Tuesday
12 Nov 2019

മാന്ദ്യത്തിന് പരിഹാരം കോര്‍പ്പറേറ്റ് പ്രീണനമല്ല ഗ്രാമീണ,അസംഘടിത മേഖലകളുടെ ഉത്തേജനമാണ്

By: Web Desk | Wednesday 16 October 2019 10:36 PM IST


 ആഗോള മുതലാളിത്ത സമ്പദ്‌വ്യവസ്ഥയെ മാെത്തത്തില്‍ അടിമുടി ബാധിച്ച 2008ലെ ധനകാര്യ പ്രതിസന്ധിയെ സംബന്ധിച്ച് ഐഎംഎഫ് മാത്രമല്ല, ലോക പ്രസിദ്ധി നേടിയ നിരവധി ധനകാര്യ, ബാങ്കിംഗ് മേഖലാ വിദഗ്ധന്മാരും ആണയിട്ട് അഭിപ്രായപ്പെട്ടത്, ഇത്തരമൊരു പ്രതിസന്ധി മേലില്‍ ആവര്‍ത്തിക്കുകയില്ലെന്നായിരുന്നു. മാത്രമല്ല, ആഗോള സമ്പദ് വ്യവസ്ഥ മാന്ദ്യപ്രതിസന്ധിയില്‍ നിന്നും അതിവേഗം മറിക്കടക്കുമെന്നും അവരെല്ലാം ഏക സ്വരത്തില്‍ പ്രഖ്യാപിക്കുകയും ചെയ്തിരുന്നു. എന്നാല്‍ ഇപ്പോള്‍ പറഞ്ഞു കേള്‍ക്കുന്നത് ആഗോള സമ്പദ്‌വ്യവസ്ഥ ഒരിക്കല്‍ക്കൂടി മാന്ദ്യ പ്രതിസന്ധിയിലേക്ക് നീങ്ങിക്കൊണ്ടിരിക്കുകയാണെന്നാണ്.

ഇന്ത്യയെ സംബന്ധിച്ചിടത്തോളം 2008ലെ ധനകാര്യ പ്രതിസന്ധി ഗുരുതരമായി ബാധിക്കുകയുണ്ടായില്ലെന്നായിരുന്നു അനുഭവം. കാരണം ഇന്ത്യയില്‍ അതിശക്തമായ അടിത്തറയോടുകൂടിയ ഒരു പൊതുമേഖലാ ബാങ്കിംഗ് ധനകാര്യവ്യവസ്ഥ നിലവിലുണ്ടായിരുന്നു എന്നതു തന്നെയാണ്. മാത്രമല്ല, ഇന്ത്യയുടെ സാമ്പത്തിക അടിത്തറ ആകെത്തന്നെ ശക്തമായൊരു നിലയിലുമായിരുന്നു. ഇത്തരമൊരു പശ്ചാത്തലത്തിന് കളമൊരുക്കിയതില്‍ നെഹ്‌റുവിയന്‍ സാമ്പത്തിക വീക്ഷണത്തോടെ ആസൂത്രണ കമ്മിഷന്‍ തയ്യാറാക്കിയ ആസൂത്രണ പദ്ധതികള്‍ക്കും അതിന്റേതായൊരു പങ്ക് വഹിക്കാനുമുണ്ടായിരുന്നു.
