്ത്രി പറഞ്ഞു.