കേരളത്തിന്റെ സാംസ്കാരിക, സാഹിത്യ, ചലച്ചിത്ര ലോകത്ത് തന്റേതായ ഒരിടം കണ്ടെത്തിയ പ്രതിഭയായിരുന്നല്ലോ വയലാർ രാമവർമ്മ. ഒരു കവിയെന്ന നിലയിലും മലയാള സിനിമാ ഗാനങ്ങളെ പുതിയൊരു തലത്തിലേക്ക് എത്തിച്ച ഗാനരചയിതാവെന്ന നിലയിലുമാണ് അദ്ദേഹം എന്നും ഓർമ്മിക്കപ്പെടുന്നത്. എന്നാൽ, 1965ൽ റിലീസയ ‘ചേട്ടത്തി’ എന്ന ചിത്രത്തിലെ ‘ആദിയിൽ വചനമുണ്ടായി’ എന്ന ഗാനരംഗത്തിലൂടെ അദ്ദേഹം ഒരു അതിഥി താരമായും സ്ക്രീനിൽ എത്തുകയുണ്ടായി. വയലാറിന്റെ സിനിമാ ജീവിതത്തിലെ ഒരു കൗതുകകരമായ മുഹൂർത്തമാണിത്.
ഒരു കവിക്ക് അല്ലെങ്കിൽ എഴുത്തുകാരന് സ്വാഭാവികമായുണ്ടാകാവുന്ന ചേഷ്ടകളോടെയുള്ള അദ്ദേഹത്തിന്റെ ഈ പ്രത്യക്ഷപ്പെടൽ മലയാളികൾക്ക് ഒരു അവിസ്മരണീയ കാഴ്ചയാണ്. ‘ചേട്ടത്തി’ എന്ന സിനിമയുടെ നിർമ്മാതാവ് കൊട്ടാരക്കരക്കരക്ക് സമീപം കുന്നിക്കോട് ഗ്രാമത്തിലുള്ള മജീഷ്യൻ കൂടിയായ പി എ തങ്ങൾ ആയിരുന്നു. അദ്ദേഹവുമായുള്ള സൗഹൃദത്തിന്റെ ഭാഗമായോ, ആ ഗാനത്തിന്റെ ദാർശനിക തലത്തിന് പൂർണത നൽകാനായോ ആവാം വയലാർ ഈ രംഗത്ത് അഭിനയിക്കാൻ കാരണം.
‘ആദിയിൽ വചനമുണ്ടായി’ എന്ന ദാർശനിക ഗാനം എഴുതിയത് വയലാർ തന്നെയയായിരുന്നു. സംഗീതം നൽകിയത് എം എസ് ബാബുരാജനാണ്
ആലപിച്ചത് കെ ജെ യേശുദാസും. ചക്രവാകം രാഗത്തിലാണ് ഗാനം ചിട്ടപ്പെടുത്തിയത്. (ആഹിർ ഭൈരവി എന്ന് ചിലയിടത്ത് കാണുന്നു).
‘ആദിയിൽ വചനമുണ്ടായി’ എന്ന ഗാനം വയലാർ‑ബാബുരാജ്-യേശുദാസ് കൂട്ടുകെട്ടിലെ ഒരു മാസ്റ്റർപീസായാണ് ഇന്നും വിലയിരുത്തുന്നത്. ഇത് വെറുമൊരു ചലച്ചിത്രഗാനമായി മാത്രമല്ല മറിച്ച് ഒരു ദാർശനിക ഗാന(Philosophical Song)മായിട്ടാണ് കണക്കാക്കപ്പെടുന്നത്.
