Web Desk

നെടുങ്കണ്ടം

February 24, 2020, 8:37 pm

മദ്യലഹരിയിൽ അടിപിടി; ചികിത്സയിലായിരുന്നയാൾ മരിച്ചു

Janayugom Online

മദ്യലഹരിയിലുണ്ടായ അടിപിടിയെ തുടർന്ന് ചികിത്സയിലായിരുന്നയാൾ മരിച്ചു. തുക്കുപാലത്തെ സ്വാകര്യ ആശുപത്രിയിൽ ചികിത്സയിലായിരുന്ന കമ്പംമെട്ട് അച്ചക്കട ആറ്റിൻകര കൊല്ലപ്പള്ളിൽ വീട്ടിൽ ടോമി (49)യാണ് മരിച്ചത്. സംഭവത്തിൽ കുഴിത്തൊളു പ്ലാക്കുഴിയിൽ ബിനു(സന്തോഷ്-42) വിനെ കമ്പംമെട്ട് പൊലീസ് അറസ്റ്റ് ചെയ്തു.

സംഭവത്തെ കുറിച്ച് പൊലീസ് നൽകുന്ന വിവരം ഇങ്ങനെ: ടോമി ചെയ്തിരുന്ന കൃഷി ബിനുവിന്റെ സുഹൃത്ത് നശിപ്പിച്ചതിനെച്ചൊല്ലി ഞായറാഴ്ച രാത്രി ഏഴുമണിയോടെ മദ്യപിച്ച് അച്ചക്കടയിലെത്തിയ ടോമിയും ബിനുവുമായി വാക്കേറ്റമുണ്ടായി. ടോമി അസഭ്യം പറഞ്ഞതോടെ ബിനു ഇയാളുടെ മുഖത്തടിച്ചു. അടിയുടെ ആഘാതത്തിൽ റോഡിലേക്ക് തലയടിച്ച് വീണ ടോമിക്ക് പരിക്കേൽക്കുകയായിരുന്നു. ഇതിന് ശേഷം ബിനു സ്ഥലത്തു നിന്നും മടങ്ങി. രക്തം വാർന്ന് റോഡിൽ കിടന്ന ടോമിയെ നാട്ടുകാർ ചേർന്ന് തൂക്കുപാലത്തെ സ്വകാര്യ ആശുപത്രിയിൽ എത്തിക്കുകയായിരുന്നു. ആശുപത്രിയിൽ ചികിത്സയിലായിരുന്ന ടോമി തിങ്കളാഴ്ച പുലർച്ചയോടെ മരിക്കുകയായിരുന്നുവെന്ന് ആശുപത്രി അധികൃതർ പറഞ്ഞു.

ടോമിയെ മർദ്ദിച്ച ബിനുവും ഇതേ ആശുപത്രിയിൽ രാത്രി ചികിത്സ തേടി എത്തിയിരുന്നു. എന്നാൽ പിന്നീട് ഇയാൾ മടങ്ങിപ്പോവുകയായിരുന്നുവെന്നും ആശുപത്രി അധികൃതർ പറഞ്ഞു. ടോമിയുടെ മരണവിവരം അറിഞ്ഞ് തിങ്കളാഴ്ച രാവിലെ വീണ്ടും ആശുപത്രിയിൽ എത്തിയ ബിനുവിനെ പോലീസ് കസ്റ്റഡിയിൽ എടുക്കുകയായിരുന്നു.

തലക്കേറ്റ ആഴത്തിലുള്ള മുറിവാണ് മരണകാരണമെന്നാണ് പോലീസിന്റെ പ്രാഥമിക നിഗമനം. ജില്ലാ പോലീസ് മേധാവി പി കെ മധു, കമ്പംമെട്ട് സി ഐ ജി സുനിൽ കുമാർ, ഫോറൻസിക് വിദഗ്ദർ എന്നിവർ അച്ചക്കടയിൽ അടിപിടിയുണ്ടായ സ്ഥലത്തും, ആശുപത്രിയിലും പരിശോധന നടത്തി. അവിവാഹിതനായിരുന്ന ടോമി ഒറ്റക്കാണ് താമസിച്ചിരുന്നത്. നടപടികൾ പൂർത്തിയാക്കിയശേഷം മൃതദേഹം പോസ്റ്റുമോർട്ടത്തിനായി കോട്ടയം മെഡിക്കൽ കോളജ് ആശുപത്രിയിലേക്ക് മാറ്റി.

Eng­lish Sum­ma­ry; young man arrested

YOU MAY ALSO LIKE THIS VIDEO