നരേന്ദ്ര മോഡി സർക്കാരിന്റെ ഭരണത്തിൽ കേന്ദ്ര പദ്ധതികൾക്ക് കീഴിലുള്ള ഭിന്നശേഷിക്കാരുടെ പരിശീലനത്തിലും ജോലിയിലും ഗണ്യമായ ഇടിവെന്ന് കണക്കുകൾ. രാജ്യത്തെ തൊഴിൽരഹിതരായ 1.3 കോടി ഭിന്നശേഷിക്കാരിൽ 34 ലക്ഷം പേർ മാത്രമാണ് ഇപ്പോൾ ജോലി ചെയ്യുന്നതെന്ന് കേന്ദ്ര സഹമന്ത്രി പ്രതിമ ഭൗമിക് ലോക്‌സഭയെ അറിയിച്ചു.
2011ലെ സെൻസസ് പ്രകാരം 2.68 കോടി ഭിന്നശേഷിക്കാരുണ്ട്. ഇതിൽ കാഴ്ച, ശ്രവണ, ചലനശേഷി, മാനസിക വെല്ലുവിളി നേരിടുന്നവർ ഉൾപ്പെടുന്നു. ഈ സെൻസസ് പ്രകാരം 36 ശതമാനം ഭിന്നശേഷിക്കാർ തൊഴിലെടുക്കുന്നുണ്ട്.
യുവാക്കൾക്ക് നൈപുണ്യാധിഷ്ഠിത പരിശീലനത്തിനായുള്ള പ്രധാനമന്ത്രി കൗശൽ വികാസ് യോജന (പിഎംകെവിവൈ)യിൽ പരിശീലനം ലഭിച്ചവരുടെ എണ്ണത്തിൽ 2014–19 വർഷങ്ങളിൽ വർധനവുണ്ടായിട്ടുണ്ട്. 2015–16 ൽ 305 ആയിരുന്നത് 2019 ൽ 22,852 ആയി. എന്നാൽ തുടർന്നുള്ള വർഷങ്ങളിൽ ഈ എണ്ണം കുത്തനെ കുറഞ്ഞു. 2020–21 ൽ 8,563 ആയും 2021–22 ൽ 246 ആയും കുറഞ്ഞു. ഈ വർഷം ഇതുവരെ 50 പേർക്ക് മാത്രമേ പരിശീലനം ലഭിച്ചിട്ടുള്ളൂ. 2019–20 നും 21–22 നും ഇടയിൽ ഏകദേശം 99 ശതമാനമാണ് കുറവ്.
പിഎംകെവിവൈയുടെ കീഴിൽ ജോലി ലഭിച്ച ഭിന്നശേഷിക്കാരുടെ എണ്ണം 2019–20 ൽ 10, 474 ആയിരുന്നത് 2020–21ൽ 2,428 ആയും 2021–22ൽ 2,416 ആയും കുറഞ്ഞു. കോവിഡ് അടച്ചിടലിന് ശേഷവും സ്ഥിതിയിൽ കാര്യമായ പുരോഗതി ഉണ്ടായിട്ടില്ല. ഈ വർഷം പദ്ധതിയുടെ പ്രകടനം ഏറെ പരിതാപകരമാണ്. പരിശീലനം നേടിയ രണ്ട് പേർക്ക് മാത്രമാണ് ജോലി ലഭിച്ചത്.
ദേശീയ വികലാംഗ ധനകാര്യ വികസന കോർപ്പറേഷന് (എൻഎച്ച്എഫ്ഡിസി) കീഴിൽ പരിശീലനം ലഭിച്ച ഭിന്നശേഷിക്കാരുടെ എണ്ണം 2018–19 ൽ 54,001 ആയിരുന്നു. എന്നാൽ 2019–20 ൽ 2,742 ആയി കുറഞ്ഞു. 2020–21 ൽ 98 ശതമാനം കുറഞ്ഞ് 1,156 ആയി.
പരിശീലനം പൂർത്തിയാക്കിയ ഭിന്നശേഷിക്കാരുടെ എണ്ണവും ഇതേ അവസ്ഥയിലാണ്. 2016–17ൽ പദ്ധതി പ്രകാരം 11,208 പേർക്ക് ജോലി കിട്ടിയപ്പോൾ 2019–20 ൽ 1,867 തൊട്ടടുത്ത വർഷങ്ങളിൽ യഥാക്രമം 357 ഉം 361 ഉം ആയി ചുരുങ്ങി. എന്നാൽ ദേശീയ വികലാംഗ ധനകാര്യ വികസന കോർപ്പറേഷന് 1997 മുതൽ ഇക്വിറ്റിയായി 399.99 കോടി രൂപ അനുവദിച്ചതായി മന്ത്രി പറഞ്ഞു.

English Summary: The employment of differently-abled people has also decreased in the Modi administration