മഹീന്ദ്രയുടെ ടിയുവി 300 പ്ലസ് വിപണിയില്‍

Web Desk

കൊച്ചി

Posted on June 22, 2018, 3:49 pm

പത്തുലക്ഷം രൂപയില്‍താഴെ വിലയ്ക്ക് യഥാര്‍ഥ എസ്‌യുവി എന്ന പ്രഖ്യാപനവുമായി മഹീന്ദ്ര ആന്‍ഡ് മഹീന്ദ്രയുടെ ടിയുവി 300 പ്ലസ് നിരത്തിലെത്തി. വിശാലമായ ഉള്‍ഭാഗവും സുഖകരമായ ഡ്രൈവിങും വാഗ്ദാനം ചെയ്യുന്ന 9 സീറ്റര്‍ ടിയുവി 300 പ്ലസിന് 9.66 ലക്ഷം രൂപയാണ് കൊച്ചിയിലെ എക്‌സ് ഷോറൂം വില.

4400 എം എം നീളവും 1835 എം എം വീതിയും 1812 എം എം ഉയരവും ഉള്ള യഥാര്‍ഥ
എസ്‌യുവിയായാണ് ടിയുവി 300 പ്ലസിന്റെ വരവ്. ഫ്രണ്ട് ഗ്രില്‍, അലോയ് വീല്‍ എന്നിവയും കാഴ്ചക്ക് ഗാംഭീര്യം നല്കുന്നു. ഇതിനൊടകം വിപണിയില്‍ കരുത്ത് തെളിയിച്ച 120 ബി എച്ച് പി, 2.2 ലിറ്റര്‍ എം ഹോക് എഞ്ചിനാണ് ടിയുവിയുടെ ശക്തി. 280 എന്‍ എം ടോര്‍കും ടിയുവി വാഗ്ദാനം ചെയ്യുന്നു. സ്‌കോര്‍പ്പിയോയില്‍നിന്ന് ഉള്‍ക്കൊണ്ട ചാസിസും അതിശക്തമായ സ്റ്റീല്‍ ബോഡിയും വാഹനത്തിന്റെ സുരക്ഷ കൂട്ടുന്നു.

യാത്ര കൂടുതല്‍ സുഖപ്രദമാക്കാന്‍ കുഷ്യന്‍ സസ്‌പെന്‍ഷന്‍ സാങ്കേതികവിദ്യയും
ഫൗക്‌സ് ലതര്‍സീറ്റുകളും ഉപകരിക്കും. ഇറ്റാലിയന്‍ ഡിസൈനര്‍മാരായ പിന്‍ഇന്‍ഫരിനയാണ് ഉള്‍ഭാഗത്തിന്റെ രൂപകല്പന. ഹൈവേയിലെ ഡ്രൈവിങ് ആസ്വാദനത്തിന്
സിക്‌സ് സ്പീഡ് ട്രാന്‍സ്മിഷനും ടിയുവി 300 പ്ലസിലുണ്ട്. പിന്നിലെ സീറ്റുകള്‍ മടക്കി
ലഗേജ് സ്‌പെയിസ് കൂട്ടാം.

ജിപിഎസ് നാവിഗേഷനോടുകൂടിയ 17.8 സെന്റീമീറ്ററിന്റെ ടച്ച് സ്‌ക്രീന്‍ ഇന്‍ഫോടെയിന്‍മെന്റിനായി നല്കിയിട്ടുണ്ട്. ബ്ലൂ സെന്‍സ് ആപ്, എകോ മോഡ്, മൈക്രോ ഹൈബ്രിഡ്, ബ്രേക് എനര്‍ജി റീജനറേഷന്‍, ഇന്റലി പാര്‍ക് റിവേഴ്‌സ് അസിസ്റ്റ് തുടങ്ങിയ സാങ്കേതിക സൗകര്യങ്ങളിലും പുതുമകള്‍ കൊണ്ടുവന്നിട്ടുണ്ട്. ആകര്‍ഷക വായ്പാ സൗകര്യവും
കമ്പനി ഒരുക്കി നല്‍കുന്നുണ്ട്. കുറഞ്ഞ ഡൗണ്‍ പെയ്‌മെന്റായ 11,999 രൂപ മുതലുള്ള ഫിനാന്‍സ് സൗകര്യവും കിലോമീറ്ററൊന്നിന് 31 പൈസ മുതല്‍ ആരംഭിക്കുന്ന എഎംസി സര്‍വ്വീസ് ക്രമീകരണങ്ങളും ലഭ്യമാണ്.

മജസ്റ്റിക് സില്‍വര്‍, ഗ്ലേഷിയര്‍ വൈറ്റ്, ബോള്‍ഡ് ബ്ലാക്, ഡൈനാമോ റെഡ്, മോള്‍ട്ടന്‍
ഓറഞ്ച് എന്നീ നിറങ്ങളില്‍ ലഭ്യമാണ്. പി 4, പി 6, പി 8 എന്നിങ്ങനെ മൂന്നു വേരിയന്‍റുകളാണുള്ളത്.

2015 ല്‍ അവതരിപ്പിച്ച ടിയുവി 300 ന്റെ 80,000 യൂണിറ്റുകള്‍ ഇതിനോടകം നിരത്തിലെത്തി. കൂടുതല്‍ സ്ഥലവും കരുത്തും എന്ന ഉപഭോക്താക്കളുടെ ആവശ്യം പരിഗണിച്ചാണ് ടിയുവി 300 പ്ലസ് വിപണിയിലിറക്കുന്നതെന്ന് കമ്പനി ഓട്ടോമോട്ടീവ് വിഭാഗം സെയില്‍സ് ആന്‍ഡ് മാര്‍ക്കറ്റിങ് ചീഫ് വീജേ റാം നക്ര പറഞ്ഞു.