Friday
06 Dec 2019

ദേശീയ വിദ്യാഭ്യാസ നയം അന്ന് സമഗ്രം ശാസ്ത്രീയം, ഇന്നോ?

By: Web Desk | Thursday 21 November 2019 10:10 PM IST


പി കെ സബിത്ത്

ഒരു ദേശത്തിന്റെ സമഗ്രവും ശാസ്ത്രീയവുമായ പരിഷ്കരണമാണ് വിദ്യാഭ്യാസ നയങ്ങൾ രൂപീകരിക്കുന്നതിന്റെ അടിസ്ഥാനം. ഗഹനമായ ചർച്ചയിലൂടെയും വിശകലനങ്ങളിലൂടെയും രൂപപ്പെടുന്ന നയങ്ങൾ ഹ്രസ്വകാലയളവിലേക്കുള്ള പരിവർത്തനമല്ല ലക്ഷ്യമാക്കുന്നത്. അതിവിദൂരഭാവിയിലേക്കുള്ള ചലനാത്മകമായ മുന്നേറ്റമാണ് അതിന്റെ കാതലായ ലക്ഷ്യം. സാമൂഹികവും സാംസ്കാരികവും സാമ്പത്തികവുമായ വിഭിന്ന മേഖലകളെ പരിഗണിച്ചുകൊണ്ട് ദേശത്തിന്റെ എല്ലാ വൈവിധ്യങ്ങളെയും സ്വാംശീകരിച്ച് രൂ­പീകരിക്കേണ്ട ഒന്നാണ് വിദ്യാഭ്യാസ നയം. ജനാധിപത്യ സംവിധാനത്തിൽ ഊന്നിയ ഭരണഘടന അനുശാസിക്കുന്ന മൂല്യങ്ങളുടെ പരിച്ഛേദമായിരിക്കണം ഒരു ഭരണഘടനാ സംവിധാനം രൂപം നൽകുന്ന വിദ്യാഭ്യാസ നയം. മറ്റ് രാജ്യങ്ങളിലേയോ ഇന്ത്യൻ സംസ്കാരവുമായി പുലബന്ധമില്ലാത്തതും എന്നാൽ ആഗോളതലത്തിൽ മികച്ചതെന്ന് മുദ്രകുത്തപ്പെട്ടതുമായ വിദ്യാഭ്യാസ സമീപനരീതികൾ അപ്പാടെ അനുകരിക്കുന്നത് ഒരിക്കലും ആശാസ്യമല്ല. ദേശത്തിന്റെ സ്വത്വത്തെ പരിഗണിക്കാതെ നയങ്ങൾ രൂപീകരിക്കുന്നത് തികച്ചും അശാസ്ത്രീയമായിരിക്കും. ആഗോളതലത്തിൽ ബദലായി മാറുന്ന വിധം ഇന്ത്യൻ സംസ്കാരത്തെയും ദേശസ്വത്വത്തെയും പ്രതിഫലിപ്പിക്കുന്നതായിരിക്കണം ന­മ്മുടെ ദേശീയ വിദ്യാഭ്യാസ നയം. ഒരു രാജ്യത്തിന്റെ ജനസ‍ഞ്ചയം മറ്റ് ദേശങ്ങളിൽ നിന്നും വ്യത്യസ്തത പുലർത്തുന്നതിന് ഭൗതികവും ജൈവികവുമായ ഒരുപാട് ഘടകങ്ങളുണ്ടെങ്കിലും സാം­സ്കാരികമായ സവിശേഷതകളിൽ അതീവ പ്രാധാന്യമുള്ള ഒന്നാണ് വിദ്യാഭ്യാസം. ദേശത്തിന്റെ സാംസ്കാരികസ്വത്വവും തലയെടുപ്പും പ്രതിഫലിപ്പിക്കുന്ന ഒന്നാണ് വിദ്യാഭ്യാസ നയവും അതുവഴി പുതുതലമുറ നേടിയെടുക്കുന്ന ആർജ്ജവവും.

