പോളിങ് സ്റ്റേഷനുകളുടെ വെബ്കാസ്റ്റിംഗിന്റെ സിസിടിവി ദൃശ്യങ്ങൾ പങ്കിടൽ; സ്വകാര്യതയും നിയമ പ്രശ്നങ്ങളുമുണ്ടെന്ന് തെരെഞ്ഞെടുപ്പ് കമ്മിഷൻ

പോളിങ് സ്റ്റേഷനുകളുടെ വെബ്കാസ്റ്റിംഗിന്റെ സിസിടിവി ദൃശ്യങ്ങൾ പങ്കിടുന്നതിൽ സ്വകാര്യതയും നിയമപരമായ പ്രശ്നങ്ങളും ഉണ്ടെന്ന് തെരഞ്ഞെടുപ്പ് കമ്മിഷൻ. ബിജെപിയുടെ നേതൃത്വത്തിലുള്ള മഹായുതി വിജയിച്ച കഴിഞ്ഞ വർഷത്തെ മഹാരാഷ്ട്ര തെരഞ്ഞെടുപ്പിൽ കൃത്രിമം നടന്നതായി രാഹുൽ ഗാന്ധി ആവർത്തിച്ച് വാദിച്ച സാഹചര്യത്തിലാണ് തെരഞ്ഞെടുപ്പ് നിരീക്ഷകരുടെ ഈ മറുപടി. ഏതെങ്കിലും ഗ്രൂപ്പിനോ വ്യക്തിക്കോ വോട്ടർമാരെ എളുപ്പത്തിൽ തിരിച്ചറിയാൻ സഹായിക്കുന്ന ദൃശ്യങ്ങൾ പങ്കിടുന്നത്, വോട്ട് ചെയ്ത വോട്ടർക്കും വോട്ട് ചെയ്യാത്ത വോട്ടർക്കും സാമൂഹിക വിരുദ്ധരുടെ സമ്മർദ്ദം, വിവേചനം, ഭീഷണി എന്നിവയ്ക്ക് ഇരയാകാൻ കാരണമാകുമെന്ന് തെരഞ്ഞെടുപ്പ് കമ്മിഷൻ വൃത്തങ്ങൾ പറഞ്ഞു.
പോളിങ് ബൂത്തുകളിലെ സിസിടിവി ദൃശ്യങ്ങൾ പരസ്യമാക്കുന്നത് ജനപ്രാതിനിധ്യ നിയമത്തിലെ നിയമ വ്യവസ്ഥകളുടെയും സുപ്രീം കോടതിയുടെ നിര്‍ദേശങ്ങളുടെയും ലംഘനമാകും. ഇത്തരം വീഡിയോകൾ ആഭ്യന്തര നിരീക്ഷണത്തിന് മാത്രമാണെന്നും തെരഞ്ഞെടുപ്പ് കേസിൽ കോടതി ആവശ്യപ്പെട്ടാൽ മാത്രമേ പങ്കിടൂ എന്നും തെരഞ്ഞെടുപ്പ് കമ്മിഷൻ വ്യക്തമാക്കി. കോടതികളിൽ തെരഞ്ഞെടുപ്പ് ഫലം ചോദ്യം ചെയ്യപ്പെട്ടില്ലെങ്കിൽ, 45 ദിവസത്തിനുള്ളിൽ തെരഞ്ഞെടുപ്പ് പ്രക്രിയയുടെ വെബ്‌കാസ്റ്റിംഗും വീഡിയോ ദൃശ്യങ്ങളും നശിപ്പിക്കാൻ കഴിഞ്ഞ മാസം തെരഞ്ഞെടുപ്പ് കമ്മിഷൻ സംസ്ഥാന തെരഞ്ഞെടുപ്പ് ഉദ്യോഗസ്ഥരോട് നിര്‍ദേശിച്ചിരുന്നു.
