Web Desk

കാസർകോട്

November 07, 2020, 11:00 pm

കുരുക്കിലായി ലീഗ് നേതൃത്വം

Janayugom Online

മുസ്ലീംലീഗ് നേതാവും മഞ്ചേശ്വരം എം എൽ എയുമായ എം സി കമറുദീന്റെ അറസ്റ്റോടെ കുരുക്കിലായിരിക്കുകയാണ് ലീഗ് നേതൃത്വം. ജ്വല്ലറി നിക്ഷേപ തട്ടിപ്പുമായി ബന്ധപ്പെട്ട വിഷയം ഉയർന്നു വന്നപ്പോൾ മുതൽ മുസ്ലീം ലീഗ് നേതൃത്വം എംഎൽഎയെ സംരക്ഷിക്കുന്ന നിലപാടാണ് സ്വീകരിച്ച് വന്നത്.

പാർട്ടി അണികളും ലീഗനുഭാവ പ്രവാസി സംഘടനാ പ്രവർത്തകരുമാണ് തട്ടിപ്പിനിരയായവരിലേറെയും. ഇവരെ സംരക്ഷിക്കാനുള്ള യാതൊരു വിധശ്രമവും നേതൃത്വം കാണിച്ചില്ലെന്ന പരാതിയും ലീഗ് അണികൾക്കിടയിൽ നിന്നും ഉയർന്നു വന്നിരുന്നു. അവസാന ഘട്ടത്തിൽ ജ്വല്ലറിയുടെയും ഖമറുദ്ദീന്റെയും ആസ്തിവിറ്റ് ആറു മാസത്തിനകം ബാധ്യത തീർക്കുമെന്ന് സംസ്ഥാന നേതൃത്വം മലപ്പുറത്ത് വാർത്താസമ്മേളനത്തിൽ പറഞ്ഞിരുന്നു. ഇതെല്ലാം വിശ്വസിച്ച് നിന്നവരായിരുന്ന നിക്ഷേപകർ. എന്നാൽ നിക്ഷേപകരുടെ പണമെല്ലാം പലവഴിക്ക് ചിലവാക്കുകയും പണം കൊടുത്ത് വാങ്ങിയ ഭൂമി മറിച്ചു വിറ്റുവെന്നും വ്യക്തമായ സാഹചര്യത്തിലാണ് പ്രശ്ന പരിഹാര നീക്കം ലീഗ് നേതൃത്വം അവസാനിപ്പിച്ചത്.

ജ്വല്ലറി പൂട്ടിയപ്പോൾതന്നെ കമറുദ്ദീൻ ആസ്തികൾ വിറ്റു. കമ്പനി നിയമപ്രകാരം രജിസ്റ്റർചെയ്തതിനാൽ ബാക്കി ആസ്തികൾ ഡയറക്ടർമാർക്കോ മധ്യസ്ഥനോ വിൽക്കാനാവില്ല. കമ്പനി രേഖയിലെവിടെയും പൊതുജനങ്ങളിൽനിന്ന് നിക്ഷേപം സ്വീകരിച്ചതായും കാണിച്ചിട്ടില്ല. എന്നിട്ടും നിക്ഷേപകരുടെ കണ്ണിൽ പൊടിയിടാനാണ് കമറുദ്ദീനും ലീഗ് നേതൃത്വവും ഇതുവരെ ശ്രമിച്ചതെന്ന് പാർട്ടി പ്രവർത്തകരിൽ നിന്ന് തന്നെ ആക്ഷേപം ഉയർന്നിരുന്നു. ഫാഷൻ ഗോൾഡ് ജ്വല്ലറിയുടെ ഭൂമിക്കുപുറമെ വാഹനങ്ങളും വിറ്റതായി കണ്ടെത്തിയിരുന്നു. ജ്വല്ലറി എംഡി ടി കെ പൂക്കോയ തങ്ങൾ, മാനേജർ സൈനുൽ ആബിദ്, ടി കെ ഹിഷാം, നിസാം എന്നിവരുടെപേരിലുണ്ടായിരുന്ന ജ്വല്ലറിയുടെ ഒമ്പത് വാഹനങ്ങളാണ് വിറ്റത്.

11 വാഹനങ്ങളാണുണ്ടായിരുന്നത്. കാഞ്ഞങ്ങാട് ആർടിഒ കാസർകോട് മൊബൈൽ സ്ക്വാഡിന്റെ സഹായത്തോടെ നടത്തിയ അന്വേഷണത്തിലാണ് വാഹനങ്ങൾ വിറ്റത് കണ്ടെത്തിയത്. എംഡിയുടെ പേരിലുള്ള രണ്ട് വാഹനങ്ങൾ ലീഗ് ജില്ലാ നേതൃത്വത്തിന്റെ കൈവശമാണ്. ഇവയിൽ എം സി കമറുദ്ദീൻ എംഎൽഎ മുമ്പ് ഉപയോഗിച്ച ഇന്നോവ കാറും ഉൾപ്പെടുന്നു. അതേസമയം, തദ്ദേശ തെരഞ്ഞെടുപ്പ് പടിവാതിൽക്കൽ എത്തിനിൽക്കവെ തങ്ങളുടെ ഒരു പ്രമുഖ നേതാവ് തട്ടിപ്പ് കേസിൽ പ്രതിയായി അറസ്റ്റിലായത് യുഡിഎഫിന് വലിയ പ്രതിസന്ധി സൃഷ്ടിക്കും. സാമ്പത്തിക തട്ടിപ്പ് കേസിൽ ഒരു എംഎൽഎ കേരളത്തിൽ അറസ്റ്റിലാവുന്നത് ആദ്യമാണ് എന്നതും സംഭവത്തിന്റെ ഗൗരവം ഉയർത്തുന്നു. തദ്ദേശതെരഞ്ഞെടുപ്പ് ചൂടിലേക്ക് എത്തിനിൽക്കുന്ന ഘട്ടത്തിലുണ്ടായ അറസ്റ്റ് യുഡിഎഫിനും മുസ്ലിംലീഗിനും കനത്ത ആഘാതമാണ് സൃഷ്ടിക്കുക. അറസ്റ്റ് രാഷ്ട്രീയ പ്രേരിതമാണെന്നാണ് യു ഡി എഫ് നേതാക്കളുടെ പ്രതികരണം.

you may also like this video