വിദ്യാഭ്യാസ നയം സ്വത്വബോധം ഉണർത്തണം

ഇന്ത്യയെപ്പോലുള്ള ബഹുസ്വരമായ രാജ്യത്തിന് സ്വതന്ത്രവും സ്ഥായിയായതുമായ വിദ്യാഭ്യാസ നയം രൂപീകരിക്കുക ഏറെ ശ്രമകരമായ ഒന്നാണ്. ദീർഘകാലമായി നിലനിന്ന വൈദേശിക ആധിപത്യം കോളനിവൽക്കരിക്കപ്പെട്ട ജനതയുടെ മാനസികാവസ്ഥയിലേക്കും സാംസ്കാരികമായ മുരടിപ്പിലേക്കും നമ്മെ നയിച്ചിട്ടുണ്ട്. സ്വാതന്ത്ര്യപൂർവകാലത്ത് ഇന്ത്യ രൂപം നൽകിയ വിദ്യാഭ്യാസ കാഴ്ചപ്പാടുകൾ‍ക്കെല്ലാം വൈദേശിക സ്വാധീനം ഉണ്ടായിരുന്നു എന്നത് ഇതിന്റെ തെളിവാണ്. വ്യാവസായികവൽക്കരണത്തിന്റെ അനുബന്ധമായി രൂപംകൊണ്ട ഉല്പന്നങ്ങളായിരുന്നു അ­തെല്ലാം. സ്വാതന്ത്ര്യാനന്തരം രൂപംനൽകിയ വിദ്യാഭ്യാസ കമ്മിഷനുകളുടെയെല്ലാം ലക്ഷ്യം ഇതിൽ നിന്നും ഭിന്നമായിരുന്നു. മാനവിക സങ്കൽപങ്ങളിലേക്കും മൗലികമായ കാഴ്ചപ്പാടുകളിലേക്കും രാജ്യത്തെയും ജനതയെയും നയിക്കുകയായിരുന്നു ഇന്ത്യ സ്വതന്ത്രമായി രൂപം നൽകിയ വിദ്യാഭ്യാസ കമ്മിഷനുകളുടെ ആത്യന്തിക ലക്ഷ്യം. കൊളോണിയൽ സ്വാധീനത്തിൽ നിന്നുള്ള മോചനം എന്ന ചിന്തയ്ക്ക് അത് കൂടുതൽ കരുത്തേകി. തത്വചിന്തയിലേക്കും വൈയ്യക്തികമായ സമഗ്ര വികസന കാഴ്ചപ്പാടിലേക്കും നമ്മുടെ വിദ്യാഭ്യാസ രംഗത്തെ നയിച്ച ഘടകം പാശ്ചാത്യ സംസ്കാരത്തിന്റെ സ്വാധീനം പാടെ തുടച്ചുനീക്കുകയായിരുന്നു. വാസ്തവത്തിൽ ദീർഘകാലം കോളനിവൽക്കരിക്കപ്പെട്ട ഒരു രാജ്യത്തെ സംബന്ധിച്ചിടത്തോളം അതിൽ നിന്നുള്ള മോചനം പതിറ്റാണ്ടുകൾ കൊണ്ടുമാത്രം രൂപപ്പെട്ടുവരുന്ന ക്രിയാത്മകമായ പരിവർത്തനമാണ്.

