പൊലീസ് ഉദ്യോഗസ്ഥൻ ചമഞ്ഞ് റിട്ടയേര്‍ഡ് എസ്പി തട്ടിയെടുത്തത് ലക്ഷക്കണക്കിന് രൂപ. തട്ടിപ്പ് നടത്തിയ റിട്ടയർ എസ്പി സുനിൽ ജേക്കബ്ബിനെതിരെ കാലടി പൊലീസ് കേസെടുത്തു. സോഫ്റ്റ്വെയർ റൈറ്റ്സ് തട്ടിപ്പിനിരയായ ചൊവ്വര സ്വദേശിയിൽ നിന്നും നഷ്ടപ്പെട്ട പണം താൻ മുഖാന്തരം വാങ്ങി തരാം എന്ന് പറഞ്ഞാണ് ഇയാൾ ലക്ഷങ്ങൾ തട്ടിയത്. സോഫ്റ്റ് വെയർ റൈറ്റ്സ് വില്പനയിലൂടെ ലക്ഷങ്ങൾ ലാഭമുണ്ടാക്കാം എന്ന് പറഞ്ഞ് വിശ്വസിപ്പിച്ച് ചൊവ്വര സ്വദേശി ബഷീറിൽ നിന്നും മൂന്ന് കോടി ഇരുപത്തിയഞ്ച് ലക്ഷം രൂപ കണ്ണൂർ കയാനി ഷുറൂക്ക് മഹലിൽ ഉബൈസും സംഘവും കവർന്നിരുന്നു. ഈ തട്ടിപ്പ്കാരിൽ നിന്നും പണം തിരികെ വാങ്ങിത്തരാം എന്ന് പറഞ്ഞാണ് സുനിൽ ജേക്കബ് ബഷീറിൽ നിന്നും പണം തട്ടിയത്. തനിക്ക് ഉന്നതങ്ങളിൽ വലിയ ബന്ധങ്ങൾ ഉണ്ടെന്നും പല കേസുകളും തീർപ്പാക്കുന്നത് താനാണെന്നുമെല്ലാം പറഞ്ഞ് വിശ്വസിപ്പിച്ചാണ് ബഷീറിൽ നിന്നും ഇയാൾ പണം തട്ടിയത്.
നഷ്ടപ്പെട്ട തുകയുടെ മുപ്പതു ശതമാനമാണ് കമ്മീഷനായി ഇൻവിസിബിൾ സ്‌പൈ വർക്ക് എന്ന സ്ഥാപനത്തിന്റെ മറവിൽ സുനിൽ ജേക്കബ്ബ് ആവശ്യപ്പെട്ടത്. വ്യവസ്ഥകൾ കാണിച്ച് എഗ്രിമെന്റ് തയ്യാറാക്കിയിരുന്നു. അക്കൗണ്ട് വഴിയും നേരിട്ടുമാണ് പരാതിക്കാരൻ പണം നൽകിയത്. കലൂരിലുള്ള ഫ്ലാറ്റിൽ വച്ചാണ് പരാതിക്കാരൻ സുനിൽ ജേക്കബ്ബിനെ കണ്ടതെന്നും, എസ്.പിയാണെന്ന് പറഞ്ഞാണ് പരിചയപ്പെടുത്തിയതെന്നും പരാതിയിൽ പറയുന്നു. പണം നഷ്ടപ്പെട്ടതിന് തന്റെ ഏജൻസി പരിഹാരം ഉണ്ടാക്കിത്തരുമെന്ന് പറഞ്ഞ് അമ്പതിനായിരം രൂപയും വാങ്ങി. സമാന സ്വഭാവമുള്ള മറ്റൊരു കേസിലേക്ക് ആറ്‌ ലക്ഷത്തി ഇരുപതിനായിരത്തോളം രൂപയും തട്ടിയെടുത്തു. കബളിപ്പിക്കട്ടെന്നറിഞ്ഞ ചൊവ്വര സ്വദേശി പണം തിരികെ ആവശ്യപ്പെട്ടെങ്കിലും പല കാരണങ്ങൾ പറഞ്ഞ് ഒഴിഞ്ഞുമാറി ചതിക്കുകയായിരുന്നു. സിനിമ മേഖലയിലും ഇയാൾ പ്രവർത്തിക്കുന്നുണ്ട്. കൊട്ടേഷൻ പൊലീസ് എന്ന പേരിലാണ് ഇയാൾ അറിയപെടുന്നത്. ഇയാളിൽ നിന്ന് സമാനമായ തട്ടിപ്പ് നേരിട്ടവർ 0484 2462360 (കാലടി പിഎസ്) എന്ന നമ്പറിൽ ബന്ധപ്പെടണമെന്ന് പൊലീസ് അറിയിച്ചു.
English Summary: A case has been registered against Retd.SP
You may also like this video
