Web Desk

November 22, 2021, 4:00 am

സുരേഷ്ഗോപി ചിത്രം ‘കാവല്‍’ 25ന്

Janayugom Online

സുരേഷ്‌ഗോപി ചിത്രം ‘കാവല്‍’ 25ന് തിയേറ്ററുകളിലെത്തും. നിഥിന്‍ രഞ്ജി പണിക്കര്‍ സംവിധാനം ചെയ്യുന്ന ചിത്രത്തില്‍ സുരേഷ് ഗോപിക്കൊപ്പം പ്രധാന വേഷത്തില്‍ രഞ്ജി പണിക്കരും എത്തുന്നു. ഹൈറേഞ്ചിലെ പശ്ചാത്തലത്തിലാണ് ഈ ആക്ഷന്‍ ഫാമിലി ഡ്രാമ ഒരുക്കിയിട്ടുള്ളത്. ഏറെ നാള്‍ സിനിമയില്‍ നിന്നൊഴിഞ്ഞുനിന്ന സുരേഷ്ഗോപി അനൂപ് സത്യന്റെ ‘വരനെ ആവശ്യമുണ്ട്’ എന്ന ചിത്രത്തിലൂടെയാണ് വീണ്ടും സജീവമായത്. ‘കാവല്‍’ 2020 ജനുവരിയില്‍ ചിത്രീകരണം ആരംഭിച്ചെങ്കിലും ലോക്‌‌‍‌ഡൗണിനെ തുടര്‍ന്ന് നിറുത്തിവയ്ക്കുകയായിരുന്നു. ‘കസബ’യ്ക്ക് ശേഷം നിഥിന്‍ രഞ്ജി പണിക്കരുടെ സംവിധാന സംരംഭമാണിത്.

‘നിങ്ങള്‍ക്കുമാകാം കോടീശ്വരന്‍’ അഞ്ചാം സീസണില്‍ എത്തിയ സന്തോഷ് എന്ന യുവാവ് ചിത്രത്തില്‍ പാടുന്നു എന്ന പ്രത്യേകതയുമുണ്ട്. ശാരീരിക വിഷമതകളുള്ള ഈ യുവാവ് ‘കോടീശ്വരന്‍’ പരിപാടിക്കിടെ ‘ശ്രീരാഗമോ’ എന്ന ഗാനം ആലപിച്ചപ്പോള്‍ സിനിമയില്‍ പാടാന്‍ അവസരം നല്‍കുമെന്ന് അവതാരകനായ സുരേഷ്ഗോപി വാഗ്‌ദാനം നല്‍കിയിരുന്നു. ‘കാര്‍മേഘം മൂടുന്നു’ എന്ന ഗാനമാണ് ആലപിക്കുന്നത്. ബി കെ ഹരിനാരായണന്റെ വരികള്‍ക്ക് സംഗീതം പകര്‍ന്നിരിക്കുന്നത് ‘ജോസഫി‘ലൂടെ ശ്രദ്ധേയനായ രഞ്ജിന്‍ രാജാണ്. നിഖില്‍ എസ് പ്രവീണാണ് ഛായാഗ്രാഹകന്‍. ലാല്‍, സുരേഷ്‌‌കൃഷ്ണ, ശ്രീജിത് രവി, രാജേഷ് ശര്‍മ്മ, കണ്ണന്‍ രാജന്‍ പി ദേവ്, റേച്ചല്‍ ഡേവിഡ്, ഐ എം വിജയന്‍, ദൃശ്യം ഫെയിം അഞ്ജലിനായര്‍, മുത്തുമണി, ഇവാന്‍ അനില്‍, ബേബി പാര്‍വതി എന്നിവരടങ്ങുന്ന താരനിരയുമുണ്ട്.