ജനഹൃദയങ്ങളിൽ വിപ്ലവാവേശത്തിന്റെ അഗ്നിജ്വാലകൾ പകർന്ന പുന്നപ്ര രക്തസാക്ഷികൾക്ക് ആയിരങ്ങളുടെ ശ്രദ്ധാഞ്ജലി. ഏകാധിപത്യത്തിനും അടിച്ചമർത്തലിനുമെതിരെ തൊഴിലാളികൾ നടത്തിയ ഐതിഹാസികമായ സമരത്തിന്റെ ഓർമ്മ പുതുക്കുവാൻ ആയിരങ്ങൾ ചരിത്രഭൂമിയിലെത്തി.

സ്വതന്ത്ര തിരുവിതാംകൂറിനെ അറബിക്കടലിൽ എറിഞ്ഞ് ഐക്യകേരളമെന്ന സ്വപ്നം സാക്ഷാൽക്കരിക്കാൻ വേണ്ടി ധീരന്മാർ നടത്തിയ മുന്നേറ്റത്തിന്റെ പ്രോജ്ജ്വല സ്മരണയിൽ പുതുതലമുറ പ്രതിജ്ഞ ചെയ്തു. സാമ്രാജ്യത്വ ശക്തികൾക്ക് മുന്നിൽ മുട്ടുമടക്കാതെ ജീവൻ ത്യജിച്ച് പോരാടിയ പുന്നപ്രയിലെ ധീരസഖാക്കൾക്ക് മരണമില്ലെന്ന് അവർ പ്രഖ്യാപിച്ചു. ഇതോടെ പുന്നപ്ര സമരത്തിന്റെ 75-ാം വാർഷികാചരണത്തിന് സമാപനമായി. വിവിധ വാർഡ് വാരാചാരണ കമ്മിറ്റികളുടെ നേതൃത്വത്തിൽ ഇരു കമ്മ്യൂണിസ്റ്റ് പാർട്ടി നേതാക്കളും പ്രവർത്തകരും വർഗ ബഹുജന സംഘടനാ പ്രവർത്തകരും രക്തസാക്ഷികളുടെ സ്മരണകളുറങ്ങുന്ന പുന്നപ്ര സമരഭൂമിയിൽ പുഷ്പാർച്ചന നടത്തി.

വൈകിട്ട് ആറിന് സമരസേനാനി വാര്യംപറമ്പിൽ കൃഷ്ണന്റെ മകൾ സുവർണ്ണ പ്രതാപൻ കൊളുത്തി അത്‌ലറ്റുകൾക്ക് കൈമാറിയ ദീപശിഖാറിലേ പറവൂർ രക്തസാക്ഷി അനുസ്മരണ മണ്ഡപനടയിലെത്തി. ഇവിടെ നടന്ന പൊതുസമ്മേളനം സിപിഐ(എം) സംസ്ഥാന സെക്രട്ടറി എ വിജയരാഘവൻ ഉദ്ഘാടനം ചെയ്തു. സിപിഐ സംസ്ഥാന സെക്രട്ടറി കാനം രാജേന്ദ്രൻ മുഖ്യപ്രഭാഷണം നടത്തി. സിപിഐ ജില്ലാ സെക്രട്ടറി ടി ജെ ആഞ്ചലോസ്, എ എം ആരിഫ് എംപി തുടങ്ങിയവർ സംസാരിച്ചു.

ആലപ്പുഴ വലിയചുടുകാട്ടിൽ പുഷ്പാർച്ചനയും അനുസ്മരണ സമ്മേളനവും നടന്നു. യോഗത്തിൽ പി പി ചിത്തരഞ്ജൻ എംഎൽഎ അധ്യക്ഷനായി. ആർ സുരേഷ് സ്വാഗതം പറഞ്ഞു. സിപിഐ(എം) സംസ്ഥാന കമ്മിറ്റി അംഗം ജി സുധാകരൻ ഉദ്ഘാടനം ചെയ്തു. കൃഷി മന്ത്രി പി പ്രസാദ്, സിപിഐ ജില്ലാ അസിസ്റ്റന്റ് സെക്രട്ടറി പി വി സത്യനേശൻ തുടങ്ങിയവർ സംസാരിച്ചു.

English Summary : punnapara vayalar remembrance observed