പുരുഷന്മാർ മാത്രം കൈകാര്യം ചെയ്തിരുന്ന മേഖലയിലേക്ക് ഒരു വനിത കൂടി എത്തിയിരിക്കുകയാണ്. സംസ്ഥാനത്താദ്യമായി സ്രാങ്ക് ലൈസൻസ് നേടിയ വനിതയെന്ന ബഹുമതി ചേർത്തല പെരുമ്പളം സ്വദേശിനിയായ സന്ധ്യ സ്വന്തമാക്കി. ബോട്ടുകൾ, ബാർജുകൾ, മറ്റു ജലവാഹനങ്ങൾ എന്നിവ ഓടിക്കാനുള്ള സർട്ടിഫിക്കറ്റാണു പെരുമ്പളം തുരുത്തേൽ എസ് സന്ധ്യ (44) നേടിയത്.
കേരള ഇൻലാൻഡ് വെസൽ (കെഐവി) റൂൾ‑2010 പ്രകാരം നടന്ന സ്രാങ്ക് പരീക്ഷയിൽ സന്ധ്യ ജയിച്ചു. ബാർജ്, മത്സ്യബന്ധന വെസൽ തുടങ്ങിയ ജലവാഹനങ്ങളിൽ ജോലി ചെയ്യുന്നതിനു കെഐവി സ്രാങ്ക് ലൈ സൻസ് വേണം. ബോട്ടിലെ പരിശീലനത്തിനുശേഷം നടന്ന എഴുത്തുപരീക്ഷയിലും ജയിച്ചതോടെയാണ് സ്രാങ്ക് ലൈസൻസ് ലഭിച്ചത്. ലാസ്കർ ലൈസൻസ് നേടി കുറഞ്ഞതു രണ്ടുവർഷം ജോലി ചെയ്താലേ സ്രാങ്ക് ലൈസൻസിന് അപേക്ഷിക്കാൻ കഴിയൂ. സ്റ്റിയറിങ് തിരിക്കൽ, ബോട്ട് ഓടിക്കൽ ഉൾപ്പെടെ മുഴുവൻ നിയന്ത്രണത്തിനും ചുമതലപ്പെട്ടയാളാണ് സ്രാങ്ക്.
തേവര, നെട്ടൂർ, ആലപ്പുഴ തൈക്കാട്ടുശേരി ഭാഗങ്ങളിൽ പുരവഞ്ചിയുൾപ്പെടെ ഓടിച്ച് പരിചയമുണ്ട് സന്ധ്യക്ക്. വിഴിഞ്ഞം, തിരുവനന്തപുരം, കൊല്ലം, കൊടുങ്ങല്ലൂർ, ആലപ്പുഴ തുടങ്ങിയ പോർട്ടുകളിൽ പരീക്ഷ നടത്തുന്നുണ്ട്.
ആലപ്പുഴ പോർട്ട് ഓഫിസിൽനിന്നാണ് സർട്ടിഫിക്കറ്റ് ലഭിച്ചത്. 226 എച്ച്പി വരെയുള്ള ജലയാനങ്ങൾ ഇനി സന്ധ്യക്ക് കൈകാര്യം ചെയ്യാം. ബോട്ട് മാസ്റ്റർ, ലാസ്കർ തുടങ്ങിയ പരീക്ഷകളിൽ മുമ്പത്തെക്കാൾ കൂടുതൽ വനിതകൾ എത്തുന്നുണ്ട്. ആര് ജോലിക്ക് വിളിച്ചാലും തന്റെ സേവനം ഉറപ്പാക്കും എന്ന് സന്ധ്യ പറഞ്ഞു. വൈക്കം സ്വദേശികളായ പരേതരായ സോമന്റെയും സുലഭയുടെയും മകളണ് സന്ധ്യ. ഭർത്താവ്: അങ്കമാലി ഫുഡ് കോർപറേഷൻ ഗോഡൗണിലെ കയറ്റിറക്കു തൊഴിലാളി മണി. മക്കൾ: ഹരിലക്ഷ്മി, ഹരികൃഷ്ണ.