സ്വതന്ത്രഭാരതത്തിലെ വിദ്യാഭ്യാസ സമീപനങ്ങൾ

സ്വാതന്ത്ര്യാനന്തരം ഇന്ത്യ കണ്ട വിദ്യാഭ്യാസ കമ്മിഷനുകൾ ഇന്ത്യയുടെ ആന്തരിക വൈവിധ്യത്തെ ഉൾക്കൊള്ളുന്നു എന്ന കാര്യം പ്രകടമാണ്. ബ്രിട്ടീഷ് ആധിപത്യം ഉണ്ടാക്കിയ കൊളോണിയൽ പശ്ചാത്തലത്തിൽ നിന്നുള്ള മോചനം കമ്മിഷനുകളുടെ പ്രാഥമിക ലക്ഷ്യമായിരുന്നു. ഡോ. എസ് രാധാകൃഷ്ണൻ ചെയർമാനായി 1948 ൽ ആയിരുന്നു യൂണിവേഴ്സിറ്റി കമ്മിഷനു രൂപംനൽകിയത്. പൗരസ്ത്യവും പാശ്ചാത്യവുമായ വിവിധ ഘടകങ്ങളെ സമന്വയിപ്പിച്ചു കൊണ്ടുള്ളതായിരുന്നു ഇത്. ഒറ്റയടിക്ക് പാശ്ചാത്യ സംസ്കാരത്തെ തുടച്ചുനീക്കാൻ സാധിക്കില്ല എന്ന വാസ്തവത്തെ തിരിച്ചറിഞ്ഞുകൊണ്ടുതന്നെയാണ് ഇത്തരമൊരു സമീപനം സ്വീകരിച്ചത്. എന്നാൽ ഇവിടെയെല്ലാം ഭാരതീയ സാംസ്കാരിക സ്വത്വത്തിന് വലിയ പ്രാധാന്യം കൊടുത്തു എന്നത് ശ്രദ്ധേയമായ ഒരു വസ്തുതയാണ്. 1952 ൽ ആണ് മദ്രാസ് യൂണിവേഴ്സിറ്റിയുടെ വൈസ്ചാൻസലറായിരുന്ന ഡോ. എ ലക്ഷ്മണ സ്വാമി മുതലിയാർ അധ്യക്ഷനായി സെക്കന്ററി വിദ്യാഭ്യാസ കമ്മിഷനു രൂപം നൽകിയത്. വിദ്യാർഥി സമൂഹത്തിന്റെ സമഗ്രമായ വികസനമായിരുന്നു ഈ കമ്മിഷൻ മുന്നോട്ടുവച്ചതും. പാഠപുസ്തകത്തിനപ്പുറമുള്ള വിജ്ഞാനത്തിന് മുതലിയാർ കമ്മീഷൻ പ്രാധാന്യം കൊടുത്തു. 1964 ൽ ആണ് യുജിസി ചെയർമാനായിരുന്ന ഡോ. ഡി എസ് കോത്താരി അധ്യക്ഷനായുള്ള കമ്മിൻ നിലവിൽ വന്നത്. വിദ്യാഭ്യാസ മേഖലയെക്കുറിച്ച് സമഗ്രമായി പഠിച്ചശേഷമാണ് 1966 ൽ കമ്മിഷൻ സർക്കാരിന് റിപ്പോർട്ട് സമർപ്പിച്ചത്. ഇന്ത്യയുടെ ഭാവിഭാഗധേയം നിർണയിക്കുന്നത് ഇവിടുത്തെ ക്ലാസ് മുറികളിൽവച്ചാണ് എന്ന വാചകത്തോടെ ആരംഭിക്കുന്ന ഇത് വിദ്യാഭ്യാസ ചരിത്രത്തിലെ നാഴികക്കല്ലായിരുന്നു. വിദ്യാഭ്യാസത്തെ സാമൂഹിക ജീവിതവുമായി ബന്ധപ്പെടുത്തുന്നതിന് കോത്താരി കമ്മിഷൻ പ്രാധാന്യം നൽകി. സാമൂഹികവും സാമ്പത്തികവും സാംസ്കാരികവുമായ പരിവർത്തനത്തിനുള്ള ശക്തമായ ഉപാധിയാക്കി വിദ്യാഭ്യാസത്തെ മാറ്റിയെടുക്കുന്നതിനുള്ള നിർദ്ദേശമാണ് കോത്താരി കമ്മിഷൻ മുന്നോട്ടുവച്ചത്. 1986 ൽ ആണ് ഇന്ത്യയിൽ ഒരു ദേശീയ വിദ്യാഭ്യാസ നയം രൂപം കൊള്ളുന്നത്. ഇരുപത്തിഒന്നാം നൂറ്റാണ്ടിലേക്കുള്ള ഇന്ത്യൻ ജനതയുടെ പ്രയാണത്തെ ശക്തിപ്പെടുത്തുന്നതായിരുന്നു ഇത്. വിദ്യാഭ്യാസരംഗത്ത് സമഗ്രമായ മാറ്റം ഈ നയം നടപ്പിലാക്കുന്നതിലൂടെ പ്രകടമായി. ഓപ്പറേഷൻ ബ്ലാക്ക് ബോർഡൊക്കെ നടപ്പിലാക്കിയത് ഈ നയത്തിന്റെ ഭാഗമായിട്ടായിരുന്നു. ഈ നയത്തെ പുനരവലോകനം ചെയ്യാനാണ് 1990 ൽ ആചാര്യ രാമമൂർത്തി അധ്യക്ഷനായുള്ള കമ്മീഷനെ നിയമിച്ചത്. ഈ കമ്മിഷൻ നയത്തിൽ വിവിധ പരിഷ്കാരങ്ങൾ നിർദേശിച്ചു. അസന്തുലിതാവസ്ഥ ഇല്ലാതാക്കുന്നതിനും സ്ത്രീവിദ്യാഭ്യാസത്തിന്റെ പ്രാധാന്യവും പരീക്ഷാ പരിഷ്കരണവും പ്രാദേശിക ഭാഷകളെ ബോധനമാധ്യമമാക്കുന്നതിനുള്ള നിർദേശങ്ങളും രാമമൂർത്തി കമ്മിഷൻ മുന്നോട്ടുവച്ചു. ഓരോ കാലഘട്ടത്തിലും രൂ­പം നൽകിയ വിദ്യാഭ്യാസ കമ്മീഷനുകളെ സൂക്ഷ്മമായി വിശകലനം ചെയ്താൽ ഒരു കാര്യം വ്യക്തമാകും. ബോധത്തിലും അബോധത്തിലുമുള്ള പാശ്ചാത്യ സംസ്കാരത്തെ ക്രമേണ ലഘൂകരിച്ച് ഇന്ത്യൻ സംസ്കാരത്തെ സ്വതന്ത്രമായ അസ്തിത്വത്തിലേക്ക് രൂപപ്പെടുത്തുകയായിരുന്നു ഇവയുടെയെല്ലാം ആത്യന്തിക ലക്ഷ്യം. നമ്മുടെ വിദ്യാഭ്യാസ രംഗത്ത് ശക്തമായ അടിത്തറയും നിലപാടും ഉണ്ടാക്കിയെടുക്കാൻ സ്വതന്ത്രഭാരതത്തിലെ വിവിധ വിദ്യാഭ്യാസ കമ്മീഷനുകൾ‍ക്ക് സാധിച്ചിട്ടുണ്ട്.

