Web Desk

ബെംഗളൂരു

September 02, 2020, 8:54 pm

പാവപ്പെട്ടവര്‍ക്ക് അരി ലഭ്യമാക്കാന്‍ റൈസ് എടിഎമ്മുകള്‍

Janayugom Online

പൊതുവിതരണ സംവിധാനത്തിലൂടെ അരി ലഭ്യമാക്കുന്നതിന് വേണ്ടി റേഷന്‍ കാര്‍ഡ് ഉടമകള്‍ക്ക് റൈസ് ഡിസ്‌പെന്‍സിങ് മെഷീനുകള്‍ സ്ഥാപിക്കാനൊരുങ്ങി കര്‍ണാടക സര്‍ക്കാര്‍. റൈസ് എടിഎമ്മുകള്‍ എന്നപേരിലാവും ഇവ അറിയപ്പെടുക. ദീര്‍ഘനേരം റേഷന്‍ കടകള്‍ക്കു മുന്നില്‍ ക്യൂ നില്‍ക്കേണ്ടിവരുന്ന സാഹചര്യം ഒഴിവാക്കുന്നതിന് വേണ്ടിയും 24 മണിക്കൂറും ഭക്ഷ്യധാന്യ ലഭ്യത ഉറപ്പാക്കാനുമാണ് ഇവ സ്ഥാപിക്കുന്നതെന്ന് കര്‍ണാടകയിലെ ഭക്ഷ്യ — സിവില്‍ സപ്ലൈസ് മന്ത്രി കെ. ഗോപാലയ്യ ഇന്ത്യന്‍ എക്‌സ്പ്രസിനോട് പറഞ്ഞു.

ഇന്‍ഡോനീഷ്യയും വിയറ്റ്‌നാമും കോവിഡ് ലോക്ക്ഡൗണ്‍ സമയത്ത് റൈസ് എടിഎമ്മുകള്‍ സ്ഥാപിച്ച് ജനങ്ങള്‍ക്ക് സൗജന്യമായി ഭക്ഷ്യധാന്യങ്ങള്‍ ലഭ്യമാക്കിയിരുന്നു. ആ മാതൃകയാണ് കര്‍ണാടകയും പിന്തുടരാന്‍ ഒരുങ്ങുന്നത്. രണ്ട് റൈസ് എടിഎമ്മുകളാണ് പരീക്ഷണാര്‍ഥം സംസ്ഥാനത്ത് ആദ്യം സ്ഥാപിക്കുക. പദ്ധതി വിജയകരമാണെന്ന് കണ്ടാല്‍ സംസ്ഥാനത്തിന്റെ വിവിധ ഭാഗങ്ങളിലേക്ക് അവ വ്യാപിപ്പിക്കും.

പകല്‍ സമയത്ത് ജോലിക്ക് പോകേണ്ടതിനാല്‍ റേഷന്‍ കടകളില്‍ പോകാന്‍ സമയം ലഭിക്കാത്ത ദാരിദ്ര്യ രേഖയ്ക്ക് താഴെ (ബിപിഎല്‍) യുള്ളവരെ മുന്നില്‍ക്കണ്ടാണ് പദ്ധതിക്ക് തുടക്കമിടുന്നതെന്ന് മന്ത്രി കെ. ഗോപാലയ്യ പറഞ്ഞു. നൂറ് കിലോയും 500 കിലോയും വീതം അരി സംഭരിക്കാന്‍ ശേഷിയുള്ള രണ്ടുതരം മെഷീനുകളാവും സ്ഥാപിക്കുക. മെഷിനില്‍ നാണയമിട്ടാല്‍ ആവശ്യക്കാര്‍ക്ക് നിശ്ചിത അളവില്‍ ധാന്യം ലഭിക്കും. ബാങ്ക് എടിഎമ്മുകളിലേതിന് സമാനമായ ബയോ മെട്രിക് സംവിധാനമോ സ്മാര്‍ട്ട് കാര്‍ഡോ ഗുണഭോക്താക്കള്‍ക്ക് നല്‍കാനാണ് സര്‍ക്കാര്‍ ആലോചിക്കുന്നത്. ബിപിഎല്‍ വിഭാഗത്തില്‍പ്പെട്ട കുടുംബങ്ങളിലെ ഓരോ അംഗങ്ങള്‍ക്കും കര്‍ണാടക സര്‍ക്കാര്‍ അന്നഭാഗ്യ പദ്ധതി പ്രകാരം 2013 മുതല്‍ അഞ്ച് കിലോ അരി വീതം നല്‍കുന്നുണ്ട്. എപിഎല്‍ വിഭാഗക്കാര്‍ക്ക് കിലോയ്ക്ക് 15 രൂപ നിരക്കിലും അരി ലഭ്യമാക്കുന്നുണ്ട്.

കര്‍ണാടക സര്‍ക്കാര്‍ കുടിവെള്ള എടിഎമ്മുകള്‍ നേരത്തെതന്നെ സംസ്ഥാനത്തിന്റെ വിവിധ ഭാഗങ്ങളില്‍ സ്ഥാപിച്ചിരുന്നു. 20 ലിറ്റര്‍ മിനറല്‍ വാട്ടര്‍ അഞ്ച് രൂപയ്ക്ക് ഇവയില്‍നിന്ന് ലഭിക്കും. ഇത്തരത്തിലുള്ള 1,800 എടിഎമ്മുകളാണ് സംസ്ഥാനത്തിന്റെ വിവിധ ഭാഗങ്ങളിലുള്ളത്. ബെംഗളൂരു നഗരത്തില്‍ ഇവ വ്യാപകമാണ്. എല്ലാ കോര്‍പ്പറേഷന്‍ വാര്‍ഡുകളിലും ഒരെണ്ണം വീതമുണ്ട്.

ENGLISH SUMMARY: RICE ATMS STARTED IN KARNATAKA

YOU MAY ALSO LIKE THIS VIDEO