***************************
ക്രിസ്ത്യൻ വേദശാസ്ത്രത്തിലെ ഒരു പ്രശസ്തമായ വാക്യത്തെ ഓർമ്മിപ്പിക്കുംവിധമാണ് ഗാനം ആരംഭിക്കുന്നത്: “ആദിയിൽ വചനമുണ്ടായി, ആ വചനം രൂപമായി…” (യോഹന്നാൻ 1: 1 — ആദിയിൽ വചനമുണ്ടായിരുന്നു, വചനം ദൈവത്തോടുകൂടെയായിരുന്നു, വചനം ദൈവമായിരുന്നു). എന്നാൽ, വയലാർ ഈ ആശയം സ്വീകരിച്ച് അതിന് സ്വന്തമായ ഒരു ദാർശനികവും ഭൗതികവുമായ വ്യാഖ്യാനം നൽകുകയാണുണ്ടായത്.
പ്രപഞ്ചത്തിന്റെ ഉത്ഭവത്തെയും അസ്തിത്വത്തെയും കവിത ചോദ്യം ചെയ്യുന്നു. പ്രളയജലധിയിൽ പ്രണവരൂപിയായി ഉറങ്ങിയുണരുന്ന പ്രപഞ്ചശില്പിയെക്കുറിച്ച് കവി പാടുന്നു.
“പ്രളയജലധിയിൽ പ്രണവരൂപിയായ്
പ്രപഞ്ചശില്പിയുറങ്ങിയുണർന്നു…”
തുടർന്ന് കവി ശ്രദ്ധ കേന്ദ്രീകരിക്കുന്നത് സ്ത്രീ സൗന്ദര്യത്തിലേക്കാണ്. കാലമാം അജ്ഞാത ശിൽപി അശ്രുസമുദ്രത്തിരകളിൽ ചിപ്പികളുണ്ടാക്കി മുത്ത് നൽകിയതിനെക്കുറിച്ച് പറയുന്നു. സ്ത്രീഹൃദയത്തെ ‘കാണാദ്വീപിലെ കനകം’ (കാണ്മാൻ കഴിയാത്ത ദ്വീപിലെ സ്വർണം) എന്ന് വിശേഷിപ്പിക്കുന്നു.
“കവികൾ പാടി കാണാദ്വീപിലെ
കനകമല്ലോ സ്ത്രീഹൃദയം… ”
ഈ ഗാനം അതിന്റെ ആഴത്തിലുള്ള ആശയങ്ങൾകൊണ്ടും, എം എസ് ബാബുരാജിന്റെ ചിട്ടയായ സംഗീതംകൊണ്ടും കെ ജെ യേശുദാസിന്റെ വികാരനിർഭരമായ ആലാപനംകൊണ്ടും ശ്രദ്ധേയമാണ്. പലപ്പോഴും വയലാർ‑ദേവരാജൻ കൂട്ടുകെട്ടിലെ ദാർശനിക ഗാനങ്ങളോട് ചേർത്ത് നിർത്താവുന്ന ഗാനമാണിത്.
************************************
ഗാനരംഗത്ത് വന്നത് ഒരു കവിയെന്ന നിലയിൽ തന്റെ രചനയുടെ ആഴം അഭിനയത്തിലൂടെ പ്രേക്ഷകർക്ക് മുന്നിൽ അവതരിപ്പിക്കാനുള്ള അവസരമായി വയലാർ അതിനെ ഉപയോഗിച്ചു.
മലയാള സിനിമാചരിത്രത്തിൽ വയലാറിന്റെ ഈയൊരു പ്രത്യക്ഷപ്പെടൽ അദ്ദേഹത്തിന്റെ ആരാധകർക്ക് ഇന്നും ഒരു പ്രത്യേക സ്മരണയാണ്. കവിതയുടെയും സംഗീതത്തിന്റെയും ലോകത്ത് തന്റെ കയ്യൊപ്പ് ചാർത്തിയ ആ മഹാനായ കലാകാരൻ, തന്റെ അൻപതാം ചരമവാർഷികത്തിലും ‘ആദിയിൽ വചനമുണ്ടായി’ എന്ന ദാർശനിക സത്യത്തിലൂടെ അനശ്വരനായി ജീവിക്കുന്നു.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.