വൈരുധ്യങ്ങൾ നിറഞ്ഞ ദേശീയ വിദ്യാഭ്യാസ നയം

ബൗദ്ധികവും സാംസ്കാരികവും സാമ്പത്തികവുമായ സ്വതന്ത്രാസ്തിത്വത്തിലേക്ക് രാജ്യത്തെ നയിക്കുകയാണ് വിദ്യാഭ്യാസ നയം കൊണ്ട് ഉദ്ദേശിക്കുന്നത്. കേന്ദ്ര സർക്കാർ ദേശീയ വിദ്യാഭ്യാസവുമായി ബന്ധപ്പെട്ട് ഒരു കരട് അവതരിപ്പിച്ച സാഹചര്യത്തിൽ ഇന്ത്യയുടെ ഭൂതകാല വിദ്യാഭ്യാസ സമീപനങ്ങളെക്കൂടി നാം അടുത്തറിയേണ്ടതുണ്ട്. അതുകൊണ്ടാണ് സുപ്രധാന വിദ്യാഭ്യാസ കമ്മീഷനുകളെയും അവ ഊന്നൽ നൽകിയ മേഖലകളെയും ഇവിടെ പരാമർശിച്ചത്. ദേശീയ വിദ്യാഭ്യാസ നയം 2019നെ ചർച്ച ചെയ്യുമ്പോൾ സ്വാതന്ത്ര്യാനന്തരമുള്ള വിദ്യാഭ്യാസ പരിഷ്കാരങ്ങളുടെ തുടർച്ച എന്ന നിലയിലാണ് പരിഗണിക്കേണ്ടത്. എന്നാൽ സ്വാതന്ത്ര്യാനന്തരമുള്ള വിദ്യാഭ്യാസ രംഗത്തിന്റെ ക്രമാനുഗതമായ വളർച്ച ഇവിടെ കാണാൻ കഴിയുന്നില്ല എന്നതാണ് വാസ്തവം.

