Saturday
23 Mar 2019

അവസ്ഥാന്തരം

By: Web Desk | Sunday 11 March 2018 8:05 AM IST


മധു തൃപ്പെരുന്തുറ

മാര്‍ക്കറ്റിന്റെ ശ്വാസകോശത്തെ രണ്ടായി പകുത്തു പോകുന്ന എളുപ്പ വഴിയിലൂടെയാണ് അവള്‍ എന്നും കോളേജില്‍ പോകുന്നത്. ഓരോ ദിവസവും ഓരോ ഗന്ധമായിരിക്കും പിന്തുടരുക. ഉളളിയുടെ……. കരിപ്പെട്ടിയുടെ…….കാപ്പിപ്പൊടിയുടെ……. വെളിച്ചെണ്ണയുടെ……. നെയ്യിന്റെ……. കായത്തിന്റെ…….

താഴെ നീരൊഴുക്കിന്റെ തിട്ടയില്‍ കൂനയിട്ടിരിക്കുന്ന മാലിന്യത്തില്‍ എന്തോ തിരഞ്ഞുകൊണ്ട് ഭ്രാന്തനെ പോലെ തോന്നിപ്പിക്കുന്ന ഒരു യുവാവിനെ രണ്ടു ദിവസമായി അവള്‍ ശ്രദ്ധിക്കുന്നു. മുടിയും താടിയും നീട്ടി…. നിക്കര്‍ മാത്രമിട്ട്……നഗ്നമായ കാലുകളും ഉടലുമായി ….

ആത്മഹത്യ ചെയ്ത അവളുടെ ജ്യേഷ്ഠന്റെ പ്രായം ഉണ്ടാവണം. പിറ്റേന്ന് വാഴയിലയില്‍ പൊതി കെട്ടി കൊണ്ടുവന്ന ഭക്ഷണപ്പൊതി അവള്‍ അയാള്‍ക്കു നേരെ നീട്ടി. അയാളത് ആര്‍ത്തിയോടെ വാങ്ങി. എന്നിട്ട് അവളെ നോക്കി മന്ദഹസിച്ചു.
പിന്നെ എല്ലാദിവസവും അവള്‍ വരുമ്പോള്‍ ഭക്ഷണപ്പൊതിക്കായ് അയാള്‍ കാത്തു നിന്നു.

പെട്ടെന്നൊരു ദിവസം അയാളെ കാണാതെയായി. എന്നും ചന്തയിലെത്തുമ്പോള്‍ അവളുടെ കാലുകളുടെ വേഗം കുറയും, ചുറ്റുപാടുമൊന്നു പരതും, എങ്ങാനുമുണ്ടോ? നാളുകള്‍ പലതു കഴിഞ്ഞു. ഒരു ദിവസം പൊടുന്നനെ അവള്‍ക്കു മുമ്പില്‍ അയാള്‍ പ്രത്യക്ഷപ്പെട്ടു. താടിവടിച്ച്, മുടിമുറിച്ച് സുന്ദരക്കുട്ടപ്പനായി … പഴേ ആളാണെന്നു പറയില്ല. എങ്കിലും അവള്‍ അയാളെ തിരിച്ചറിഞ്ഞു. അയാള്‍ ഹൃദ്യമായി ചിരിച്ചു. അവള്‍ വെറുപ്പോടെ തലതിരിച്ച് ഒരപരിചിതയെപോലെ കടന്നുപോയി.