ദേശ വ്യാപകമായി നടത്തുന്ന പണിമുടക്ക് വിജയിപ്പിക്കാൻ സിപിഐ ജില്ലാ സെക്രട്ടറി മുല്ലക്കര രത്നാകരൻ അഭ്യര്‍ത്ഥിച്ചു. കേന്ദ്ര ഗവൺമെന്റിന്റെ ജനദ്രോഹകരവും തൊഴിലാളി വിരുദ്ധവുമായ നിലപാടുകൾ രാജ്യത്തെ പൊതു ജീവിതത്തെ ഗുരുതരമായ പ്രതിസന്ധിയിൽ എത്തിച്ചിട്ടുണ്ട്. ജനാധിപത്യപരമായ തൊഴിലാളികളുടെയും സാധാരണ മനുഷ്യരുടെയും അവകാശങ്ങളെല്ലാം ഇല്ലാതാക്കുന്ന നയങ്ങളാണ് ഗവൺമെന്റ് തുടർച്ചയായി കൈക്കൊണ്ടു വരുന്നത്. ഇതിനെതിരെ പൊരുതാനുറച്ചു തൊഴിലാളികളും കർഷകരും ഇതര ജനവിഭാഗങ്ങളും സമരരംഗത്ത് വരുകയാണ്. ഇതിനെ ആകെ കൂട്ടിയോജിപ്പിക്കാനാണ് ട്രേഡ് യൂണിയൻ പ്രസ്ഥാനങ്ങൾ മുൻകൈയെടുത്ത് പണിമുടക്ക് സംഘടിപ്പിക്കുന്നത്. എല്ലാവിഭാഗം തൊഴിലാളികളും ബഹുജനങ്ങളും ഇതിനോടൊപ്പം ചേർന്ന് വിജയിപ്പിക്കണമെന്ന് മുല്ലക്കര രത്നാകരൻ അഭ്യർത്ഥിച്ചു.