ബിജെപിയുടെ ലക്ഷ്യത്തെ ജനങ്ങൾ പരാജപ്പെടുത്തി: ബിനോയ് വിശ്വം

ഗോഹത്തി: പൗരത്വ നിയമത്തിലൂടെ  ബി ജെ പി ലക്ഷ്യമിട്ടത് മതാടിസ്ഥാനത്തിൽ രാജ്യത്തെ ഭിന്നിപ്പിക്കാനാണെന്നും, ജനങ്ങൾ ആ നീക്കത്തെ പരാജയപ്പെടുത്തിയെന്നും സി പി ഐ ദേശീയ സെക്രട്ടറി ബിനോയ് വിശ്വം എം പി പ്രസ്താവിച്ചു. ഒരു ഭാഗത്ത് ബി ജെ പിയും മറു ഭാഗത്ത് ഇന്ത്യൻ ജനത ആകെയും എന്ന സ്ഥിതി യിലേക്ക് സ്ഥിതിഗതികൾ വളരുകയാണെന്ന് ഗോഹതിപ്രസ് ക്ലബ്ബിലെ മീറ്റ് ദി പ്രസ് പരിപാടിയിൽ അദ്ദേഹം പറഞ്ഞു. ഈ പ്രക്ഷോഭ ത്തിൽ വിദ്യാർത്ഥികൾ വഹിക്കുന്ന പങ്ക് ആവേശകരമാണ്. ആസാമിലും മണിപ്പൂരിലും മറ്റും കരിനിയമങ്ങൾ കൊണ്ട് പ്രക്ഷോഭത്തെ തകർക്കാൻ സർക്കാർ ശ്രമിക്കുന്നു.സി പി ഐ മണിപ്പൂർ സംസ്ഥാന സെക്രട്ടറി സൊതിൻ കുമാർ മൂന്നാഴ്ചയായി തടവിലാണ്‌.ആസാമിൽ ഡിബ്രു ഗഢ് ജില്ലാ സെക്രട്ടറി ദിഗന്ത ഫുക്കാനും ആഴ്ചകളായി ജയിലിലടക്കപ്പെട്ടിരിക്കുന്നു. ഇത്തരം നടപടികൾക്ക് മുന്നിൽ ഇന്ത്യയെ രക്ഷിക്കാനുള്ള ജനകീയ പോരാട്ടം മുട്ടുമടക്കില്ലെന്ന് ബിനോയ് വിശ്വം പറഞ്ഞു.

ജനുവരി 8 ന്റെ പണിമുടക്ക് ഇന്ത്യയിൽ നടന്നുവരുന്ന പ്രക്ഷോഭങ്ങൾക്ക് പുതിയ മാനം നൽകും. തൊഴിലാളി വർഗത്തിന് ഫലപ്രദമായി ഇടപെടാൻ കഴിഞ്ഞാൽ അത് രാഷ്ടീയ ഗതിയെത്തന്നെ മാറ്റിമറിക്കും.

എൻ ആർ സി നടപ്പിലാക്കുമെന്ന് 9 തവണ പാർലമെൻറിൽ പറഞ്ഞ അമിത് ഷാ ഇടക്കിടെ നിലപാട് മാറ്റുന്നത് രാജ്യം കാണുന്നുണ്ട്. ഇത്തരം മലക്കംമറിച്ചിലുകൾ സത്യം അറിയാൻ ഉള്ള പാർലമെൻറിന്റെയും ജനങ്ങളുടെയും അവകാശത്തെ ചോദ്യം ചെയ്യലാണെന്നും ബിനോയ് വിശ്വം വ്യക്തമാക്കി.

Eng­lish sum­ma­ry: peo­ple defeat­ed Bjp’s aim Binoy viswam