28 March 2024, Thursday

ലോക ഹൃദയ ദിനം

Dr. Rajalekshmi S
Consultant Cardiologist SUT Hospital, Pattom
September 29, 2021 8:38 am

മറ്റൊരു ലോക ഹൃദയദിനം കൂടി വന്ന് ചേര്‍ന്നു. മുമ്പെങ്ങും നാം കണ്ടിട്ടില്ലാത്ത നമ്മുടെ ചിന്തകളില്‍ പോലും കടന്ന് വന്നിട്ടില്ലാത്ത ഒരു സമയത്തിലൂടെയാണ് ലോകം കടന്ന് പോകുന്നത്. കോവിഡ് 19 എന്ന മഹാമാരി നമ്മുടെയെല്ലാം ജീവിതത്തെ ഒരു തരത്തില്‍ അല്ലെങ്കില്‍ മറ്റൊരു തരത്തില്‍ ബാധിച്ചിട്ടുണ്ട്. ഈ സാഹചര്യത്തില്‍ ഹൃദയ സംരക്ഷണത്തിനായി എന്തെങ്കിലും അറിയാനോ ശ്രദ്ധിക്കാനോ ഉണ്ടോയെന്ന് നോക്കാം.

നമുക്കേവര്‍ക്കുമറിയാം ഹൃദ്രോഗം നമ്പര്‍.1 കൊലയാളിയാണെന്നും അതില്‍ 80 ശതമാനത്തിലേറെ തടയാനാവുന്നതാണെന്നും. ഹൃദയാഘാതത്തിന്റെ പ്രധാന കാരണങ്ങളായ പ്രമേഹം, രക്തസമ്മര്‍ദ്ദം, കൊളസ്ട്രോള്‍ എന്നിവ നിയന്ത്രിക്കുകയും പുകവലി ഉപേക്ഷിക്കുകയും ജീവിതശൈലിയില്‍ ഉചിതമായ മാറ്റങ്ങള്‍ വരുത്തുകയുെ ചെയ്യുന്നത് നല്ലൊരു പരിധി വരെ ഹൃദയാഘാതത്തിന്റെ സാധ്യത കുറയ്ക്കാന്‍ സഹായിക്കും. ജീവിതശൈലിയിലെ മാറ്റങ്ങള്‍ എന്നാല്‍ പ്രധാനമായും ആരോഗ്യകരമായ ഭക്ഷണരീതി, കൃത്യമായ വ്യായാമം, മാനസിക സമ്മര്‍ദ്ദം കുറയ്ക്കുന്നതിനായി യോഗ, ധ്യാനം എന്നിവയാണ്.

ഈ കാലഘട്ടത്തില്‍ ധാരാളംപേര്‍ വീട്ടില്‍ നിന്നും ജോലിയിലേര്‍പ്പെടാന്‍ നിര്‍ബന്ധിതരായിരിക്കുകയാണ്. അതുകൊണ്ടുതന്നെ അവരവരുടെ ദൈനംദിന ചിട്ടകള്‍ മാറി — അമിതമായ ആരോഗ്യകരമല്ലാത്ത ഭക്ഷണശീലം, വ്യായാമക്കുറവ്, കൃത്യമായ പരിശോധനകള്‍ ഇല്ലാത്തത് മൂലം മരുന്നുകള്‍ കഴിക്കുന്നത് പോലും മുടങ്ങിപ്പോകുന്നതായും കാണുന്നുണ്ട്.

ആഗോള മഹാമാരിയായ കോവിഡ് 19 ന്റെ ഈ കാലഘട്ടത്തില്‍ ഹൃദ് രോഗികള്‍ക്ക് പല രീതിയിലുള്ള പ്രശ്നങ്ങള്‍ വരുവാന്‍ സാധ്യതയുണ്ട്.

1. കോവിഡ് 19 രോഗം ഹൃദ്രോഗമുള്ളവരെ ബാധിച്ചാല്‍ രോഗത്തിന്റെ കാഠിന്യം സങ്കീര്‍ണമാകാനുള്ള സാധ്യത കൂടുതലാണ്.

