വീട്ടിൽ പാചകത്തിനായി മീൻ വൃത്തിയാക്കുന്നതിനിടെ കയ്യിലെ വെള്ളിമോതിരം സ്വർണ്ണ നിറത്തിലായതിന്റെ ഞെട്ടലിലാണ് വീട്ടമ്മ. തിരുവനന്തപുരം ജില്ലയിലെ വക്കം സ്വദേശിയായ വീട്ടമ്മയ്ക്കാണ് അനുഭവം. ചൊവ്വാഴ്ച രാവിലെ മീൻ വൃത്തിയാക്കുന്നതിനിടെയാണ് കയ്യിലെ വെള്ളി മോതിരത്തിന്റെ നിറം മാറുന്നത് ശ്രദ്ധയിൽപ്പെടുന്നത്. ചെറിയ മീനായ കൊഴിയാള, ചെങ്കലവ(കിളിമീൻ/കോര) എന്നിവ വൃത്തിയാക്കുന്നതിനിടെയാണ് സംഭവം. അതോടെ മീൻ പാകം ചെയ്യാതെ മാറ്റിവെച്ചു.

വൃത്തിയാക്കിയ മീൻ

വീടുകൾ തോറും മീൻ വിൽപ്പനയ്ക്കെത്തിക്കുന്ന സ്ത്രീയുടെ കയ്യിൽ നിന്നാണ് ചൊവ്വാഴ്ച രാവിലെ മീൻ വാങ്ങുന്നത്. കാഴ്ചയിലോ ഗന്ധത്തിലോ കേടുപാടുകൾ ഒന്നും തന്നെ തോന്നിയില്ലെന്നും നല്ല മീനാണ് എന്നു കരുതിയാണ് വാങ്ങിയതെന്നും ജനയുഗം ഓൺലൈനിനോട് വീട്ടമ്മ പ്രതികരിച്ചു. ഫുഡ് സേഫ്റ്റി ഓഫിസറെ കാര്യം ധരിപ്പിച്ചിട്ടുണ്ടെന്നും അവർ പറഞ്ഞു. മീൻ ദീർഘകാലം കേടാകാതെ സൂക്ഷിക്കാൻ ഉപയോഗിക്കുന്ന രാസവസ്തുക്കളാണ് ഈ നിറംമാറ്റത്തിനു പിന്നിലെ കാരണമെന്നാണ് സംശയിക്കുന്നത്.

സമാനസംഭവങ്ങൾ സമീപ പ്രദേശത്ത് നിരവധി തവണ ഉണ്ടായിട്ടുണ്ട്. സ്ഥലത്തെ പ്രധാന മാർക്കറ്റുകളിൽ ഒന്നായ നിലയ്ക്കാമുക്ക് ചന്തയിൽ വിൽപ്പനയ്ക്കെത്തിച്ച മീനുകളിൽ ഫോർമാലിന്റെ അംശം കണ്ടെത്തിയതിനെ തുടർന്ന് മീൻ പിടിച്ചെടുക്കുകയും വിൽപ്പനയ്ക്കെത്തിച്ചവർക്ക് താക്കീത് നൽകി വിട്ടയയ്ക്കുകയും ചെയ്തിരുന്നു.

നല്ല മീനുകളെ ഇങ്ങനെ തിരിച്ചറിയാം;

കേടാകാത്ത മീനിന് വൃത്താകൃതിയുള്ളതും തിളങ്ങുന്നതും തെള‍ിച്ചമുള്ളതുമായ കണ്ണ‍ുകളായിരിക്കും. തിളക്കമില്ലാതെ, കുഴിഞ്ഞിരിക്കുന്നതും ഇളം നീലനിറമുള്ളതുമായ കണ്ണുകൾ കണ്ടാൽ ഉറപ്പിക്കുക മീൻ പഴകിത്തുടങ്ങിയിരിക്കുന്നുവെന്ന്. ചെകിളപ്പൂകൾക്ക് രക്ത നിറമാണെങ്കിലും മീനിന് കേടുപാടുകൾ ഒന്നും തന്നെയില്ല.
പാചകം ചെയ്യുന്നതിനു മുമ്പായി മീനിന്റെ ആന്തരികാവയവങ്ങൾ നീ‍ക്കം ചെയ്യുമ്പോൾ നട്ടെല്ലിന്റെ ഭാഗത്തു നിന്നു വരുന്ന രക്തം നല്ല നിറത്തോടെയുള്ളതാണെങ്കിൽ മീനിന് കേടുപാടുകൾ സംഭവിച്ചിട്ടില്ല.
മീനുകൾ കഴുകി വൃത്തിയാക്കുമ്പോൾ മൂന്നു പ്രവശ്യമെങ്കിലും നന്നായി കഴുകുക. കടലമാവു പുരട്ടി കഴുകുന്നതും നല്ലതാണ്. അതു പോലെ വാങ്ങുമ്പോൾ മീനിന്റെ ഗന്ധം ശ്രദ്ധിക്കുക. അമേ‍ാണിയ, ഫോർമലിൻ ഇവയുടെ രൂക്ഷഗന്ധം അനുഭവപ്പെടുന്നുണ്ടെങ്കിൽ ആ മീൻ ഒഴിവാക്കുക.
ഇത് കൂടാതെ ഫിഷറീസ് വകുപ്പ് പരിശോധനാ കിറ്റും പുറത്തിറക്കിയിട്ടുണ്ട്. ഇത് ഉപയോഗിച്ചും മീനിലെ വിഷാംശം കണ്ടെത്താവുന്നതാണ്.