25 July 2024, Thursday
KSFE Galaxy Chits Banner 2

രാക്ഷസൻ

രാജുകൃഷ്ണൻ
July 7, 2024 4:00 am

എന്തൊരു ഉരുക്കമാണ്
ഉരുകിയുരുകി നാരുപോലെ
കാറ്റിലിങ്ങനെ അലഞ്ഞു പറക്കുമ്പോഴാണ്
ഈ ലോകത്തിനിത്ര സൗന്ദര്യം
അപ്പോൾ മാത്രമാണ് ജീവിതത്തിനിത്ര സൗഭഗം
അവൾ ഓർത്തോർത്തു കിടന്നു.

കഴിഞ്ഞ രാത്രിയിൽ
ആ രാക്ഷസൻ കടന്നു വന്നപോലെ
ഇന്നും വരുമോ…
അവൻ വരണമെന്നാണോ മനസ് ആഗ്രഹിക്കുന്നത്
അതോ വരരുതേയെന്നോ
എത്ര വേണ്ടെന്ന് കരുതിയാലും
അവൻ വരുക തന്നെ ചെയ്യും
ഒരു മുന്നറിയിപ്പുമില്ലാതെ
അവനെന്തോ അവകാശമുള്ളതുപോലെ
അവിടെയുമിവിടെയും നുള്ളിയും കിള്ളിയും
അവനെന്നെ ഇളക്കും
അങ്ങനെയങ്ങനെ ഞാൻ ഒരു പർവതത്തോളം ഉയരും
അവനോ കാറ്റായെന്നെ വലയം വച്ചുകൊണ്ടിരിക്കും
ആ രാത്രി വെളുക്കരുതേയെന്നൊരു
വിചാരം മാത്രമെ പിന്നെയുണ്ടാകു. 

അവന് അപ്പോൾ എങ്ങനെയും
എന്റെ പിടിയിൽ നിന്ന്
കുതറി മാറുവാനുള്ള ആവേശമാകും
വിടാതെ ഞാനവനെ വരിഞ്ഞു മുറുക്കും
എല്ലാ ദിവസവും അവൻ തന്നെയാണ് ജയിക്കുക
പിന്നെ ഉറക്കം വരാതെ
ഇരുട്ടിൽ ഏതോ വർണങ്ങളെ തിരഞ്ഞു
തിരിഞ്ഞും മറിഞ്ഞും കിടക്കും
ഒടുവിൽ എപ്പോഴോ ഉറങ്ങിയുണരുമ്പോഴാണ്
യഥാർത്ഥ വേദന മനസിനെ ചൂഴുക 

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.