എന്നാല്‍, ഇന്നത്തെ സ്ഥിതി ഇതല്ല. ഇന്ത്യയെ പോലൊരു വികസ്വര രാജ്യത്ത് സ്‌റ്റേറ്റിന്റെ മേല്‍നോട്ടത്തിലല്ലാതെ അതിശക്തമായൊരു സ്വകാര്യ കോര്‍പ്പറേറ്റ് മേഖല 1990 കള്‍ക്കു ശേഷം വളര്‍ന്നു വികസിച്ചുവന്നതായൊരു യാഥാര്‍ഥ്യം നാം വിസ്മരിക്കരുത്. ലാഭേഛമാത്രം ലാക്കാക്കി പ്രവര്‍ത്തനം നടത്തി വരുന്ന ഒരു സ്വകാര്യ മേഖലക്ക് എത്ര നിസാരമായൊരു ‘ഷോക്ക്’പോലും ആഗോള സമ്പദ്‌വ്യവസ്ഥയുടെ ബലഹീനതയുടെ ഫലമായുണ്ടായാല്‍ അത് നേരിടാന്‍ കഴിഞ്ഞേക്കില്ല. ഉദാരീകരണ നയങ്ങള്‍ സമ്പദ്‌വ്യവസ്ഥയെ ആകെത്തന്നെ ഗ്രസിച്ചു കഴിഞ്ഞിരിക്കുന്ന സാഹചര്യത്തില്‍ സ്‌റ്റേറ്റിന്റെ ഇടപെടലുകള്‍ക്കും പരിമിതിയുണ്ട്. വിവിധ വികസനമേഖലകളെ നിയന്ത്രിക്കുക വിപണി ശക്തികളായിരിക്കുമല്ലോ. ആസൂത്രണ കമ്മിഷനു പകരക്കാരനായി എത്തിയിരിക്കുന്ന നിതി ആയോഗിനും ഒരു പരിധിക്കപ്പുറം വിപണി ശണ്ടക്തികള്‍ക്ക് കടിഞ്ഞാണിടാന്‍ സാധ്യമല്ല എന്ന യാഥാര്‍ഥ്യം നിതി ആയോഗ് മുന്‍ ഉപാദ്ധ്യക്ഷന്‍ പ്രൊഫ. അരവിന്ദ് പനഗാരിയും അദ്ദേഹത്തിന്റെ പിന്‍ഗാമിയായ ഡോ.രാജീവ്കുമാറും തുറന്നു സമ്മതിച്ചിട്ടുമുണ്ടല്ലോ, ഇത്തരമൊരു സാഹചര്യം മനസില്‍ കണ്ടുകൊണ്ടുവേണം ഇന്ത്യന്‍ സമ്പദ് വ്യവസ്ഥയുടെ നിലവിലുള്ള വികസന പ്രതിസന്ധി വിലയിരുത്താന്‍. സാമ്പത്തിക വികസനത്തിന്റെ ആദ്യത്തെ ഏഴുപതിറ്റാണ്ടുകളിലെ അനുഭവങ്ങള്‍, അവ നേട്ടങ്ങളുടേതായാലും, കോട്ടങ്ങളുടേതായാലും, വേണ്ടത്ര സൂക്ഷ്മതയോടെ വിലയിരുത്തേണ്ടതും കാലഘട്ടത്തിന്റെ ശാസ്ത്രീയവും, വസ്തുനിഷ്ഠവുമായ വിശകലനത്തിന് അനിവാര്യമാണ്. ഒരു കാര്യത്തില്‍ തര്‍ക്കമുണ്ടാവേണ്ട കാര്യമില്ല. ഇന്ത്യന്‍ സമ്പദ്‌വ്യവസ്ഥയുടെ വളര്‍ച്ചാ നിരക്ക് പിന്നിട്ട അഞ്ചു പാദങ്ങളില്‍ തുടര്‍ച്ചയായി താഴോട്ടുതന്നെ പൊയ്‌ക്കൊണ്ടിരിക്കുകയാണ്. തുടക്കം എട്ട് ശതമാനത്തില്‍ നിന്നായിരുന്നു. പിന്നീട് ഏഴ് ശതമാനം, 6.6 ശതമാനം, 5.8 ശതമാനം എന്നിങ്ങനെ താഴോട്ട് ചലിച്ച് അഞ്ച് ശതമാനത്തിലെത്തി നില്‍ക്കുന്നു. രസകരമായൊരു വസ്തുത എന്തെന്നോ? വളര്‍ച്ചാ നിരക്കിന്റെ ഗതി ഏതു ദിശയിലേക്കാണെന്ന് കൃത്യമായി ബോധ്യമുണ്ടെങ്കിലും, അത് അംഗീകരിക്കാന്‍ അധികൃതര്‍ ആരും തന്നെ സന്നദ്ധമല്ലെന്നതാണിത്. വളര്‍ച്ചാനിരക്കിന്റെ പോക്ക് ഇപ്പോള്‍ താഴോട്ടാണെങ്കിലും, ഉടനടി ഇതില്‍ മാറ്റമുണ്ടാകുമെന്ന് ആവര്‍ത്തിക്കുക മാത്രമാണ് ചെയ്യുന്നത്. അതിന്റെ യുക്തി എന്തെന്ന് അവര്‍ വ്യക്തമാക്കുന്നുമില്ല.

