സഹകരണ മേഖല ഉൽപ്പാദനത്തിന് മുൻകൈയെടുണം: മുല്ലക്കര രത്നാകരൻ

ഉൽപ്പാദന മേഖലയിൽ കൂടുതൽ സംരംഭങ്ങൾ ആരംഭിക്കുന്നതിന് സഹകരണ മേഖല മുൻകൈയെടുക്കണമെന്ന് സിപിഐ കൊല്ലം ജില്ലാ സെക്രട്ടറി മുല്ലക്കര രത്നാകരൻ. എല്ലാ സഹകരണ ബാങ്കുകളിലും നിക്ഷേപങ്ങൾ കൂടുന്നു. എന്നാൽ വായ്പ വിതരണം അനുപാതികമായി നടക്കുന്നില്ല. ഈ സാഹചര്യത്തിൽ ഉൽപ്പാദന മേഖലയിലടക്കം കൂടുതൽ സംരംഭങ്ങൾ ആരംഭിച്ച് ലാഭകരമായ ബിസിനസ്സ് നടത്തുകയും കൂടുതൽ തൊഴിലവസരങ്ങൾ സുഷ്ടിക്കുകയും വേണമെന്നും അദ്ദേഹം പറഞ്ഞു. കേരള കോ-ഓപ്പറേറ്റീവ് എംപ്ലോയീസ് കൗൺസിൽ (എഐടിയുസി) ജില്ലാ സമ്മേളനം കൊട്ടാരക്കരയിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കെസിഇസി ജില്ലാ പ്രസിഡന്റ് പ്രകാശ് ലക്ഷ്മൺ, ഡി ചന്ദ്രബോസ്, ആൻസി എന്നിവരടങ്ങിയ പ്രസീഡിയം സമ്മേളനം നിയന്ത്രിച്ചു. സ്വാഗത സംഘം കൺവീനർ എസ് രഞ്ജിത്ത് സ്വാഗതം പറഞ്ഞു. ജില്ലാ സെക്രട്ടറി കെ വി പ്രമോദ് പ്രവർത്തന റിപ്പോർട്ട് അവതരിപ്പിച്ചു. എഐടിയുസി ജില്ലാ സെക്രട്ടറി ജി ബാബു, കെസിഇസി സംസ്ഥാന സെക്രട്ടറി വിൽസൺ ആന്റണി, സിപിഐ മണ്ഡലം സെക്രട്ടറി എ എസ് ഷാജി, അസി. സെക്രട്ടറി ജി മാധവൻ നായർ, ജില്ലാ കൗണ്‍സിലംഗം ചെങ്ങറ സുരേന്ദ്രൻ, ബെൻസി തോമസ് എന്നിവർ സംസാരിച്ചു. ജില്ലാ പ്രസിഡന്റ് പ്രകാശ് ലക്ഷ്മൺ പതാക ഉയർത്തി.