Web Desk

കൊച്ചി

June 09, 2020, 8:46 pm

വന്ദേഭാരത് മൂന്നാംഘട്ടം: ഈയാഴ്ച 3000 പ്രവാസികളെത്തും

Janayugom Online

വന്ദേഭാരത് മൂന്നാംഘട്ടത്തിന്റെ ഭാഗമായി ഗൾഫ്, ഓസ്ട്രേലിയ, യൂറോപ്പ് മേഖലകളിൽ നിന്ന് കൂടുതൽ വിമാനങ്ങൾ കൊച്ചിയിലെത്തുന്നു. വിവിധ കമ്പനികളും ഏജൻസികളും ചേർന്ന് 14 പ്രത്യേക വിമാനങ്ങളും കൊച്ചിയിലേയ്ക്ക് ചാർട്ടർ ചെയ്തിട്ടുണ്ട്. ചാർട്ടർ വിമാനങ്ങളെ സ്വീകരിക്കാൻ എല്ലാവിധ സജ്ജീകരണങ്ങളും ഒരുക്കിയിട്ടുള്ളതായി സിയാൽ അറിയിച്ചിട്ടുണ്ട്. ഈ വിമാനങ്ങൾക്ക് കേന്ദ്രാനുമതി ലഭിച്ചാൽ മൂവായിരത്തിലധികം പ്രവാസികൾക്ക് ഈയാഴ്ച തന്നെ നാട്ടിലെത്താനാകും.

ജൂൺ ഒമ്പതു മുതൽ 21 വരെ എയർ ഇന്ത്യ എക്സ്പ്രസിന്റെ 15 വിമാനങ്ങൾ ഗൾഫിൽ നിന്ന് കൊച്ചിയിലേയ്ക്ക് സർവീസ് നടത്തും. അബുദാബി, സലാല, ദോഹ, കുവൈറ്റ്, ദുബായ്, മസ്ക്കറ്റ് എന്നിവിടങ്ങളിൽ നിന്നാണ് എയർ ഇന്ത്യ എക്സ്പ്രസ് സർവീസുകളുള്ളത്. 11,13,20 തീയതികളിൽ സിംഗപ്പൂരിൽ നിന്നും എയർ ഇന്ത്യ എക്സ്പ്രസ് വിമാനങ്ങളെത്തും. എയർ ഇന്ത്യ നേരത്തെ നിശ്ചയിച്ചിരുന്ന പട്ടികയിൽ സിഡ്നി, വിയറ്റ്നാം എന്നിവിടങ്ങളിൽ നിന്നുള്ള അധിക സർവീസുകൾ ചേർത്തിട്ടുണ്ട്. ജൂൺ 23 നാണ് സിഡ്നിയിൽ നിന്ന് ഡൽഹി വഴി കൊച്ചിയിൽ വിമാനമെത്തുന്നത്. 29 നാണ് രണ്ടാം വിയറ്റ്നാം സർവീസ്. ആദ്യ സർവീസ്, ഏഴാം തീയതി കൊച്ചിയിൽ എത്തിയിരുന്നു.

ജൂൺ 10 മുതൽ 18വരെ മാത്രം 14 ചാർട്ടർ വിമാനങ്ങൾ കൊച്ചിയിൽ എത്തുമെന്ന് അറിയിച്ചിട്ടുണ്ട്. ഗൾഫ് രാജ്യങ്ങൾക്ക് പുറമേ, അൾജീരിയ, ഘാന, താജിക്കിസ്താൻ എന്നിവിടങ്ങളിൽ നിന്നും കൊച്ചിയിലേയ്ക്ക് സർവീസുകൾ ചാർട്ടർ ചെയ്തിട്ടുണ്ട്. തിങ്കളാഴ്ച ടാൻസാനിയഒമാൻകൊച്ചി ചാർട്ടർ വിമാനം എത്തിയിരുന്നു. 126 യാത്രക്കാർ ഈ വിമാനത്തിലെത്തി. മാൾട്ടയിൽ നിന്ന് പ്രത്യേക വിമാനം ചാർട്ടർ ചെയ്തിരുന്നെങ്കിലും അത് ജൂൺ 16 ന് ശേഷമേ ഉണ്ടാവുകയുള്ളൂവെന്ന് ഏജൻസി അറിയിച്ചിട്ടുണ്ട്.

ഖത്തർ എയർവേസിൽ ദോഹയിൽ നിന്ന് 214 യാത്രക്കാരും സ്പൈസ് ജെറ്റ് വിമാനത്തിൽ 154 പേരും കൊച്ചിയിലെത്തി. ചൊവ്വാഴ്ച എയർ ഇന്ത്യ എക്സ്പ്രസിന്റെ അബുദാബി വിമാനത്തിൽ 177 പേർ കൊച്ചിയിലെത്തും. ആഭ്യന്തര വിഭാഗത്തിൽ 13 വീതം വിമാനങ്ങൾ ആഗമനപുറപ്പെടൽ സർവീസുകൾ നടത്തി. തിരുവനന്തപുരത്തേയ്ക്കുള്ള ഇൻഡിഗോ റദ്ദാക്കി. ഞായറാഴ്ച 1268 ആഭ്യന്തരയാത്രക്കാർ കൊച്ചിയിലെത്തി. 711 പേര്‍ ആഭ്യന്തര ടെർമിനലിൽ നിന്ന് പുറപ്പെട്ടു.

ENGLISH SUMMARY:Vande bharat third phase
You may also like this video