2019 ജൂലൈയില്‍ പുറത്തുവന്ന സാമ്പത്തിക സര്‍വെയില്‍ പരാമര്‍ശിക്കപ്പെട്ട ജിഡിപി നിരക്ക് ഏഴ് ശതമാനമായിരുന്നു. തൊട്ടടുത്ത മാസം ഓഗസ്റ്റില്‍ ആര്‍ബിഐയുടെ കണ്ടെത്തല്‍ നേരത്തെയുള്ള ഏഴ് ശതമാനത്തില്‍ തിരുത്തല്‍ വരുത്തിയതിനുശേഷം ഇത് 6.9 ശതമാനം മാത്രമായിരിക്കുമെന്നായിരുന്നു. ഏഷ്യന്‍ വികസന ബാങ്ക് (എഡിബി) അതിന്റെ പ്രവചനം 7.2 ശതമാനമായിരുന്നത് 2019 ഏപ്രില്‍ മാസത്തില്‍ തന്നെ ഏഴ് ശതമാനത്തിലേക്ക് താഴ്ത്തി. ഐഎംഎഫ് ഉം ചെയ്തത് ജിഡിപി നിരക്ക് 7.3 ല്‍ നിന്ന് ഏഴ് ശതമാനത്തിലേക്ക് താഴ്ത്തുകയായിരുന്നു. എന്നാല്‍, ഒരു വര്‍ഷം തികയുന്നതിനു മുമ്പുതന്നെ ഈ കണക്കുകൂട്ടലുകളെല്ലാം തെറ്റിച്ചുകൊണ്ട് ജിഡിപി നിരക്ക് അഞ്ച് ശതമാനത്തിലെത്തിയിരിക്കുന്നു. ഈ പ്രവണത പ്രതിസന്ധിയുടേതല്ലെങ്കില്‍, മറ്റെന്താണ്? പ്രവചനവുമായി രംഗത്തുവന്നവരെല്ലാം എന്തേ സമാനമായ തോതില്‍ തിരുത്തലുകള്‍ക്കും തയ്യാറായി? ഈ സംശയത്തിന് കാരണമുണ്ട്. നേരത്തെ സൂചിപ്പിച്ച എല്ലാ ഏജന്‍സികളും സ്ഥിതിവിവര കണക്കുകള്‍ക്കുള്ള മൗലിക രേഖകളായി ആശ്രയിക്കുന്നത് ഔദ്യോഗിക സ്രോതസുകളെ തന്നെയാണ്. ഔദ്യോഗിക കണക്കുകളുടെ അടിസ്ഥാനത്തില്‍ വിശകലനം നടത്തുകയും നിഗമനങ്ങളില്‍ എത്തുകയും ചെയ്യുക എന്നതുമാത്രമാണ് ബാഹ്യ ഏജന്‍സികളുടെ പണി. ഇതിന്റെ അര്‍ഥം അധികാരത്തിലിരിക്കുന്നവര്‍ക്ക് മെച്ചപ്പെട്ടൊരു പ്രതിഛായ സൃഷ്ടിക്കുന്നതിനാവശ്യമായ കണക്കുകള്‍ മാത്രമാണ് ഈ ഏജന്‍സികള്‍ക്ക് ലഭിക്കുന്നുള്ളു എന്നതാണ്. അതായത് സമ്പദ്‌വ്യവസ്ഥയില്‍ യഥാര്‍ഥത്തില്‍ നിലവിലുള്ള ജിഡിപി നിരക്ക് എത്രയാണെന്ന്, അനൗദ്യോഗികമായി ചോര്‍ന്നു കിട്ടുമ്പോള്‍ മാത്രമേ പൊതുജനം അറിയുന്നുള്ളൂ. അല്ലെങ്കില്‍, വിവരാവകാശ നിയമത്തിലൂടെ അതി വിദഗ്ധമായി സത്യം പുറത്തു കൊണ്ടുവരാന്‍ ആരെങ്കിലും തുനിഞ്ഞിറങ്ങണം. മറിച്ചാണെങ്കില്‍, സര്‍ക്കാര്‍ കൃത്രിമമായി പടച്ചുണ്ടാക്കിയ കണക്കുകള്‍ തന്നെ നാം വിശ്വസിക്കാന്‍ നിര്‍ബന്ധിതരാകും.
