Friday
19 Jul 2019

അഗാധമാകുന്ന സാമ്പത്തിക തളര്‍ച്ച

By: Web Desk | Saturday 15 June 2019 10:34 PM IST


ഇക്കഴിഞ്ഞ സാമ്പത്തിക അവലോകന യോഗത്തില്‍ പ്രതീക്ഷിച്ചതുപോലെ ആര്‍ബിഐ പലിശ നിരക്കുകള്‍ വീണ്ടും വെട്ടിക്കുറച്ചു. പലിശ നിരക്ക് 0.25 ശതമാനം കുറച്ച് 5.75 ശതമാനമാക്കി. ഫെബ്രുവരി മാസത്തിന് ശേഷം മൂന്നാം തവണയാണ് ആര്‍ബിഐ പലിശ നിരക്ക് കുറയ്ക്കുന്നത്. പണപ്പെരുപ്പത്തെ മാത്രം ആധാരമാക്കിയല്ല പലിശ നിരക്ക് കുറയ്ക്കുന്നതെന്ന് കഴിഞ്ഞ രണ്ട് യോഗങ്ങളിലും ആര്‍ബിഐ വ്യക്തമാക്കിയിരുന്നു. സാമ്പത്തിക വര്‍ഷത്തിന്റെ നാലാം പാദത്തിലും മൊത്തം ആഭ്യന്തര ഉല്‍പ്പാദനത്തില്‍ ( ജിഡിപി) കുറവ് വന്നിട്ടും പലിശ നിരക്ക് കുറച്ച ആര്‍ബിഐ നടപടിയില്‍ അതിശയോക്തിയില്ല. തൊഴിലില്ലായ്മ നിരക്കിലും ഗണ്യമായ വര്‍ധനയാണ് ഉണ്ടായത്. ജിഡിപി അഞ്ച് വര്‍ഷത്തിനിടെയുള്ള ഏറ്റവും കുറഞ്ഞ നിരക്കാണ് സാമ്പത്തിക വര്‍ഷത്തിന്റെ നാലാം പാദത്തില്‍ രേഖപ്പെടുത്തിയത്. ജനുവരി- മാര്‍ച്ച് മാസങ്ങളിലെ പാദത്തില്‍ ജിഡിപി 5.8 ശതമാനമായാണ് കുറഞ്ഞത്. വാര്‍ഷിക വളര്‍ച്ചാ നിരക്ക് 6.8 ശതമാനമായി കുറഞ്ഞു. രാജ്യത്തെ തൊഴിലില്ലായ്മാ നിരക്ക് 45 വര്‍ഷത്തിനിടെയുള്ള ഏറ്റവും രൂക്ഷമായ 6.1 ശതമാനമായി വര്‍ധിച്ചു. ഇതെല്ലാം തന്നെ സര്‍ക്കാര്‍ പുറത്തുവിട്ട കണക്കുകളുടെ അടിസ്ഥാനത്തിലാണ്. തങ്ങളുടെ ജോലി കൃത്യമായി നിര്‍വഹിച്ചുവെന്ന് പലിശ നിരക്ക് കുറച്ചതിലൂടെ ആര്‍ബിഐ ഗവര്‍ണര്‍ക്ക് പറയാന്‍ കഴിയും. മുന്‍കാലങ്ങളില്‍ നിന്നും വ്യത്യസ്തമായി പലിശ നിരക്ക് കുറച്ചത് ഏകസ്വരത്തിലാണെന്നും ഇവര്‍ക്ക് പറയാം.
എന്നാല്‍ രാജ്യത്തിന്റെ സാമ്പത്തിക വളര്‍ച്ചാ നിരക്ക് കൂട്ടുന്നതിനും നിലവിലുള്ള സാമ്പത്തിക തകര്‍ച്ച കുറയ്ക്കുന്നതിനും ഈ തീരുമാനം എത്രമാത്രം ഉതകുമെന്ന് പറയാന്‍ കഴിയില്ല. പലിശ നിരക്ക് കുറയ്ക്കുന്നതിന്റെ അനുകൂല സ്വാധീനം സംബന്ധിച്ച് വിദഗ്ധര്‍ വ്യത്യസ്ത അഭിപ്രായമാണ് പ്രകടിപ്പിക്കുന്നത്. കഴിഞ്ഞ രണ്ട് തവണ നടപ്പാക്കിയ പലിശ നിരക്ക് കുറയ്ക്കുന്ന നടപടിയിലൂടെ 51 അടിസ്ഥാന പോയിന്റുകളില്‍ 21 എണ്ണത്തെ മാത്രമേ സ്വാധീനിക്കാന്‍ കഴിഞ്ഞുള്ളൂ. ഇക്കാര്യം ആര്‍ബിഐ തന്നെ സമ്മതിക്കുന്നുണ്ട്.

