കോളജിൽ ബുർഖ ധരിച്ച് എത്താൻ പാടില്ലെന്ന് മുസ്ലിം വിദ്യാർഥികൾക്ക് കോളജ് അധികൃതരുടെ നിർദ്ദേശം. ബുർഖ ധരിച്ച് എത്തിയാൽ വിദ്യാർഥികളിൽ നിന്നും പിഴ ഈടാക്കാനാണ് തീരുമാനം. പട്ന ജെ ഡി വനിതാ കോളജ് പ്രിൻസിപ്പൽ ഡോ. ശ്യാമാ റോയിയാണ് ഇത് സംബന്ധിച്ച നിർദ്ദേശം നൽകിയത്. ബുർഖ ധരിച്ച് എത്തുന്ന വിദ്യാർഥികളിൽ നിന്നും 250 രൂപ പിഴ ഈടാക്കാനാണ് തീരുമാനം.
കോളജിലെ ഡ്രസ് കോഡിൽ ബുർഖ ഉൾപ്പെടുത്തിയിട്ടില്ല. ഇതിന്റെ അടിസ്ഥാനത്തിലാണ് പിഴ ഈടാക്കാനുള്ള തീരുമാനമെന്ന് പ്രിൻസിപ്പൽ ഇതുമായി ബന്ധപ്പെട്ട് പ്രതികരിച്ചതായി ദി പ്രിന്റ് റിപ്പോർട്ട് ചെയ്യുന്നു. ബുർഖ ധരിച്ച് കോളജിൽ എത്തുന്നതിൽ അധികൃതരുടെ ബുദ്ധിമുട്ടിനുള്ള കാരണം മനസിലാകുന്നില്ലെന്നും ഇത് ഒരു പ്രത്യേക മതവിഭാഗത്തെ അവഹേളിക്കുന്നതിന് തുല്യമാണെന്നും വിദ്യാർഥികൾ പ്രതികരിച്ചു. കോളജിന്റെ തീരുമാനം താലിബാൻ മോഡൽ ആണെന്ന് പ്രതിപക്ഷ പാർട്ടികളും ആരോപിച്ചു.