Friday
19 Jul 2019

വിവരാവകാശ പ്രവര്‍ത്തകന്റെ കൊലപാതകം; ബിജെപി മുന്‍ എംപിക്കും മറ്റ് ആറ് പ്രതികള്‍ക്കും ജീവപര്യന്തം

By: Web Desk | Thursday 11 July 2019 10:58 PM IST


ന്യൂഡല്‍ഹി: ഗുജറാത്തിലെ വിവരാവകാശ പ്രവര്‍ത്തകന്‍ അമിത് ജേഠ്‌വയുടെ കൊലപാതകത്തില്‍ ബിജെപി മുന്‍ എംപി ദിനു ബോഗ സോളങ്കിക്ക് ജീവപര്യന്തം തടവ്. ദിനു സോളങ്കിക്കു പുറമേ കോടതി കുറ്റക്കാരെന്നു കണ്ടെത്തിയ മറ്റ് ആറുപേര്‍ക്കും ജീവപര്യന്തം ശിക്ഷ വിധിച്ചിട്ടുണ്ട്. അഹമ്മദാബാദ് സിബിഐ കോടതിയുടേതാണ് വിധി.
അഹമ്മദാബാദ് ഡിറ്റെക്ഷന്‍ ക്രൈംബ്രാഞ്ച് അന്വേഷിച്ച കേസില്‍ ആറ് പേര്‍ക്കെതിരെയായിരുന്നു കുറ്റപത്രം സമര്‍പ്പിച്ചത്. ശിവ സോളങ്കി, ശൈലേഷ് പാണ്ഡ്യ, ബഹാദൂര്‍ സിന്‍ഹ് വദെര്‍, പാഞ്ചന്‍ ജി ദേശായി, സഞ്ജയ് ചൗഹാന്‍, ഉദാജി താക്കറെ എന്നിവരായിരുന്നു പ്രതികള്‍.
കേസന്വേഷണത്തില്‍ അഹമ്മദാബാദ് ഡിറ്റെക്ഷന്‍ ക്രൈംബ്രാഞ്ച് സോളങ്കിക്ക് ക്ലീന്‍ ചിറ്റ് നല്‍കുകയും ഇതിനെതിരെ ജേഠ്‌വയുടെ പിതാവ് ഹൈക്കോടതിയെ സമീപിക്കുകയും ചെയ്തിരുന്നു. തുടര്‍ന്ന് ഹൈക്കോടതി കേസ് സിബിഐക്ക് കൈമാറുകയായിരുന്നു. കേസില്‍ സാക്ഷികളെ ബിജെപി സ്വാധീനിക്കുന്നുവെന്ന് ആരോപണമുയരുകയും സാക്ഷികളില്‍ പലരും കൂറുമാറുകയും ചെയ്തതിന് പിന്നാലെയാണ് പുനര്‍വിചാരണയ്ക്ക് കോടതി ഉത്തരവിട്ടത്.
കേസിന്റെ വിസ്താരത്തിനിടയില്‍ സാക്ഷികളായി ഉണ്ടായിരുന്ന 195 പേരില്‍ 105 പേരും പ്രതിഭാഗത്തിനനുകൂലമായി കൂറുമാറിയതായി ഹൈക്കോടതി കണ്ടെത്തിയിരുന്നു.
2013 ല്‍ സിബിഐ കേസ് ഏറ്റെടുത്തതോടെ സോളങ്കിയെ പ്രതിചേര്‍ക്കുകയായിരുന്നു. 2010 ജൂലൈയില്‍ ഗുജറാത്ത് ഹൈക്കോടതിക്ക് പുറത്തുവച്ചാണ് അമിത് ജേഠ്‌വ വെടിയേറ്റ് മരിച്ചത്. ആ സമയത്ത് ജുനഗഡില്‍ നിന്നുള്ള എംപിയായിരുന്നു സോളങ്കി. ഗിര്‍ വനത്തിലെ അനധികൃത ഖനനം പുറത്തുകൊണ്ടുവന്നതിന് പിന്നാലെയാണ് ജേഠ്‌വ കൊല്ലപ്പെട്ടത്.

Related News