ചെറുകിട നിക്ഷേപങ്ങളുടെ പലിശനിരക്ക് പുനഃസ്ഥാപിക്കുക

Web Desk
Posted on June 30, 2019, 10:33 pm

രാജ്യത്തെ ചെറുകിട നിക്ഷേപ പദ്ധതികളുടെ പലിശനിരക്ക് കേന്ദ്രസര്‍ക്കാര്‍ വെട്ടിക്കുറച്ചിരിക്കുന്നു. പബ്ലിക് പ്രൊവിഡന്റ് ഫണ്ട് (പിപിഎഫ്), നാഷണല്‍ സേവിംഗ്‌സ് സര്‍ട്ടിഫിക്കറ്റ് (എന്‍എസ്‌സി), സീനിയര്‍ സിറ്റിസണ്‍സ് സേവിംഗ്‌സ് സ്‌കീം (എസ്‌സിഎസ്എസ്), സുകന്യ സമൃദ്ധി, കൃഷി വികാസ് പത്ര (കെവിപി) തുടങ്ങിയ ലഘു നിക്ഷേപ പദ്ധതികളിലെ പലിശയാണ് പ്രതിവര്‍ഷം 0.1 ശതമാനത്തിന്റെ കുറവുവരുത്തിയിരിക്കുന്നത്.
പിപിഎഫ്, എന്‍എസ്‌സി എന്നിവയുടെ വാര്‍ഷിക പലിശ നിരക്ക് എട്ടില്‍ നിന്ന് 7.9 ശതമാനമായും കെവിപിയുടേത് 7.7 ല്‍ നിന്ന് 7.6 ശതമാനമായുമാണ് കുറച്ചത്. ഇതോടെ കെവിപി യുടെ കാലാവധിയെത്തുന്നത് 112 മാസത്തില്‍ നിന്ന് 113 മാസമായി ഉയരുകയും ചെയ്യും. പെണ്‍കുട്ടികള്‍ക്കുവേണ്ടിയുള്ള നിക്ഷേപപദ്ധതിയായ സുകന്യ സമൃദ്ധിയുടെ പലിശ 8.5 ല്‍ നിന്ന് 8.4, എസ്‌സിഎസ്എസിന്റേത് 8.7 ല്‍ നിന്ന് 8.6 ശതമാനമായുമാണ് കുറച്ചത്. പെണ്‍കുട്ടികള്‍ക്കും മുതിര്‍ന്ന പൗരന്മാര്‍ക്കുമുള്ള പ്രത്യേക ആനുകൂല്യമെന്ന നിലയിലാണ് ഈ രണ്ടു പദ്ധതികള്‍ക്കും മറ്റുള്ളവയെ അപേക്ഷിച്ച് അല്‍പം ഉയര്‍ന്ന നിരക്കിലുള്ള പലിശ നിശ്ചയിച്ചത്. അതാണ് കുറച്ചിരിക്കുന്നത്.

15 വര്‍ഷകാലാവധിയുള്ള പിപിഎഫിന് 1.5 ലക്ഷം രൂപവരെ ആദായനികുതിയിളവ് ലഭിക്കും. കാലാവധി അഞ്ചുവര്‍ഷം വീതം വര്‍ധിപ്പിച്ചുനല്‍കുന്നതിന് നിക്ഷേപകന് സൗകര്യമുണ്ടായിരിക്കുകയും ചെയ്യും. ഭാവിയില്‍ ഒരുമിച്ച് ഒരു തുക കയ്യില്‍ വരുമെന്ന നിലയില്‍ തന്റെ മാസവരുമാനത്തില്‍ നിന്ന് സ്വരുക്കൂട്ടുന്ന തുക ഈ ലഘുപദ്ധതിയില്‍ നിക്ഷേപിക്കുന്നതിന് സാധാരണക്കാര്‍ക്ക് അവസരമുണ്ടാകും.

കൃഷി വികാസ് പത്രയില്‍ നിക്ഷേപിക്കുന്നതിനുള്ള ചുരുങ്ങിയ തുക 1000 രൂപയാണ്. ആയിരം രൂപ അനുപാതത്തില്‍ കൂടുതലായി നിക്ഷേപിക്കാനും സാധിക്കും. രണ്ടര വര്‍ഷമെത്തുമ്പോള്‍ കാലാവധി പൂര്‍ത്തിയാക്കാതെ തുക തിരികെ വാങ്ങുന്നതിനും അവസരമുണ്ട്. ഇത്തരത്തില്‍ ലളിതമായ വ്യവസ്ഥകളോടെയാണ് ഇത്തരം നിക്ഷേപപദ്ധതികള്‍ ആവിഷ്‌കരിച്ചിട്ടുള്ളത്. കൂടാതെ കേന്ദ്ര സര്‍ക്കാരിന്റെ നേരിട്ടുള്ളനിയന്ത്രണത്തിലാണെന്നതിനാല്‍ കൂടുതല്‍ വിശ്വസ്തവും സുരക്ഷിതവുമായ നിക്ഷേപമായാണ് സാധാരണക്കാര്‍ ഇവയെ കാണുന്നത്.
ബാങ്കുകളും മറ്റു ധനകാര്യ സ്ഥാപനങ്ങളും നടത്തുന്ന വ്യത്യസ്തങ്ങളായ നിക്ഷേപ പദ്ധതികള്‍ ഉണ്ടെങ്കിലും അവയെല്ലാം അപ്രാപ്യമായിരുന്ന സാധാരണക്കാരെ ഉദ്ദേശിച്ചാണ് ചെറുകിട നിക്ഷേപ പദ്ധതികള്‍ കേന്ദ്രസര്‍ക്കാരിന്റെ നേതൃത്വത്തില്‍ ആരംഭിച്ചത്. ഇന്നത്തെ പോലെ ബാങ്കുകളുടെ പ്രവര്‍ത്തനം ഗ്രാമീണ മേഖലയിലുള്‍പ്പെടെ എല്ലായിടത്തും ലഭ്യമല്ലാതിരുന്ന കാലത്താണ് ഇത്തരം നിക്ഷേപ പദ്ധതികള്‍ ആരംഭിച്ചത്. ബാങ്കുകള്‍ ഇല്ലെങ്കിലും രാജ്യത്തിന്റെ എല്ലാ പ്രദേശങ്ങളിലും പ്രവര്‍ത്തിച്ചിരുന്ന തപാല്‍ ഓഫീസുകളെ കേന്ദ്രമാക്കിയാണ് പ്രധാനമായും ഇത്തരം പദ്ധതികള്‍ തുടങ്ങിയത്. അതുകൊണ്ടുതന്നെ ദിവസവേതനക്കാരായ തൊഴിലാളികള്‍, കര്‍ഷകര്‍, കര്‍ഷകത്തൊഴിലാളികള്‍ എന്നിങ്ങനെ ജീവിതത്തിന്റെ ഏറ്റവും താഴെ തട്ടില്‍ നില്‍ക്കുന്ന ലക്ഷക്കണക്കിന് പേരാണ് ഇത്തരം നിക്ഷേപ പദ്ധതികളുടെ പ്രധാന ഗുണഭോക്താക്കളായത്.