മാന്ദ്യത്തിന്റെ പ്രതിഫലനമെന്ന നിലയിലാണ് നിക്ഷേപ നിരക്ക് നിരവധി വര്‍ഷങ്ങളായി 30 ശതമാനത്തില്‍ തന്നെ തുടരുന്നത്. മാന്ദ്യത്തിന് വഴിവച്ചിരിക്കുന്നത് ഡിമാന്‍ഡിലെ ശക്തമായ ഇടിവാണ്. സ്വാഭാവികമായും ഉല്‍പാദനശേഷി പരമാവധി 75 ശതമാനത്തില്‍ തളക്കപ്പെട്ട നിലയിലാണ്. ഈ സാഹചര്യത്തില്‍ പുതിയ നിക്ഷേപങ്ങള്‍ വഴി കൂടുതല്‍ ഉല്‍പാദനശേഷി സൃഷ്ടിക്കപ്പെട്ടാല്‍, അതും വിനിയോഗിക്കപ്പെടാതിരിക്കുകയായിരിക്കും ചെയ്യുക. ഇണ്ടതേത്തുടര്‍ന്ന് നിഷ്‌ക്രിയമായ ശേഷിയുടെ തോത് 75 ശതമാനത്തിലും ഏറെയാകും. 2019 ജൂണ്‍ മാസത്തില്‍, ഓഹരി വിപണി അഭുതപൂര്‍വമായ ഊര്‍ജ്ജസ്വലത കൈവരിച്ചിരുന്നെങ്കിലും നിക്ഷേപ നിരക്ക് ഉയരുകയുണ്ടായില്ല. സെന്റര്‍ ഫോര്‍ മോണിറ്റിങ് ഇന്ത്യന്‍ ഇക്കോണമി (സിഎംഐഇ)യുടെ സ്ഥിതിവിവരക്കണക്കുകള്‍ കാണിക്കുന്നത്, നിക്ഷേപങ്ങള്‍ക്കായുള്ള അപേക്ഷകളുടെ എണ്ണത്തില്‍ 14 വര്‍ഷത്തിനിടെ ഏറ്റവും താണ നിലവാരത്തിലെത്തിയിരുന്നതായിട്ടാണ്. ആര്‍ബിഐ ആണെങ്കില്‍, നിക്ഷേപ പ്രോത്സാഹനാര്‍ഥം 2018 ല്‍ മാത്രം പലിശ നിരക്കുകളില്‍ നാലുവട്ടം കുറവാണ് വരുത്തിയത് മൊത്തം ഒരു ശതമാനം എന്നാല്‍, നിക്ഷേപത്തില്‍ നേരിയ വര്‍ധന പോലുമുണ്ടായില്ല.
ഇന്ത്യന്‍ സമ്പദ്‌വ്യവസ്ഥയില്‍ മാന്ദ്യമില്ലെന്നും നിക്ഷേപ തകര്‍ച്ചയില്ലെന്നും സര്‍ക്കാര്‍ തലത്തിലുള്ള ഔദ്യോഗിക വക്താക്കള്‍ വാദിക്കുമ്പോള്‍, രതിന്റോയ്, ഷമിക രവി എന്നിവര്‍ക്കു പുറമെ നിതി ആയോഗ് ഉപാദ്ധ്യക്ഷകന്‍ ഡോ. രാജീവ് കുമാറും ആര്‍ബിഐ ഗവര്‍ണ്ണര്‍ ശക്തികാന്ത് ദാസും വിരുദ്ധ നിലപാടിലാണ്. ഏതായാലും സമ്പദ് വ്യവസ്ഥയിലെ നിജസ്ഥിതി വെളിപ്പെടുത്തിയതിന്റെ പേരില്‍ പ്രധാനമന്ത്രിയുടെ സാമ്പത്തിക ഉപദേശക സമിതി അംഗങ്ങളായിരുന്ന രതിന്‍ റോയ്ക്കും ഷമിക രവിക്കും തല്‍സ്ഥാനങ്ങള്‍ നഷ്ടമായിരിക്കുന്നു.
