Web Desk

ചെന്നെെ

May 18, 2021, 9:42 am

കോവിഡില്‍ നിന്ന് രക്ഷനേടാൻ ആവി പിടിക്കരുത്: തമിഴ്നാട് ആരോഗ്യമന്ത്രി

Janayugom Online

കോവിഡില്‍ നിന്ന് രക്ഷ നേടാൻ ഡോക്​ടറുടെ നിർദ്ദേശപ്രകാരമല്ലാതെ ആവി പിടിക്കരുതെന്ന മുന്നറിയിപ്പുമായി തമിഴ്​നാട്​ ആരോഗ്യമന്ത്രി മാ സുബ്രഹ്മണ്യൻ. ആവി പിടിക്കുന്നത് കോവിഡ് പ്രോട്ടോകോളിന്റെ ഭാഗമല്ലെന്നും ആവിയോ മർദ്ദമുള്ള വായുവോ ശ്വസിക്കുന്നത്​ ശ്വാസകോശത്തിന്​ കേടു വരുത്തുമെന്നും അദ്ദേഹം ചൂണ്ടിക്കാട്ടി.

തമിഴ്‌നാട്ടിൽ പൊതുയിടങ്ങളിൽ ആവി പിടിക്കാനുള്ള സംവിധാനങ്ങളൊരുക്കിയതിൻറെ ചിത്രങ്ങൾ സമൂഹമാധ്യമങ്ങളിൽ പ്രചരിച്ചിരുന്നു. ഈ പശ്ചാത്തലത്തിലാണ് ആരോഗ്യമന്ത്രിയുടെ മുന്നറിയിപ്പ്.

റെയിൽവെ പൊലീസ് ആവി പിടിക്കുന്നതിനായി സെൻട്രൽ റെയിൽവെ സ്റ്റേഷനിൽ നിരവധി നെബുലൈസറുകളാണ് സ്ഥാപിച്ചത്. ഒരേ നെബുലൈസർ പലരും ഉപയോഗിക്കുന്നത്​ വൈറസ്​ ബാധയേൽക്കാൻ സാധ്യത വർധിപ്പിക്കുമെന്ന്​ ആരോപിച്ച്​ ആരോഗ്യ വിദഗ്​ദരും​ ​ രംഗത്തെത്തിയിരുന്നു.

ലക്ഷണങ്ങളില്ലാത്ത കോവിഡ്​ രോഗികളിൽ നിന്ന്​ മറ്റുള്ളവരിലേക്ക്​ രോഗം പടരാൻ ഇത്തരം പ്രവർത്തനങ്ങൾ ഇടയാക്കുമെന്നും അതിനാൽ പൊതുയിടങ്ങളിൽ ഒരിടത്തും ഇത്തരത്തിൽ നെബുലൈസറുകൾ സ്ഥാപിക്കരുതെന്നും​ മാ സുബ്രഹ്മണ്യൻ അഭ്യർഥിച്ചു. കോവിഡ് ലക്ഷണങ്ങളുള്ളവർ എത്രയും പെട്ടെന്ന് ആരോഗ്യപ്രവർത്തകരെ ബന്ധപ്പെടുകയാണ് വേണ്ടത്. സ്വയം ചികിത്സയിലേക്ക് നീങ്ങുന്നത് അപകടം വരുത്തിവെക്കുമെന്നും അദ്ദേഹം പറഞ്ഞു.

ENGLISH SUMMARY;Tamilnadu govt warns peo­ple against inhal­ing steam to pre­vent Covid-19

YOU MAY ALSO LIKE THIS VIDEO;