നിശ്ചിതകാലത്തേയ്ക്ക് തുക നിക്ഷേപിച്ച് കാലാവധിയെത്തുമ്പോള്‍ ഇരട്ടിയായും മറ്റും വര്‍ധിച്ച് തിരികെ ലഭിക്കുന്നതും മാസവരുമാനം ഉറപ്പാക്കുന്നതും എന്നിങ്ങനെ വിവിധ രീതിയിലുള്ളവയായിരുന്നു ഈ നിക്ഷേപപദ്ധതി. മക്കളുടെ വിദ്യാഭ്യാസം, വിവാഹം എന്നിങ്ങനെ ഭാവിയില്‍ ഉണ്ടായേക്കാവുന്ന ചെലവുകള്‍ മുന്‍കൂട്ടി കണ്ട് ആവശ്യമായി വരുന്ന ഘട്ടത്തിന്റെ കാലപരിധി നിശ്ചയിച്ച് സ്ഥിരനിക്ഷേപം നടത്തുകയും തിരികെ കിട്ടുകയും ചെയ്യുന്ന പദ്ധതിയുടെ പ്രത്യേകത എത്ര തുകയാണ് ലഭിക്കുകയെന്നത് മുന്‍കൂട്ടി അറിയാവുന്നതാണ് എന്നതുകൂടിയാണ്.

ഇതിനെല്ലാം പുറമേ നിശ്ചിതകാലയളവ് പൂര്‍ത്തിയാകുമ്പോള്‍ തിരിച്ചു നല്‍കിയാല്‍ മതിയെന്നതിനാല്‍ രാജ്യത്തിന്റെ പൊതുവായ വികസനപ്രവര്‍ത്തനങ്ങള്‍ക്ക് ഉപയോഗിക്കാമെന്ന അനുകൂല സ്ഥിതിയും ഈ നിക്ഷേപങ്ങള്‍ക്കുണ്ട്. യഥാര്‍ഥത്തില്‍ ഓരോ നിക്ഷേപ പദ്ധതിയും ആവിഷ്‌കരിച്ചതിന് പിന്നില്‍ സര്‍ക്കാര്‍ ഖജനാവിലേയ്ക്ക് തുക കണ്ടെത്തുകയെന്ന ലക്ഷ്യം കൂടിയുണ്ടായിരുന്നു. ഓരോ സര്‍ക്കാരുകളും ഈ ലക്ഷ്യം വച്ച് പുതിയ പുതിയ നിക്ഷേപ പദ്ധതികള്‍ ആവിഷ്‌കരിക്കാറുമുണ്ട്.

നേരത്തേ വാര്‍ഷികാടിസ്ഥാനത്തിലാണ് പലിശ നിരക്ക് പുതുക്കിയിരുന്നതെങ്കില്‍ 2016 മുതല്‍ ഇത്തരം നിക്ഷേപങ്ങളുടെ പലിശ നിരക്ക് മൂന്നുമാസ കണക്കില്‍ പുതുക്കുന്ന രീതിയാണുള്ളത്. ഇത്തരം രീതി സാധാരണക്കാരെയാണ് കൂടുതല്‍ ദോഷകരമായി ബാധിക്കുകയെന്ന കാര്യത്തില്‍ സംശയമില്ല. അതിസമ്പന്നര്‍ക്ക് വന്‍തുക നിക്ഷേപിക്കുന്നതിനും മറ്റും വന്‍കിട ബാങ്കുകള്‍ സുഗമമായ സൗകര്യങ്ങള്‍ ഒരുക്കി നല്‍കുമ്പോള്‍ സാധാരണക്കാര്‍ക്ക് ആശ്രയമായിട്ടുള്ള ഇത്തരം നിക്ഷേപങ്ങള്‍ കൂടുതല്‍ ആകര്‍ഷകമാക്കുകയാണ് യഥാര്‍ഥത്തില്‍ സര്‍ക്കാര്‍ ചെയ്യേണ്ടത്. അതിലൂടെ സര്‍ക്കാരിന്റെ താല്‍ക്കാലിക ആവശ്യങ്ങള്‍ക്ക് കൂടുതല്‍ തുക എത്തിക്കുന്നതിനു പകരം സാധാരണക്കാരെ അകറ്റുന്ന നടപടി പ്രതിഷേധാര്‍ഹമാണ്.