ആത്മാഭിമാനത്തിലൊരു ചിത

ഒരു ചിത ഞാൻ ഒരുക്കിവെച്ചിട്ടുണ്ട്
ചിതറി ചിതലരിച്ച ചിന്തകൾ
ഇട്ടുമൂടാൻ വേണ്ടി മാത്രം
ഓർമ്മതൻ തീരത്ത് ഒരുക്കുമാ
ചിതയിൽ ചുട്ടെരിക്കും ഞാനെൻ
നഷ്ടസ്വപ്നങ്ങളെല്ലാം
അറിയാതെ കൈകളിൽ നിന്ന്
അടർന്നതെന്ന് തോന്നിയതെല്ലാം
കാലത്തിൻ കല്പനയാണെന്ന്
നിരൂപിച്ചെങ്കിലും
സത്യങ്ങൾ ഓരോന്നും
ഒട്ടൊരു പരിഹാസ ചിരിയോടെ
കൊഞ്ഞനം കുത്തി
കൊത്തിയതെല്ലാം
കൊക്കിലൊതുക്കാനാവില്ല നിനക്കെന്ന്
കേട്ടുതഴമ്പിച്ചപ്പോഴും
തോന്നാത്ത ചിന്തകൾ
തോന്നി തുടങ്ങുന്നുണ്ടിപ്പോൾ
ഉണരുന്ന ആത്മാഭിമാനബോധത്തിൽ
നിന്നുമാവാഹിക്കും
ഞാനെൻ ചിതയെരിക്കാൻ
അഗ്നിസ്ഫുലിംഗങ്ങൾ