ആര്‍ബിഐ നടപ്പാക്കിയ പരിഷ്‌ക്കാരങ്ങള്‍ ബാങ്കുകള്‍ വായ്പ എടുത്തവര്‍ക്ക് മേല്‍ അടിച്ചേല്‍പ്പിച്ചു. ബാങ്കിന്റെ സാമ്പത്തിക ഭദ്രത കൂടുതല്‍ ഞെരുക്കത്തിലാണെന്നും അതുകൊണ്ടുതന്നെ നിക്ഷേപങ്ങളുടെ പലിശ നിരക്ക് കുറയ്ക്കാന്‍ കഴിയില്ലെന്ന നിലപാടുമാണ് ബാങ്കുകള്‍ സ്വീകരിച്ചത്. ബാങ്കുകളുടെ ഈ വാദഗതി ന്യായമാണ്. നെഫ്റ്റ്, ആര്‍ടിജിഎസ് എന്നിവയ്ക്കുള്ള ചാര്‍ജുകള്‍ ഒഴിവാക്കാനുള്ള ആര്‍ബിഐ തീരുമാനം സ്വാഗതാര്‍ഹമാണ്. ഇതിന്റെ ആനുകൂല്യങ്ങള്‍ ഇടപാടുകാര്‍ക്ക് ലഭ്യമാക്കാനുള്ള നടപടികള്‍ ബാങ്കുകള്‍ സ്വീകരിക്കണം.  പലിശ നിരക്ക് കുറച്ചതിനൊപ്പം ജിഡിപി കണക്കുകളും ആര്‍ബിഐ കുറച്ചു. 2019-20 സാമ്പത്തിക വര്‍ഷത്തില്‍ 7.2 ശതമാനമാണ് ജിഡിപിയെന്നാണ് നേരത്തെ വ്യക്തമാക്കിയിരുന്നത്. ഏപ്രില്‍ മാസത്തില്‍ നടന്ന സാമ്പത്തിക അവലോകന യോഗത്തില്‍ ഏഴ് ശതമാനമായി നിജപ്പെടുത്തി. സാമ്പത്തിക വര്‍ഷത്തിന്റെ ആദ്യപകുതിയില്‍ ജിഡിപി 6.8നും ഏഴിനും ഇടയിലായിരിക്കുമെന്നാണ് റിപ്പോര്‍ട്ട്. സാമ്പത്തിക വര്‍ഷത്തിന്റെ രണ്ടാം പകുതിയില്‍ ജിഡിപി 7.3 മുതല്‍ 7.4 വരെയാകുമെന്നും ആര്‍ബിഐ വിലയിരുത്തിയിരുന്നു. 2019-20 സാമ്പത്തിക വര്‍ഷത്തിലെ അവസാന പാദത്തില്‍ നിക്ഷേപത്തിന്റെ തോത് ഗണ്യമായി കുറഞ്ഞു. കയറ്റുമതി കുറയുകയും ഉപഭോക്തൃ സൂചികയില്‍ കനത്ത ഇടിവ് ഉണ്ടാവുകയും ചെയ്തു. വ്യക്തിഗത ഉപഭോഗം പ്രത്യേകിച്ചും ഗ്രാമീണ മേഖലയില്‍ ഗണ്യമായി കുറഞ്ഞു. അമേരിക്കയും ചൈനയും തമ്മിലുള്ള വ്യാപാര യുദ്ധവും നിക്ഷേപ തോത് ഗണ്യമായി കുറയുന്നതിന് കാരണമായി. മൂലധന സമാഹരണത്തിലും ഗണ്യമായ കുറവുണ്ടായി. മൂലധന സമാഹരണം 3.6 ശതമാനമായി കുറഞ്ഞു. സ്വകാര്യ ഉപഭോഗവും ഗണ്യമായി കുറഞ്ഞു.
കാര്‍ഷിക അനുബന്ധ മേഖലകളിലും ഗണ്യമായ കുറവാണ് രേഖപ്പെടുത്തിയത്. റാബി വിളകളുടെ ഉല്‍പ്പാദനത്തിലും ഗണ്യമായ കുറവുണ്ടായി.

