കത്തിയാളും ജഠരാഗ്നി നാളങ്ങൾ
ചുട്ടെരിക്കുന്ന പ്രാണപ്പിടച്ചിലിൽ
ഇറ്റുവറ്റു കൊതിച്ചതു കുറ്റമോ?
തച്ചുകൊല്ലലോ ശിക്ഷ, വിശപ്പിന്റെ
രക്തസാക്ഷി കൈയിലൊരുപിടിയരി
സുഭിക്ഷവികസന ബാക്കിപത്രമോ?
വികസനപ്പക്ഷി പഞ്ചമം പാടിലും
വിശപ്പിൻ മക്കൾക്ക് മൃതിഗാനമല്ലോ!
സമത്വമപ്പദം നിരർത്ഥം, കുന്നുകൾ
ഉയിർത്തെഴുന്നേല്പു, വൻമല, കുഴികൾ
പടുകുഴികളായി പരിതപിക്കുമ്പോൾ
വളർച്ചയോ? നാടിൻ കുതിപ്പുതന്നെയോ?
സ്വാതന്ത്ര്യാമൃത മധുരമനോജ്ഞമീ
മഹോത്സവത്തിൽ ലഹരിയിലുടയോൻ
അരുളി ചെയ്തു; “ക്ലേശിക്കേണ്ടിനിയാരും
സർവം ഡിജിറ്റലല്ലോ വിശപ്പു പോലും.”
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.