ഐഎസ്ആർഒ മുൻ മേധാവി കെ കസ്തൂരിരംഗനാണ് ദേശീയ വിദ്യാഭ്യാസ കരട്നയം രൂപപ്പെടുത്തിയ സമിതി അധ്യക്ഷൻ. വസുധ കമ്മത്ത്- മുൻ വിസി എസ്എൻഡിടി വിമൻസ് യൂണിവേഴ്സിറ്റി മുംബൈ, മ‍ഞ്ജുൾ ഭാർഗവ- ആർ ബ്രൻഡൻ ഫ്രഡ്, പ്രൊഫസർ ഓഫ് മാത്തമാറ്റിക്സ്, പ്രിൻസ്റ്റൻ സർവകലാശാല, യുഎസ്എ, രാംശങ്കർ കുരീൽ, മുൻ സ്ഥാപക വി സി ബാബാസാഹെബ്, അംബേദ്കർ യൂണിവേഴ്സിറ്റി ഓഫ് സോഷ്യൽ സയൻസ്, മധ്യപ്രദേശ്, ടി വി കുട്ടിമണി, വി സി ഇന്ദിരാഗാന്ധി നാഷണൽ ട്രൈബൽ യൂണിവേഴ്സിറ്റി, മധ്യപ്രദേശ്; കൃഷ്ണമോഹൻ ത്രിപാഠി ഡയറക്ടർ ഓഫ് എജ്യൂക്കേഷൻ (സെക്കണ്ടറി) യുപി; മഷർ ആസിഫ് പ്രൊഫസർ സെനറ്റർ ഫോർ പേർഷ്യൻ ആന്റ് സെൻട്രൽ ഏഷ്യൻ സ്റ്റഡീസ് സ്കൂൾ ഓഫ് ലാംഗ്വേജ് ആന്റ് കൾച്ചർ സ്റ്റഡീസ് ജെഎൻയു ന്യൂഡൽഹി, എം കെ ശ്രീധർ മുൻ മെമ്പർ സെക്രട്ടറി കർണാടക നോളജ് കമ്മീഷൻ ബംഗളൂരു, കർണാടക തുടങ്ങിവരാണ് അംഗങ്ങൾ. എല്ലാ അംഗങ്ങളും വിദ്യാഭ്യാസ മേഖലയുമായി ബന്ധപ്പെട്ട് പ്രവർത്തിക്കുന്നവരാണ്. എങ്കിലും ഇത്തരമൊരു കമ്മിറ്റി രൂപീകരണത്തിന്റെയും അംഗങ്ങളുടെ തെരഞ്ഞെടുപ്പിലെയും മാനദണ്ഡം എന്താണെന്ന് വ്യക്തമാക്കിയിട്ടില്ല. നയം മ­ന്നോട്ടുവയ്ക്കുന്ന ദർശനത്തെ ആരംഭത്തിൽ തന്നെ പരാമർശിക്കുന്നുണ്ട്. നയത്തെ സമഗ്രമായ വിശകലനത്തിന് വിധേയമാക്കമ്പോൾ ഈ ദർശനത്തിൽ തന്നെ വൈരുധ്യം നിലനിൽക്കുന്നതായി കണ്ടെത്താം. “സാർവത്രിക വിദ്യാഭ്യാസ ഉറപ്പാക്കുന്നതും നമ്മുടെ രാജ്യത്തെ ചലനാത്മകവിജ്ഞാന സമൂഹമാക്കി പരിപോഷിപ്പിക്കുന്നതും ഭാരത കേന്ദ്രീകൃതമാണെന്നും പരാമർശിക്കുക മാത്രമാണ് ചെയ്യുന്നത്. ഭാരതീയ ദർശനങ്ങളെയോ തത്വചിന്താപരമായ സത്തയെയും ഒന്നുംതന്നെ ഇവിടെ പരിഗണിക്കുന്നില്ല. കരട് തയാറാക്കുന്നതിനും അനുബന്ധമായി നടത്തുന്ന വിഭിന്ന പ്രവർത്തനങ്ങൾക്കും വേണ്ടി വിവര വിനിമയ കാലത്തെ എല്ലാ സാധ്യതകളെയും നന്നായി ഉപയോഗിക്കുന്നുണ്ട്.

(അവസാനിക്കുന്നില്ല)