പാലത്തിന്റെ അറ്റകുറ്റപണികൾ തുടങ്ങി

കടുവാത്തോട് ഇടക്കടവ് പാലത്തിന്റെ അറ്റകുറ്റപണികൾ ആരംഭിച്ചു. ഭാഗികമായി ഗതാഗതം നിയന്ത്രിച്ചു കൊണ്ടാണ് പ്രവർത്തനങ്ങൾ. രണ്ട് പഞ്ചായത്തുകളെ തമ്മിൽ ബന്ധിപ്പിക്കുന്ന പാലത്തിലെ സ്പാനുകൾക്കിടയിൽ വലിയ വിള്ളലുകൾ ഉണ്ടായിരുന്നു. പട്ടാഴി, പട്ടാഴി വടക്കേക്കര പഞ്ചായത്തുകളെ ബന്ധിപ്പിക്കുന്ന കല്ലടയാറിന് കുറുകെയുള്ള പാലത്തിലാണ് വിള്ളലുകൾ ഉണ്ടായിരുന്നത്. പട്ടാഴി ഭാഗത്തു നിന്നും എത്തുമ്പോൾ ആറിന് മുകളിലായി ഉളള മൂന്ന് തൂണുകൾക്കും മുകളിലുള്ള കോൺക്രീറ്റ് ബ്ലോക്കുകൾക്കിടയിലാണ് വിള്ളലുള്ളത്. കോൺക്രീറ്റുകൾ തമ്മിൽ ചേരുന്ന ഭാഗത്ത് ചെറിയ കുഴികൾ രൂപപ്പെട്ട നിലയിലായിരുന്നു. ഇതെ തുടർന്നാണ് ടാറിംഗ് പൂർണ്ണമായും ഇളക്കി മാറ്റി അറ്റകുറ്റപണികൾ ആരംഭിച്ചിരിക്കുന്നത്. പൊതുമരാമത്ത് വകുപ്പിന്റെ മേൽനോട്ടത്തിലാണ് പ്രവർത്തനങ്ങൾ. ഒരു വർഷം മുൻപ് ഏഴംകുളം പട്ടാഴി മുക്ക് മുതൽ പട്ടാഴി വരെയുള്ള ഭാഗം പൂർണ്ണമായും ടാറിംഗ് നടത്തിയിരുന്നു.