ബിഹാറിലെ ഗയ ജില്ലയില്‍ രണ്ട് പേര്‍ ചേര്‍ന്ന് 6 വയസ്സുകാരിയെ തട്ടിക്കൊണ്ടു പോയി ബലാത്സംഗം ചെയ്ത ശേഷം മൃതദേഹം നദിയില്‍ എറിഞ്ഞതായി പൊലീസ് പറഞ്ഞു.കുട്ടിയെ കൊലപ്പെടുത്തിയ ശേഷം പ്രതികള്‍ മൃതദേഹം ഷെര്‍ഗാട്ടി പൊലീസ് സ്റ്റേഷന് പരിധിയിലുള്ള ഉചിര്‍വാന്‍ ഗ്രാമത്തിലെ മൊര്‍ഹാന്‍ നദിയുടെ തീരത്ത് ഉപേക്ഷിക്കുകയായിരുന്നു.രണ്ട് പ്രതികളും അറസ്റ്റിലായി.
വീട്ടില്‍ ഉറങ്ങിക്കിടക്കുകയായിരുന്ന കുട്ടിയെ പ്രതികള്‍ തട്ടിക്കൊണ്ടുപോയി പീഡിപ്പിച്ച ശേഷം കൊലപ്പെടുത്തുകയായിരുന്നുവെന്ന് കുടുംബാംഗങ്ങള്‍ സമര്‍പ്പിച്ച എഫ്ഐആറില്‍ പറയുന്നു.മൊഹാര്‍ നദിയുടെ തീരത്ത് ഒരു പെണ്‍കുട്ടിയുടെ മൃതദേഹം കിടക്കുന്നുവെന്ന് ഫോണ്‍ കോള്‍ ലഭിച്ചതിനെത്തുടര്‍ന്ന് പൊലീസ് സംഘം ഉടന്‍ സ്ഥലത്തെത്തി മൃതദേഹം പോസ്റ്റ്മോര്‍ട്ടത്തിന് അയക്കുകയായിരുന്നു.പ്രതികളിലൊരാളെ പിടികൂടിയപ്പോള്‍ തന്നെ നാട്ടുകാര്‍ മര്‍ദ്ദിച്ചു.സംഭവത്തില്‍ പൊലീസ് സ്റ്റേഷന് നേരെ പ്രതിഷേധ പ്രകടനവും നടന്നു.