2. കോവിഡ് ഭീതി മൂലം ഹൃദ്രോഗികള്‍ അവരുടെ തുടര്‍ ചികിത്സയ്ക്ക് ഡോക്ടറെ കാണുവാനും വൈദ്യസഹായത്തിനായി ആശുപത്രി സന്ദര്‍ശനത്തിനും മടിക്കുന്നു.

നിങ്ങളുടെ പ്രിയപ്പെട്ടവര്‍ക്കും രോഗികള്‍ക്കും സഹപ്രവര്‍ത്തകര്‍ക്കും ആരോഗ്യകരമായ ഭക്ഷണരീതിയെക്കുറിച്ചും കൃത്യമായ വ്യായാമത്തിന്റെയും പ്രാധാന്യം മനസ്സിലാക്കിക്കൊടുക്കുക. ചികിത്സയിലുള്ളവര്‍ കൃത്യമായി മരുന്നുകള്‍ തുടരുക. എന്നിരുന്നാലും പ്രമേഹം, രക്തസമ്മര്‍ദ്ദം, ഹൃദ്രോഗം എന്നിവ ഉള്ളവര്‍ പരിശോധനയും ചികിത്സയും സമയാസമയത്ത് തന്നെ എടുക്കേണ്ടതാണ്. അത്യാവശ്യ സന്ദര്‍ഭങ്ങളില്‍ മടിക്കാതെ വൈദ്യസഹായം ആവശ്യപ്പെട്ടാല്‍ ഒരു തടസ്സവുമില്ലാതെ നിങ്ങള്‍ക്ക് അത് ലഭിക്കും.

‘ഹൃദ്രോഗത്തിന്റെ ബോധവല്‍ക്കരണം, പ്രതിരോധം, ചികിത്സ എന്നിവയ്ക്ക് ഡിജിറ്റല്‍ മാധ്യമങ്ങളെ പ്രയോജനപ്പെടുത്തൂ’ എന്നതാണ് ഈ വര്‍ഷത്തെ ലോക ഹൃദയ സംഘടനയുടെ ആഹ്വാനം.

ആശുപത്രി സന്ദര്‍ശനം ഒഴിവാക്കി ഡോക്ടര്‍മാരെ ടെലികണ്‍സള്‍ട്ടേഷന്‍ അല്ലെങ്കില്‍ വീഡിയോ കോള്‍ മുഖാന്തിരം കണ്‍സള്‍ട്ട് ചെയ്യുന്നതും റിപ്പോര്‍ട്ടുകള്‍ വാട്‌സ്ആപ്പ് സന്ദേശം വഴി അറിയിക്കുന്നതും ഈ കോവിഡ് കാലത്ത് സാധാരണമായിരിക്കുന്നു. ലബോറട്ടറി സേവനം വീട്ടില്‍ പോയി നടത്തുന്നതും റിപ്പോര്‍ട്ടുകള്‍ മെയില്‍ ചെയ്തു കൊടുക്കുന്നതും കൂടുതല്‍ സൗകര്യമായിട്ടുണ്ട്.
സഹപ്രവര്‍ത്തകര്‍, സുഹൃത്തുക്കള്‍, അയല്‍വാസികള്‍ ഇവര്‍ ചേര്‍ന്ന് വാട്‌സ്ആപ്പ് കൂട്ടായ്മകളില്‍ കൂടി വ്യായാമ മുറകള്‍ ചെയ്യുന്ന ശീലവും ഇപ്പോള്‍ കണ്ടുതുടങ്ങിയിട്ടുണ്ട്. ഇതുപോലെ ചികിത്സ രംഗത്ത് ഡിജിറ്റല്‍ മാധ്യമങ്ങളെ ബൃഹത്തായ രീതിയില്‍ പ്രയോജനപ്പെടുത്തി ഈ വര്‍ഷത്തെ ലോക ഹൃദയ സംഘടനയുടെ ആഹ്വാനം നമുക്ക് അന്വര്‍ത്ഥമാക്കാം.

ENGLISH SUMMARY:World Heart Day
You may also like this video

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.

Comments are closed.