October 1, 2022 Saturday

മുക്കുപണ്ടം പണയം വച്ച് പണം തട്ടിയ സംഘത്തിലെ മൂന്ന് പേര്‍ പിടിയിൽ

Janayugom Webdesk
അടിമാലി:
May 6, 2020 5:23 pm

അടിമാലി കമ്പളികണ്ടത്തെ സ്വകാര്യ പണമിടപാട് സ്ഥാപനത്തില്‍ മുക്കുപണ്ടം പണയം വച്ച് എണ്‍പത്തിരണ്ടായിരം രൂപ തട്ടിയ നാലംഗസംഘത്തിലെ മൂന്ന് പേര്‍ വെള്ളത്തൂവല്‍ പൊലീസിന്റെ പിടിയിലായി.കോതമംഗലം കോട്ടപ്പടി അയിരൂര്‍പാടം സ്വദേശി മാളിയേലില്‍ ജോസ്(42),വാരപ്പെട്ടി പാറേക്കുടിചാലില്‍ ബിജു (42),പനംകുട്ടി ചീങ്കല്ലേല്‍ ജോണി(47)എന്നിവരെയാണ് മുക്കുപണ്ടം പണയപ്പെടുത്തി പണം തട്ടിയകേസില്‍ അറസ്റ്റ് ചെയ്തിട്ടുള്ളത്.സംഘത്തിലുള്‍പ്പെട്ട മൂവാറ്റുപുഴ ആനിക്കാട് സ്വദേശി അപ്പക്കാളയെന്ന് വിളിക്കുന്ന രാഗേഷ് (36) പിടിയിലാകാനുണ്ട്.സംഭവവുമായി ബന്ധപ്പെട്ട് പൊലീസ് പറയുന്നതിങ്ങനെ: കേസില്‍ ഉള്‍പ്പെട്ടിട്ടുള്ള ബിജുവാണ് തട്ടിപ്പിന്റെ സൂത്രധാരന്‍. ഇയാള്‍ സ്ഥിരമായി മുക്കുപണ്ടം പണയം വക്കുകയും പണം തട്ടുകയും ചെയ്യുന്ന ആളാണ്.ഇയാളുടെ പേരില്‍ വിവിധ സ്റ്റേഷനുകളിലായി 16ഓളം കേസുകള്‍ നിലവിലുണ്ട്.സംഘത്തില്‍ ഉള്‍പ്പെട്ടിട്ടുള്ള നാല് പേരും പലയിടങ്ങളില്‍ വച്ച് പരിചയപ്പെട്ട് സൗഹൃദത്തിലായവരാണ്.ബിജുവിന്റെ ആസൂത്രണ പ്രകാരമായിരുന്നു ഇവര്‍ കമ്പളികണ്ടത്തും തട്ടിപ്പ് നടത്തിയത്.

കമ്പളികണ്ടത്തെ സ്ഥാപനം തട്ടിപ്പിനായി ഉപയോഗപ്പെടുത്താമെന്ന വിവരം കൈമാറിയത് പനംകുട്ടി സ്വദേശിയുമായ ജോണിയായിരുന്നു. പണയപ്പെടുത്തിയ രണ്ട് മാലകളുമായി സംഘം ഫെബ്രുവരി 2ന് തടിയമ്പാട് പ്രവര്‍ത്തിക്കുന്ന മറ്റൊരു പണമിടപാട് സ്ഥാപനത്തില്‍ എത്തിയിരുന്നു. എന്നാല്‍ സംശയം തോന്നിയതിനാല്‍ ഇവര്‍ പണയം സ്വീകരിച്ചില്ല. അതിനു ശേഷമാണ് സംഘം മൂന്നാം തിയതി കമ്പളികണ്ടെത്തെത്തി തട്ടിപ്പ് നടത്തി മടങ്ങിയത്. തട്ടിപ്പ് നടത്തിയ ദിവസം ജോസും രാഗേഷും ബിജുവുമൊന്നിച്ച് കോതമംഗലത്തു നിന്നും വാഹനവുമായി പനംകുട്ടിയില്‍ വന്നു. പിന്നീട് ജോണിയേയും വാഹനത്തില്‍ കയറ്റി കമ്പളികണ്ടത്തെത്തി. ജോസ് ആദ്യം ഒരു മാല പണയപ്പെടുത്തി 35000രൂപ കൈവശപ്പെടുത്തി. ശേഷം ഇവര്‍ അടിമാലിയില്‍ എത്തി മദ്യപിച്ചു. വീണ്ടും തിരികെ കമ്പളികണ്ടത്തെ സ്ഥാപനത്തിലെത്തി രാഗേഷ് രണ്ടാമത്തെ മാലപണയപ്പെടുത്തി 47000 രൂപ കൂടി കൈക്കലാക്കി. ഈ സമയംപുറത്ത് വാഹനത്തില്‍ മറ്റുള്ളവര്‍ കാത്ത് കിടന്നു.

തട്ടിപ്പ് സംഘം ഉരുപ്പടികള്‍ പണയപ്പെടുത്തി മടങ്ങിയ ശേഷം സംശയം തോന്നിയ സ്ഥാപന ഉടമ നടത്തിയ പരിശോധനയില്‍ നിന്നും കബളിപ്പിക്കപ്പെട്ട വിവരം തിരിച്ചറിഞ്ഞു. തുടര്‍ന്ന് പരാതിയുമായി പോലീസിനെ സമീപിച്ചു. സ്ഥാപനത്തിലെ സിസിടിവിയില്‍ നിന്നും ജോസിന്റെയും രാഗേഷിന്റെയും ദൃശ്യങ്ങള്‍ ലഭിച്ചതോടെ പൊലീസ് അന്വേഷണം ഊര്‍ജ്ജിതമാക്കി. ഇവരെ കേന്ദ്രീകരിച്ച് നടത്തിയ
അന്വേഷണത്തില്‍ നിന്നും പൊലീസ് സൂത്രധാരനായ ബിജുവിലേക്കും ജോണിയിലേക്കുമെത്തി. തുടര്‍ന്നാണ് സംഘത്തിലുള്‍പ്പെട്ട മൂന്ന് പേര്‍
പിടിയിലായത്. കേസിലെ രണ്ടാം പ്രതിയായ രാഗേഷിനു വേണ്ടി പൊലീസ് അന്വേഷണം ഊര്‍ജ്ജിതമാക്കിയിട്ടുണ്ട്.പ്രതികളെ കമ്പളികണ്ടത്തെ പണമിടപാട് സ്ഥാപനത്തിലെത്തിച്ച് തെളിവെടുപ്പ് നടത്തി. ജില്ലാ പൊലീസ് മേധാവി, മൂന്നാര്‍ ഡിവൈഎസ്പി എന്നിവര്‍ നല്‍കിയ നിര്‍ദ്ദേശങ്ങളുടെ അടിസ്ഥാനത്തിലായിരുന്നു വെള്ളത്തൂവല്‍ പൊലീസ് അന്വേഷണം നടത്തി വന്നിരുന്നത്. വെള്ളത്തൂവല്‍ എസ്ഐ എം വി സ്കറിയ, അഡീഷണല്‍ എസ് ഐ അശോകന്‍, സിപിഒ ഷാജഹാന്‍, സതീശന്‍ എന്നിവരുള്‍പ്പെട്ട സംഘമാണ് പ്രതികളെ കസ്റ്റഡിയില്‍ എടുത്തത്.

ENGLISH SUMMARY: three per­sons arrest­ed for mak­ing gold fraud

YOU MAY ALSO LIKE THIS VIDEO

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.

Comments are closed.