തദ്ദേശ സ്വയംഭരണ തിരഞ്ഞെടുപ്പില്‍ 2019ലെ പുതുക്കിയ വോട്ടര്‍ പട്ടിക ഉപയോഗിക്കണമെന്ന ഹൈക്കോടതി വിധിക്കെതിരേ സംസ്ഥാന തെരഞ്ഞെടുപ്പ് കമ്മീഷന്‍ സുപ്രീം കോടതിയെ സമീപിച്ചു. ഇക്കാര്യത്തില്‍ ഹൈക്കോടതി ഇടപെടല്‍ ശരിയല്ലെന്നും തെരഞ്ഞെടുപ്പു പ്രക്രിയയുടെ പൂര്‍ണ്ണ അധികാരം തെരഞ്ഞെടുപ്പ് കമ്മീഷനാണെന്നും ഹര്‍ജിയില്‍ പറയുന്നു.സംസ്ഥാനത്തെ തദ്ദേശ സ്വയംഭരണ തെരഞ്ഞെടുപ്പില്‍ ഏതു വോട്ടര്‍ പട്ടിക ഉപയോഗിക്കണമെന്നു നിശ്ചയിക്കേണ്ടത് തെരഞ്ഞെടുപ്പ് കമ്മീഷനാണ്.

അതേസമയം ഹൈക്കോടതി വിധി പാലിക്കേണ്ടി വന്നാല്‍ അത് തെരഞ്ഞെടുപ്പ് പ്രക്രിയ സുഗമമായി മുന്നോട്ടു കൊണ്ടുപോകുന്നതിനു ബുദ്ധിമുട്ടുകള്‍ സൃഷ്ടിക്കും. 2015ലെ പട്ടിക, വാര്‍ഡ് അടിസ്ഥാനത്തിലും 2019ലേത് ബൂത്ത് അടിസ്ഥാനത്തിലും ഉള്ളതാണ്. ഹൈക്കോടതി വിധി അനുസരിച്ചു തെരഞ്ഞെടുപ്പു നടത്തണമെങ്കില്‍ 25,000 ബൂത്തുകളില്‍ വീണ്ടും വോട്ടര്‍ പട്ടിക പരിശോധനയടക്കം നടത്തണമെന്നും ഇതു പ്രായോഗിക ബുദ്ധിമുട്ടുകള്‍ സൃഷ്ടിക്കുമെന്നും ഹര്‍ജിയില്‍ ചൂണ്ടിക്കാട്ടുന്നു. ഇതുമൂലം നിശ്ചയിച്ച സമയത്തു തെരഞ്ഞെടുപ്പ് നടത്താന്‍ കഴിയാതെ വരുമെന്നും ഹര്‍ജിയിലുണ്ട്.

പുതുതായി വോട്ടര്‍ പട്ടികയില്‍ പേരു ചേര്‍ക്കാന്‍ 15 ലക്ഷം പേരാണ് അപേക്ഷ നല്‍കിയത്. ഇതില്‍ പകുതിപ്പേര്‍ക്ക് വോട്ടവകാശം ലഭിച്ചെന്നും കമ്മീഷന്റെ അഭിഭാഷകന്‍ കെ പരമേശ്വരന്‍ നല്‍കിയ ഹര്‍ജിയില്‍ പറയുന്നു. 2019ലെ പട്ടിക ഉപയോഗിച്ചാല്‍ പത്തു കോടിയുടെ അധിക ചെലവുണ്ടാകുമെന്നും ഹര്‍ജിയില്‍ പറയുന്നു.