ആടിയകന്നാടിയെത്തുന്നൊരാവണി
മോടിയിലാറാടും നേരം
കാതങ്ങൾ താണ്ടി കുതിച്ചെത്തി ഒത്തുചേർ-
ന്നോണമിതാണ്ടിലൊന്നല്ലൊ!
മാനവരാമോദമേറ്റു പാടുന്നൊരു
ഭൂതകാലക്കുളിർ നെഞ്ചിൽ.
കാലപ്പകർച്ച തന്നീണപ്പതർച്ച പോയ്
വേല പൂരങ്ങളുണർന്നു.
മാവേലിക്കാലത്തിൻ സ്വപ്നപ്രതീക്ഷയിൽ
മാനവർക്കുള്ളം നിറഞ്ഞു.
ഭേദഭാവങ്ങൾക്കിടമിടാതാദ്യന്തം
ചേതോഹരക്കാഴ്ചയെങ്ങും.
തുമ്പികൾ തുള്ളിക്കളിക്കുന്ന പൂവാടി
തുമ്പപ്പൂ മാടി വിളിപ്പൂ.
പൂവിളി പൂവിളി പൊന്നോണക്കാലമായ്
പൂനുള്ളാൻ കൂട്ടമായോടും.
ഓണക്കളങ്ങളിലാഹ്ലാദപ്പൂനിറ-
ച്ചാനന്ദമാഘോഷപൂരം.
കൊട്ടും കുരവയുമാർപ്പിന്റെ താളത്തിൽ
കുട്ടികൾ പുത്തനുടുപ്പിൽ.
കള്ളമില്ലാ പൊളിയില്ലാ വചനങ്ങൾ
ഉള്ളങ്ങൾ തുള്ളിത്തുളുമ്പി.
കാണങ്ങൾ വിറ്റതിൻ ക്ഷീണം മറന്നുള്ളിൽ
ഓണപ്പാട്ടൊന്നായ് കിലുങ്ങി
കാലം കെടുത്താത്തൊരോർമ്മക്കുരുന്നുകൾ
താലം പിടിച്ചിതാ മുന്നിൽ!
-