Web Desk

കൊച്ചി

December 20, 2019, 6:53 pm

ഇന്ത്യയിൽ മാധ്യമ പ്രവർത്തകർ ഭയപ്പാടിന്റെ നിഴലിലാണെന്ന് മുതിർന്ന മാധ്യമ പ്രവർത്തകൻ ഡോ. സെബാസ്റ്റ്യൻ പോൾ

Janayugom Online

ഇന്ത്യയിൽ മാധ്യമ പ്രവർത്തകർ ഭയപ്പാടിന്റെ നിഴലിലാണെന്നും കർണാടക സംഭവങ്ങൾ എപ്പോൾ എവിടെയും ആവർത്തിക്കാമെന്നും മുതിർന്ന മാധ്യമ പ്രവർത്തകൻ ഡോ. സെബാസ്റ്റ്യൻ പോൾ. മംഗളുരുവിൽ മലയാളികൾ ഉൾപ്പെടെയുള്ള മാധ്യമ പ്രവർത്തകരെ പൊലീസ് കസ്റ്റഡിയിലെടുത്തതിനെതിരെ എറണാകുളം പ്രസ് ക്ലബ് സംഘടിപ്പിച്ച പ്രതിഷേധ യോഗത്തിൽ സംസാരിക്കുകയായിരുന്നു അദ്ദേഹം.

അടിയന്തിരാവസ്ഥയെ എതിർത്ത പ്രസ്ഥാനത്തിന്റെ പിൻമുറക്കാരാണ് ഇപ്പോൾ രാജ്യം ഭരിക്കുന്നത്. പൗരത്വ ഭേദഗതി നിയമത്തിനെതിരെയുള്ള പ്രക്ഷോഭങ്ങൾ റിപ്പോർട്ട് ചെയ്യുന്ന മാധ്യമ പ്രവർത്തകരെ തടങ്കലിലിടുന്നത് ജനാധിപത്യ വിരുദ്ധമാണ്. വിഭജന നീക്കങ്ങൾക്കെതിരെയുള്ള പ്രക്ഷോഭങ്ങളെ നുണകൊണ്ട് പ്രതിരോധിക്കാനാവില്ല. മംഗളുരുവിലെ മാധ്യമ പ്രവർത്തകരുടെ അറസ്റ്റിനെക്കുറിച്ച് പ്രസ് കൗൺസിൽ ഓഫ് ഇന്ത്യ നിലപാട് വ്യക്തമാക്കണമെന്നും ഡോ. സെബാസ്റ്റ്യൻ പോൾ പറഞ്ഞു. എറണാകുളം പ്രസ് ക്ലബ് പ്രസിഡണ്ട് ഫിലിപ്പോസ് മാത്യു അധ്യക്ഷനായി. സെക്രട്ടറി പി ശശികാന്ത്, കെയുഡബ്ല്യുജെ സംസ്ഥാന സെക്രട്ടറി ഷബ്ന സിയാദ്, സംസ്ഥാന കമ്മിറ്റി അംഗങ്ങളായ ആർ ഗോപകുമാർ, അബ്ദുള്ള മട്ടാഞ്ചേരി എന്നിവർ സംസാരിച്ചു. തുടർന്ന് പ്രസ് ക്ലബിൽ നിന്നും വനിതകൾ ഉൾപ്പെടെയുള്ള മാധ്യമ പ്രവർത്തകർ എറണാകുളം ബിഎസ്എൻഎൽ ഓഫീസ് പരിസരത്തേക്ക് മാർച്ച് നടത്തി