ഇതിലും ഭേദം ജനങ്ങളെ ഒറ്റയടിക്ക്​ കൊല്ലുന്നതല്ലേ? രൂക്ഷ വിമർശനവുമായി സുപ്രിംകോടതി

Web Desk
Posted on November 25, 2019, 8:01 pm

ന്യൂഡൽഹി: തലസ്ഥാന നഗരത്തിൽ രൂക്ഷമായി തുടരുന്ന വായുമലിനീകരണം തടയാൻ നടപടിയെടുക്കാത്തതിൽ രൂക്ഷ വിമർശനവുമായി സുപ്രീംകോടതി. ജനങ്ങളെ എന്തിനാണ്​ ഗ്യാസ് ചേംബറിൽ ജീവിക്കാൻ അനുവദിക്കുന്നത്​. ഇതിലും ഭേദം 15 ബാഗ്​ സ്​ഫോടക വസ്​തുക്കൾ ഉപയോഗിച്ച്​ ഒറ്റയടിക്ക്​ കൊല്ലുന്നതല്ലേയെന്നും കോടതി സോളിസിറ്റർ ജനറലിനോട് ചോദിച്ചു. ജസ്​റ്റിസ്​ അരുൺ മിശ്ര, ജസ്​റ്റിസ്​ ദീപക്​ ഗുപ്​ത എന്നിവരടങ്ങിയ ബെഞ്ചാണ്​ ഹരജി​ പരിഗണിച്ചത്​.

‘വായുമലിനീകരണം മൂലം ദശലക്ഷകണക്കിന്​ ആളുകളുടെ ആയുസു കുറയുകയാണ്​. ജനങ്ങളെ ഇത്തരത്തിലാണോ പരിഗണിക്കേണ്ടത്​. അവർ ശ്വാസംമുട്ടി മരിച്ചോ​ട്ടേ എന്നാണോ? പൗര​ൻമാരുടെ ആയുസ്​ കുറയ്ക്കാൻ ഒരു സർക്കാരിനെയും അനുവദിക്കില്ല’ ‑ജസ്​റ്റിസ്​ അരുൺ മിശ്ര വിമർശിച്ചു. പരസ്പരം കുറ്റപ്പെടുത്തുന്ന നടപടികൾ ജനം എന്തിന് സഹിക്കണമെന്നും സോളിസിറ്റർ ജനറൽ തുഷാർ മേത്തയോട് കോടതി ചോദിച്ചു.

പാടങ്ങളി​ലെ വൈക്കോൽ അവശിഷ്​ടങ്ങൾ കത്തിക്കുന്നതിനെതിരെ പഞ്ചാബ്​ സർക്കാർ​ എന്ത്​ നടപടിയാണ്​ എടുത്തതെന്ന്​ ചീഫ്​ സെക്രട്ടറിയോട്​ കോടതി ചോദിച്ചു. നേരത്തെയുള്ള കോടതി ഉത്തരവിന്​ ശേഷം എന്ത്​ നടപടിയെടുത്തു. പഞ്ചാബ്​ കൃത്യമായ നടപടികളെടുക്കാത്തതിനാൽ ഡൽഹിയിലെ ജനങ്ങൾ പുക ശ്വസിച്ച്​ മരിക്കുകയും കാൻസർ അനുഭവിക്കുകയും ചെയ്യുന്നുവെന്നും കോടതി വിമർശിച്ചു.

ഹരിയാന ചീഫ്​ സെക്രട്ടറിയെയും കോടതി വിമർശിച്ചു. താഴെതട്ടിലുള്ളത്​ മുതൽ എല്ലാ സ്ഥാപനങ്ങൾക്കും വൻ പിഴ ഈടാക്കും. വായുമലിനീകരണവും പുകയും നിയന്ത്രിക്കാൻ 2018 ജനുവരിയിൽ സമിതി രൂപീകരിച്ചിട്ടും ഒരു നടപടിയും ഇതുവരെ കൈകൊണ്ടില്ലെന്നും സുപ്രീംകോടതി ചൂണ്ടിക്കാട്ടി. മാലിന്യങ്ങൾ കത്തിക്കരുതെന്ന്​ സുപ്രീംകോടതി ഉത്തരവ്​ ഉണ്ടായിട്ടും എന്തുകൊണ്ട്​ അത്​ പാലിക്കുന്നി​ല്ല. മലിനീകരണപ്രശ്​നങ്ങളെ രാഷ്​ട്രീയവത്​കരിക്കരുതെന്നും കോടതി പറഞ്ഞു.