ഭക്ഷ്യധാന്യങ്ങളുടെ ഉല്‍പ്പാദനം 283.4 ദശലക്ഷം ടണ്ണായി കുറഞ്ഞു. കഴിഞ്ഞ വര്‍ഷത്തെ അപേക്ഷിച്ച് 0.6 ശതമാനം കുറവുണ്ടായി. റാബി വിളകളായ അരി, പയറുവര്‍ഗങ്ങള്‍, ധാന്യങ്ങള്‍ എന്നിവയുടെ ഉല്‍പ്പാദനത്തിലാണ് കുറവുണ്ടായത്. പലിശ നിരക്കുകളിലെ കുറവ് ബാങ്കുകളില്‍ നിന്നും വായ്പ എടുത്തിട്ടുള്ള കമ്പനികള്‍ക്കും വ്യക്തികള്‍ക്കുമാണ് പ്രയോജനം ലഭിക്കുന്നത്. നിക്ഷേപത്തിന്റെ പലിശ നിരക്ക് കുറയ്ക്കാന്‍ അനുവദിച്ചാല്‍ വായ്പകളുടെ നിരക്ക് കുറയ്ക്കാന്‍ ബാങ്കുകള്‍ സന്നദ്ധമാണ്. എന്നാല്‍ നിക്ഷേപങ്ങളുടെ പലിശ നിരക്ക് കുറയ്ക്കുന്നത് ഗുരുതരമായ സാമ്പത്തിക പ്രത്യാഘാതങ്ങള്‍ സൃഷ്ടിക്കും. അതുകൊണ്ടുതന്നെ നിക്ഷേപങ്ങളുടെ പലിശ നിരക്ക് കുറയ്ക്കാന്‍ ബാങ്കുകള്‍ തയ്യാറാകില്ല. വളര്‍ച്ചയുടെ ആധാരഘടകങ്ങളായ വ്യക്തിഗത ഉപഭോഗം, നിക്ഷേപം, കയറ്റുമതിയിലെ കുറവ് എന്നിവയൊക്കെ കുറയുന്ന അവസ്ഥയാണ് ഇപ്പോഴുള്ളത്. ഈ സാഹചര്യത്തില്‍ സമ്പദ് വ്യവസ്ഥ തകരുന്നതിന്റെ ആക്കം കുറയ്ക്കുകയെന്നത് പ്രയാസകരമായ കാര്യമാണ്. രാജ്യത്തിന്റെ പകുതിയിലേറെ പ്രദേശങ്ങളും വരള്‍ച്ചയുടെ പിടിയിലാണ്. അതുകൊണ്ടുതന്നെ വളര്‍ച്ചയ്ക്കുള്ള സാധ്യത തുലോം കുറവാണ്. സാമ്പത്തിക തകര്‍ച്ച ഇനിയും മൂര്‍ച്ഛിക്കാനാണ് സാധ്യത.