Web Desk

ന്യൂഡൽഹി

April 07, 2020, 8:40 am

മുഴുവൻ രാഷ്ട്രീയ പാർട്ടി നേതാക്കളുമായി പ്രധാനമന്ത്രി ആശയവിനിമയം നടത്തണം: ഡി രാജ

Janayugom Online

കോവിഡ് 19 നെ നേരിടുന്നതുമായി ബന്ധപ്പെട്ട് അംഗീകാരമുള്ള മുഴുവൻ ദേശീയ‑സംസ്ഥാന രാഷ്ട്രീയ പാർട്ടി നേതാക്കളുമായി ആശയവിനിമയം നടത്തണമെന്ന് പ്രധാനമന്ത്രിക്ക് അയച്ച കത്തിൽ സിപിഐ ജനറൽ സെക്രട്ടറി ഡി രാജ ആവശ്യപ്പെട്ടു.

ഇന്ന് നമ്മുടെ രാജ്യം വലിയ തോതിലുള്ള ആരോഗ്യ ദുരന്തത്തെ അഭിമുഖീകരിക്കുകയാണ്. കോവിഡ് മഹാമാരിയെ ജനങ്ങൾ ഒറ്റക്കെട്ടായി നേരിടേണ്ടതുണ്ട്. സർക്കാരും രാഷ്ട്രീയ പാർട്ടികളുമുൾപ്പെടെ രാജ്യത്തിന്റെ രാഷ്ട്രീയ, സാമ്പത്തിക, സാമൂഹിക ഗതി രൂപപ്പെടുത്തുന്നതിൽ പ്രാധാന്യമുള്ള എല്ലാവരും ഒത്തുചേർന്ന് ദുരന്തം നേരിടുന്നതിനുള്ള എല്ലാ ശ്രമങ്ങളും നടത്തണം. ഇതിന്റെ ഭാഗമായി പ്രധാനമന്ത്രി വിവിധ സംസ്ഥാന മുഖ്യമന്ത്രിമാരുമായും മറ്റു വിദഗ്ധരുമായും ആശയവിനിമയം നടത്തുകയാണ്.

ഇപ്പോൾ പാർലമെന്റിലെ രാഷ്ട്രീയ പാർട്ടികളുടെ നേതാക്കളുമായി ആശയവിനിമയം നടത്താൻ തീരുമാനിച്ചിരിക്കുകയാണ്. എന്നാൽ സാങ്കേതികമായ കാരണങ്ങളാൽ ചില പ്രധാന പാർട്ടികൾ അതിൽ നിന്ന് ഒഴിവാക്കപ്പെടുന്നു. യഥാർത്ഥത്തിൽ ഈ ആശയവിനിമയം കഴിഞ്ഞ പാർലമെന്റ് സമ്മേളനത്തിന്റെ അവസാന ദിവസങ്ങളിലോ അവസാനിച്ചതിന്റെ തൊട്ടുപിന്നാലെയോ നടത്തേണ്ടതായിരുന്നു. എ­ന്നിരുന്നാലും എല്ലാ കക്ഷിനേതാക്കളുമായും ആശയവിനിമയം നടത്തേണ്ടതുണ്ടെന്ന് കത്തിൽ രാജ അഭ്യർത്ഥിച്ചു.

Eng­lish Sum­ma­ry: D Raja says Prime Min­is­ter should com­mu­ni­cate with entire polit­i­cal par­ty leaders

YOU MAY ALSO LIKE THIS VIDEO