സംസ്ഥാനത്ത് എന്ന് ആർക്കും തന്നെ കോവിഡ് 19 സ്ഥിരീകരിച്ചിട്ടില്ലെന്ന് ആരോഗ്യ വകുപ്പ് മന്ത്രി കെ കെ ശൈലജ ടീച്ചർ അറിയിച്ചു. 9 പേരാണ് ഇന്ന് രോഗമുക്തി നേടിയത്. കണ്ണൂര്‍, കാസര്‍ഗോഡ് ജില്ലയിലെ 4 പേരുടെ വീതവും എറണാകുളം ജില്ലയില്‍ നിന്നുള്ള ഒരാളുടെയും പരിശോധനാഫലമാണ് ഇന്ന് നെഗറ്റീവ് ആയത്. കോവിഡ് വ്യാപനത്തിന് ശേഷം രോഗികളില്ലാത്ത ആദ്യദിനമാണ് ഇന്ന്. എറണാകുളം, ആലപ്പുഴ, തൃശൂർ, വയനാട്, ജില്ലകൾ രോഗമുക്തമായി. സംസ്ഥാനത്ത് നിലവിൽ 102 പേരാണ് ചികിൽസയിലുള്ളത്.

സംസ്ഥാനത്ത് പുതുതായി 10 ഹോട്സ്പോട്ടുകള്‍ കൂടി ഉൾപ്പെടുത്തിയിട്ടുണ്ട് . തിരുവനന്തപുരത്ത് എട്ടും കാസര്‍കോട്, മലപ്പുറം ജില്ലകളില്‍ ഓരോന്നും. തിരുവനന്തപുരം: കുളത്തൂര്‍, പാറശാല, അതിയന്നൂര്‍, കാരോട്, വെള്ളറട, അമ്പൂരി, ബാലരാമപുരം, കുന്നത്തുകാല്‍. കാസര്‍കോട് ഉദുമ, മലപ്പുറത്ത് മാറഞ്ചേരി എന്നിവയും ഹോട്സ്പോട്ടുകള്‍.

സംസ്ഥാനത്തെ വിവിധ ജില്ലകളിലായി 21,499 പേര്‍ നിരീക്ഷണത്തിലാണ്. ഇവരില്‍ 21,067 പേര്‍ വീടുകളിലും 432 പേര്‍ ആശുപത്രികളിലും നിരീക്ഷണത്തിലാണ്. 106 പേരെയാണ് ഇന്ന് ആശുപത്രിയില്‍ പ്രവേശിപ്പിച്ചത്. രോഗലക്ഷണങ്ങള്‍ ഉള്ള 27,150 വ്യക്തികളുടെ സാമ്പിള്‍ പരിശോധനയ്ക്ക് അയച്ചിട്ടുണ്ട്. ഇതില്‍ ലഭ്യമായ 26,225 സാമ്പിളുകളുടെ പരിശോധനാഫലം നെഗറ്റിവ് ആണ്.

ENGLISH SUMMARY: no corona case reported today in Kerala