ഈ മാസം ആദ്യം, 2024 ലെ ലോക്‌സഭാ തെരഞ്ഞെടുപ്പിനും മഹാരാഷ്ട്ര ഉൾപ്പെടെ എല്ലാ സംസ്ഥാനങ്ങളിലെയും നിയമസഭാ തെരഞ്ഞെടുപ്പ്കൾക്കുമുള്ള ഏകീകൃത ഡിജിറ്റൽ വോട്ടർ പട്ടിക പ്രസിദ്ധീകരിക്കാൻ രാഹുൽ ഗാന്ധി തെരഞ്ഞെടുപ്പ് കമ്മിഷനോട് ആവശ്യപ്പെട്ടിരുന്നു.
തെരഞ്ഞെടുപ്പ് ദിവസം വൈകുന്നേരം 5 മണിക്ക് ശേഷം മഹാരാഷ്ട്രയിലെ പോളിങ് ബൂത്തുകളിൽ നിന്ന് പകർത്തിയ എല്ലാ സിസിടിവി ദൃശ്യങ്ങളും പുറത്തുവിടണമെന്നും അദ്ദേഹം തെരഞ്ഞെടുപ്പ് ആവശ്യപ്പെട്ടു. വോട്ട് ചെയ്യുന്നത് ഒരു അവകാശം പോലെ തന്നെ, വോട്ട് ചെയ്യാതിരിക്കുന്നത് തെരഞ്ഞെടുക്കുന്നതും സംരക്ഷിക്കപ്പെടുന്നു. വീഡിയോകൾ പങ്കിടുന്നത് ഏതെങ്കിലും കാരണത്താൽ വോട്ട് ചെയ്യാതിരുന്ന ആളുകളെ തുറന്നുകാട്ടാൻ സാധ്യതയുണ്ട്. പോളിങ് ബൂത്തുകളിലെ കാമറകൾക്ക് ആരാണ് വന്നതെന്നും ആരാണ് വന്നില്ലെന്നും കാണിക്കാൻ കഴിയും. പ്രൊഫൈലിംഗ്, സമ്മർദ്ദം അല്ലെങ്കിൽ സേവനങ്ങൾ നിഷേധിക്കുന്നതിന് പോലും ഇത് ദുരുപയോഗം ചെയ്യപ്പെടാം. വോട്ട് ചെയ്യാതിരിക്കുക എന്നത് വ്യക്തിപരമായ തീരുമാനമാണെന്നും അത് രഹസ്യമായി സൂക്ഷിക്കുന്നത് നിങ്ങളുടെ വോട്ട് രഹസ്യമായി സൂക്ഷിക്കുന്നത് പോലെ തന്നെ പ്രധാനമാണെന്നും സുപ്രീം കോടതി വിധിച്ചു. വോട്ടർമാരുടെ വിവരങ്ങൾ രേഖപ്പെടുത്തുന്ന ഫോം 17 എ യ്ക്ക് സമാനമാണ് വീഡിയോ ഫൂട്ടേജ്. ആ ഫോം വളരെ പരിരക്ഷിതമാണ്, അതിനാൽ വീഡിയോയും അങ്ങനെ തന്നെ ആയിരിക്കണം. അനധികൃതമായി പങ്കുവയ്ക്കുന്നത് കുറ്റകൃത്യമാണ്: നിയമപരമായ അനുമതിയില്ലാതെ ആരാണ് വോട്ട് ചെയ്തത് (അല്ലെങ്കിൽ ചെയ്തില്ല) എന്ന് വെളിപ്പെടുത്തുന്നത് നിയമവിരുദ്ധമാണ്, കൂടാതെ ആർ‌പി ആക്ട് പ്രകാരം ജയിൽ ശിക്ഷയോ പിഴയോ ലഭിക്കാൻ സാധ്യതയുണ്ടെന്നും ഇലക്ഷൻ കമ്മിഷൻ അറിയിച്ചു.