ധനമന്ത്രി നിര്‍മ്മല സീതാരാമന്‍ ബജറ്റ് അവതരണത്തിനുശേഷം മനസില്ലാ മനസോടെയാണെങ്കിലും മാന്ദ്യത്തെ നേരിടുന്നതിനും നിക്ഷേപ പ്രോത്സാഹനത്തിനുമായി നാലു ഘട്ടങ്ങളിലായി ഉത്തേജകപാക്കേജുകള്‍ പ്രഖ്യാപിക്കാന്‍ നിര്‍ബ്ബന്ധിതമായിരിക്കയാണല്ലോ. സമ്പൂര്‍ണ്ണ ബജറ്റ് അവതരണ വേളയില്‍ തന്നെ മാന്ദ്യത്തിന്റെ ലക്ഷണങ്ങള്‍ പ്രകടമായിരുന്നെങ്കിലും അണ്ടതെല്ലാം കണ്ടില്ലെന്നു നടിക്കുകയാണ് ധനമന്ത്രി ചെയ്തതെന്ന് ഇതിലൂടെ വ്യക്തമാണ്. സാധാരണ നിലയിലുള്ള ബാങ്ക് വായ്പകള്‍കൊണ്ട് നിക്ഷേപമേഖലക്ക് ജീവന്‍ പകരാന്‍ കഴിയില്ലെന്ന ബോധ്യത്തിലാകുമല്ലോ. ബാങ്ക് ദേശസാല്‍ക്കരണത്തിനു ശേഷം അന്നത്തെ പ്രധാനമന്ത്രി ഇന്ദിരാഗാന്ധി സര്‍ക്കാര്‍ വായ്പാമേളകള്‍ സംഘടിപ്പിച്ചതിനെ നഖശിഖാന്തം എതിര്‍ത്തിരുന്ന ബിജെപി അടക്കമുള്ള എന്‍ഡിഎ ഘടകകക്ഷികള്‍ എന്തേ പുതിയ വായ്പാമേളകളെ സര്‍വ്വാത്മന സ്വാഗതം ചെയ്തിരിക്കുന്നു. മോഡി സര്‍ക്കാര്‍ വിഭാവനം ചെയ്തിരിക്കുന്ന വായ്പാമേളകളുടെ സവിശേഷതകള്‍ ഒന്നു വേറെ തന്നെയാണ്.

ഒന്ന്, രാജ്യത്താകെയുള്ള 400 ജില്ലകളില്‍ വായ്പാക്യാമ്പുകള്‍ അഥവ പ്രഹല്‍മേളാ ക്യാമ്പുകള്‍ സംഘടിപ്പിക്കുക. രണ്ട്, ആദ്യഘട്ട മേള 2019 ഒക്ടോബര്‍ മൂന്ന് മുതല്‍ ഏഴ് വരെയായിരിക്കും നടക്കുക. ലക്ഷ്യം 90 ജില്ലകളാണ്. രണ്ടാം ഘട്ടത്തില്‍ ഒക്ടോബര്‍ 21, 25 തീയതികളിലായിരിക്കും സംഘടിപ്പിക്കുക. ലക്ഷ്യം എത്ര ജില്ലകളെന്ന് നിജപ്പെടുത്തിയിട്ടില്ല. മൂന്ന്, ധനമന്ത്രി ബാങ്കുകളോട് ആവശ്യപ്പെട്ടിരിക്കുന്നത് നിലവിലുള്ള ഓരോ ഇടപാടുകാരനും, പുതുതായി അഞ്ച് പുതിയ ഇടപാടുകാര്‍ എന്ന തോതിലായിരിക്കണം ഗുണഭോക്താക്കള്‍. നാല്, വായ്പാക്യാമ്പുകള്‍ ടെന്റുകള്‍ കെട്ടി ഉയര്‍ത്തിയോ, കമ്മ്യൂണിറ്റി ഹാളുകളിലോ ആയിരിക്കണം നടത്തേണ്ടത്. അഞ്ച്, സ്വകാര്യ ബാങ്കുകളും, ബാങ്ക് ഇതര സ്ഥാപനങ്ങളും വായ്പാ മേളകളില്‍ പങ്കെടുക്കണം.
ധനമന്ത്രാലയം, ആര്‍ബിഐയുടെ സഹകരണത്തോടെ തയ്യാറാക്കിയ ഈ പദ്ധതിയുടെ ഭാഗമായി ആദ്യ ദിവസം, 2019 ഒക്ടോബര്‍ മൂന്നിന്, നൂറുകണക്കിന് ഇടപാടുകാര്‍ക്ക് വായ്പകള്‍ വിതരണം ചെയ്യപ്പെട്ടു എന്നാണ് ബാങ്കുകളുടെ അവകാശവാദം. ഒരാള്‍ക്കുപോലും ക്യാമ്പില്‍ വച്ചുതന്നെ വായ്പ ലഭ്യമായതായി അറിയില്ല. അപേക്ഷകള്‍ വിവിധ ബാങ്ക് ശാഖകളില്‍ പരിശോധനക്ക് വിധേയമാക്കപ്പെട്ടുവരുകയാണെന്ന് മാത്രം. അതായത് ‘ഓണ്‍ ദി സ്‌പോണ്ടട്ട്’ അനുമതി ക്യാമ്പില്‍ വച്ചുതന്നെ കിട്ടുമെന്നും, അപേക്ഷയുമായെത്തിയ ഇടപാടുകാരനായ അപേക്ഷകന് കാശു വാങ്ങി മടങ്ങിപ്പോകാം എന്ന ധാരണയാണ് പാളിപ്പോയത് എന്നര്‍ഥം.