പൊലീസ് സ്റ്റേഷന്‍ ഗേറ്റ് താഴിട്ട് പൂട്ടി യുവാവ് മുങ്ങി. മര്‍ദനത്തില്‍ പരിക്കുകളേറ്റതിനെ തുടര്‍ന്ന് പരാതി പറയാന്‍ എത്തിയ യുവാവാണ് പൊലീസ് സ്റ്റേഷന്റെ മുന്‍വശത്തെ ഗേറ്റ് താഴിട്ട് പൂട്ടിയശേഷം കടന്നത്. അമ്പൂരി സ്വദേശി നോബി തോമസാണ്(40) ഗേറ്റ് പൂട്ടി സ്ഥലം വിട്ടത്.
ശനിയാഴ്ച വൈകിട്ട് ആറുമണിയോടെയായിരുന്നു സംഭവം. അമ്പൂരിയില്‍ വച്ച് രണ്ടുപേര്‍ തന്നെ ആക്രമിച്ച് പരിക്കേല്പിച്ചുവെന്ന പരാതി പറയാനായിട്ടാണ് ശനിയാഴ്ച രാവിലെ നോബി വെള്ളറട പൊലീസ് സ്റ്റേഷനില്‍ എത്തിയത്. മുറിവുകളുമായി എത്തിയ ഇയാളോട് ആശുപത്രിയില്‍ ചികിത്സതേടാന്‍ പൊലീസ് ഉദ്യോഗസ്ഥര്‍ നിര്‍ദേശിച്ചു. എന്നാല്‍ ഉടനെ കേസെടുക്കണമെന്നും ആശുപത്രിയില്‍ പൊലീസുകാര്‍ കൂടി വരണമെന്നും ഇയാള്‍ പറഞ്ഞു. കേസെടുക്കാന്‍ സാധിച്ചില്ലെങ്കില്‍ സ്റ്റേഷന്‍ പൂട്ടിയിട്ടു പോകാന്‍ ഇയാള്‍ പൊലീസ് ഉദ്യോഗസ്ഥരോടു പറഞ്ഞശേഷം പുറത്തിറങ്ങി. ഓട്ടോറിക്ഷയില്‍ ആശുപത്രിയില്‍ പോകാന്‍ പൊലീസ് നോബിയോടു പറഞ്ഞെങ്കിലും ഇയാള്‍ അത് വകവയ്ക്കാതെ ബൈക്കില്‍ ആശുപത്രിയിലേക്കു പോയി. വൈകിട്ടോടെ തിരിച്ചെത്തി പൊലീസ് സ്റ്റേഷന്റെ ഗേറ്റ് താഴിട്ട് പൂട്ടി മുങ്ങുകയായിരുന്നു.
അരമണിക്കൂറോളം ഗേറ്റ് അടഞ്ഞുകിടന്നതിനാല്‍ സ്റ്റേഷനില്‍ എത്തിയവര്‍ക്ക് അകത്തു കടക്കാന്‍ സാധിച്ചില്ല. നാട്ടുകാര്‍ ചുറ്റിക ഉപയോഗിച്ച് താഴ് തകര്‍ക്കുകയായിരുന്നു. നോബിക്ക് മാനസികാസ്വാസ്ഥ്യമുണ്ടെന്നും അമ്പൂരിയില്‍ സ്ത്രീയോട് അപമര്യാദയായി പെരുമാറിയതിനാണ് മര്‍ദനമേറ്റതെന്നും അന്വേഷണത്തില്‍ അറിയാന്‍ കഴിഞ്ഞതായി പൊലീസ് പറഞ്ഞു.
English Sammury: young man closed police station gate in thiruvananthapuram amboori