March 28, 2023 Tuesday

Related news

March 2, 2023
June 23, 2022
August 26, 2021
August 24, 2020
August 17, 2020
August 14, 2020
April 7, 2020
March 20, 2020
March 19, 2020
March 19, 2020

കരുണയില്ലാതെ കേന്ദ്രം: ജപ്തി നടപടികൾ നിർത്തിവച്ച ഉത്തരവിന് സ്റ്റേ

Janayugom Webdesk
ന്യൂഡൽഹി
March 20, 2020 10:29 pm

കൊറോണ വൈറസ് ബാധയുടെ പശ്ചാത്തലത്തിൽ ജപ്തി നടപടികൾ നിർത്തിവെക്കണമെന്ന കേരള, അലഹബാദ് ഹൈക്കോടതികളുടെ ഉത്തരവുകൾ സുപ്രീം കോടതി സ്‌റ്റേ ചെയ്തു. കേന്ദ്ര സർക്കാരിന്റെ ആവശ്യം പരിഗണിച്ചാണ് സുപ്രീം കോടതി ഉത്തരവ്. ജസ്റ്റിസുമാരായ എ എം ഖാൻവിൽക്കർ, വിനീത് ശരൺ, അനിരുദ്ധ ബോസ് എന്നിവരടങ്ങിയ മൂന്നംഗ ബെഞ്ച് രണ്ട് ഹൈക്കോടതികളുടെയും ഉത്തരവും, പരിഗണനയിലുള്ള എല്ലാ നടപടികളും സ്റ്റേ ചെയ്തു. കോവിഡ് 19 ഭീഷണിയുള്ള സാഹചര്യത്തിൽ വായ്പാ, നികുതി കുടിശികകൾക്ക്‌ ജപ്തി നടപടികളും മറ്റും ഏപ്രിൽ ആറുവരെ നീട്ടിവയ്ക്കണമെന്നായിരുന്നു കേരള ഹൈക്കോടതിയുടെ ഉത്തരവ്.

ബാങ്ക്, മറ്റു ധനകാര്യ സ്ഥാപനങ്ങൾ, ആദായ നികുതി വകുപ്പ് അധികൃതർ, കെട്ടിട നികുതി ഈടാക്കുന്ന തദ്ദേശ സ്ഥാപനങ്ങൾ, ആർടി ഓഫീസുകൾ തുടങ്ങിയവയ്ക്കായിരുന്നു സിംഗിൾ ബെഞ്ചിന്റെ നിർദ്ദേശം. ഉത്തരവിനെതിരെ കേന്ദ്രസർക്കാർ സുപ്രീം കോടതിയെ സമീപിക്കുകയായിരുന്നു. സമാനരീതിയിലുള്ള ഉത്തരവാണ് അലഹബാദ് ഹൈക്കോടതിയും പുറപ്പെടുവിച്ചിരുന്നത്. ഉത്തരവുകൾ നടപ്പിലായാൽ രണ്ട് ലക്ഷം കോടി രൂപയുടെ സർക്കാരിന്റെ പ്രതിമാസ വരുമാന ശേഖരണത്തെ സാരമായി ബാധിക്കുമെന്ന് കേന്ദ്ര സർക്കാരിന്റെ ഹർജിയിൽ പറയുന്നു. കൊറോണ വൈറസ് ബാധയുടെ പേരിൽ രാജ്യത്തുടനീളം നികുതി അടയ്ക്കുന്നത് ഹൈക്കോടതികൾ മാറ്റിവച്ചതായി കേന്ദ്രസർക്കാരിനു വേണ്ടി ഹാജരായ സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു.

ജനങ്ങൾ നേരിടുന്ന ബുദ്ധിമുട്ടിനെക്കുറിച്ച് കേന്ദ്രം ബോധവാന്മാരാണെന്നും ആർക്കും ബുദ്ധിമുട്ടുകൾ വരുത്താതെ ശരിയായ സംവിധാനം ആവിഷ്കരിക്കുമെന്നും മേത്ത പരമോന്നത കോടതിയെ അറിയിച്ചു. ആളുകൾക്ക് ഓൺലൈനായി പണമടയ്ക്കാൻ കഴിയും. ഇത്തരം ഒരു ഉത്തരവ് പാസാക്കേണ്ട ആവശ്യമില്ല. നികുതി അടയ്ക്കാൻ സന്നദ്ധത പ്രകടിപ്പിക്കുന്നവരെ തടയരുത്. നികുതി അടയ്ക്കുന്നതിൽ നിന്ന് ആളുകളെ തടയുന്നതിന് കോടതി ഉത്തരവ് ഉണ്ടാവാൻ പാടില്ലെന്ന് കേന്ദ്രസർക്കാർ വാദിച്ചു. കേന്ദ്ര, സംസ്ഥാന സർക്കാരുകളുടെയും ബാങ്കുകളുടെയും സർഫാസി നിയമത്തിലെ 14-ാം വകുപ്പ് പ്രകാരമുള്ള റിക്കവറി നടപടികൾ മാറ്റിവയ്ക്കാൻ, വിശാലവും എല്ലാവർക്കും ബാധകവുമാകുന്ന നിർദ്ദേശങ്ങൾ നൽകികൊണ്ട് ഹൈക്കോടതി അധികാരപരിധി മറികടന്നതായും തുഷാർ മേത്ത കോടതിയിൽ വാദിച്ചു.

കേന്ദ്ര സർക്കാരിന്റെ വാദം കേൾക്കാതെയാണ് ഹൈക്കോടതികൾ ഉത്തരവുകൾ പാസാക്കിയതെന്ന് നിരീക്ഷിച്ച ബെഞ്ച് ഹൈക്കോടതികൾക്ക് മുന്നിൽ ഹർജി സമർപ്പിച്ച കക്ഷികൾക്ക് നോട്ടീസയക്കുകയും ചെയ്തിട്ടുണ്ട്. അതേസമയം അഞ്ചു സെന്റിന് താഴെ ഭൂമിയിലുള്ള കിടപ്പാടം ജപ്തി ചെയ്യരുതെന്ന സംസ്ഥാന സർക്കാരിന്റെ മുൻനിർദേശം പാലിക്കണമെന്ന് സഹകരണ ബാങ്കുകൾക്ക് സംസ്ഥാന സർക്കാർ നിർദ്ദേശം നൽകിയിരുന്നു.

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.

Comments are closed.