Web Desk

ന്യൂഡൽഹി

April 05, 2020, 9:00 pm

സർവീസുകൾ പുനരാരംഭിക്കുന്നതിന് നടപടികളുമായി റയിൽവേ

Janayugom Online

ലോക്ഡൗണിന് ശേഷം ട്രെയിൻ സർവീസുകൾ പുനരാരംഭിക്കുന്നതിനുള്ള നടപടികളുമായി ഇന്ത്യൻ റയിൽവേ. സാമൂഹ്യ അകലം ഉൾപ്പെടെയുള്ള പ്രതിരോധ മാർഗങ്ങൾ അവലംബിച്ച് സർവീസ് നടത്താനുള്ള തയ്യാറെടുപ്പുകളാണ് ഇപ്പോൾ തുടരുന്നത്. എന്നാൽ പാസഞ്ചർ സർവീസുകൾ എന്ന് മുതൽ പുനരാരംഭിക്കുമെന്ന കാര്യത്തിൽ ഇനിയും തീരുമാനമായിട്ടില്ല.

യാത്രക്കാർ നിർബന്ധമായും മാസ്കുകൾ ഉൾപ്പെടെയുള്ള പ്രതിരോധ മാർഗങ്ങൾ കർശനമായി പാലിക്കണമെന്ന നിർദ്ദേശം നൽകാനാണ് റയിൽവേ ബോർഡ് അധികൃതരുടെ ഇപ്പോഴത്തെ തീരുമാനം. ആരോഗ്യ പ്രശ്നങ്ങൾ ഇല്ലാത്തവർക്ക് മാത്രം യാത്ര അനുവദിച്ചാൽ മതിയെന്നാണ് മറ്റൊരു തീരുമാനം. ഇപ്പോൾ ഡിപ്പോകളിൽ നിർത്തിയിട്ടിരിക്കുന്ന കോച്ചുകൾ അണുവിമുക്തമാക്കാനുള്ള നടപടികൾ തുടങ്ങാൻ നിർദ്ദേശം നൽകിയിട്ടുണ്ട്.

സർവീസുകൾ ആരംഭിക്കുമ്പോൾ സ്റ്റേഷനുകളിൽ വൻജനകൂട്ടമാകും ഉണ്ടാകുന്നത്. ഇത് നിയന്ത്രിക്കുന്നതിനുള്ള നടപടികൾ ആവിഷ്കരിക്കും. തുടർച്ചയായി 21 ദിവസം പ്രവർത്തനം ഇല്ലാത്തതുകൊണ്ടുതന്നെ കോച്ചുകളിലെ ബാറ്ററികൾ, ആൾട്ടർനേറ്ററുകൾ എന്നിവയുടെ പ്രവർത്തന ക്ഷമതയും ഉറപ്പാക്കേണ്ടതുണ്ടെന്നും അധികൃതർ പറഞ്ഞു.

you may also like this video;