29 March 2024, Friday

വൈദ്യുതി ലൈന്‍ പൊട്ടിവീണു; ട്രെയിന്‍ ട്രാക്കില്‍ കുടുങ്ങി

Janayugom Webdesk
ഏറ്റുമാനൂർ
February 12, 2022 10:41 pm

ഓടികൊണ്ടിരുന്ന ട്രെയിനിന് മുകളിലേക്ക് വൈദ്യുതി കമ്പി പൊട്ടിവീണു. ഏറ്റുമാനൂരിനും കുറുപ്പന്തറയ്ക്കും ഇടയിൽ കോതനല്ലൂർ റയിൽവേ ഗേറ്റിന് സമീപം വൈകിട്ട് നാലോടെയാണ് സംഭവം.

ട്രെയിനിലേക്ക് വൈദ്യുതി വിതരണം ചെയ്യുന്നതിന് പാളത്തിന് മുകളിലൂടെ സ്ഥാപിച്ചിരിക്കുന്ന കമ്പിയാണ് തിരുവനന്തപുരത്തു നിന്നു ന്യൂഡൽഹിയ്ക്ക് പോകുകയായിരുന്ന കേരളാ എക്സ്പ്രസിന്റെ മുകളിലേക്ക് പൊട്ടിവീണത്. അപകടത്തെ തുടര്‍ന്ന് ട്രാക്കില്‍ കുടുങ്ങിയ ട്രെയിന്‍ രണ്ടര മണിക്കൂറിന് ശേഷമാണ് യാത്ര തുടര്‍ന്നത്. എന്‍ജിനെ ട്രാക്ഷൻ ലൈനുമായി ബന്ധിപ്പിക്കുന്ന പാൻഡോഗ്രാഫ് ആണ് വലിയ ശബ്ദത്തോടെ തകർന്ന് വീണത്.

പൊട്ടിവീണ ഉടൻ വൈദ്യുതി പ്രവാഹം ഓട്ടോമാറ്റിക് ആയി നിലച്ചതിനാൽ വൻ ദുരന്തം ഒഴിവായി. തുടർന്ന് കൊച്ചിയിൽ നിന്ന് ഡീസൽ എന്‍ജിൻ കൊണ്ടുവന്നാണ് യാത്ര പുനരാരംഭിച്ചത്. റയിൽവേ അധികൃതരും കടുത്തുരുത്തിയിൽ നിന്നു പൊലീസും അഗ്നിസുരക്ഷാസേനയും സ്ഥലത്തെത്തിയിരുന്നു.

സംഭവത്തെ തുടർന്ന് കോട്ടയം വഴിയുള്ള ഗതാഗതം ഏറെ നേരം തടസപ്പെട്ടു. മണിക്കൂറുകൾ നീണ്ട ശ്രമത്തിനൊടുവിലാണ് ഗതാഗതം സാധാരണ നിലയിലായത്.

നിലവിൽ ഏറ്റുമാനൂരിനും കുറുപ്പന്തറക്കും ഇടയിൽ ഡീസൽ എന്‍ജിൻ ഉപയോഗിച്ചാണ് ട്രെയിനുകൾ ഓടുന്നത്. മഴ പണികൾക്ക് തടസമാകുന്നുണ്ടെങ്കിലും ഇന്ന് രാവിലെ യോടെ തകരാർ പരിഹരിക്കാൻ കഴിയും എന്നാണ് പ്രതീക്ഷിക്കുന്നതെന്ന് റയിൽവേ അധികൃതർ വ്യക്തമാക്കി.

പുനലൂർ ‑ഗുരുവായൂർ ട്രെയിൻ ആലപ്പുഴ വഴി സർവീസ് നടത്തും. തിരുവനന്തപുരം ‑ചെന്നൈ മെയിൽ, കൊച്ചുവേളി ‑പാലക്കാട് ഹംസഫർ എക്സ്പ്രസ്, എന്നിവ ഒരു മണിക്കൂർ വൈകിയാണ് യാത്ര തുടങ്ങിയത്. സംഭവം സംബന്ധിച്ച് അന്വേഷണം നടത്തുമെന്ന് അധികൃതർ അറിയിച്ചു.

Eng­lish Sum­ma­ry: Pow­er line breaks; The train got stuck on the track

You may like this video also

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.

Comments are closed.